قاي-قايداعى ءبىر جابايى وي بيلەپ، جابىرقايتىندى شىعاردىم. كەيدە بار عوي... ولگەنشە ماس بوپ الىپ، بي الاڭىنا شىعىپ كەتكىم كەلەدى!

ادامزات بارعان سايىن ادامي بولمىستان الىستاپ بارا جاتقانداي. ادامدار اراسىنداعى «ءتىرى» قارىم-قاتىناس شالاجانسار كۇيگە ءتۇسىپ، سۋرروگات ارەكەت قالىپتاستى: عالامتور، ۆاتساپ، سمس، تاعى نەمەنە ەدى؟ ءتىپتى تەلەفون ارقىلى «ءحالىڭ قالاي؟» دەۋدەن قالىپ بارامىز. داۋسىمىزدى ساعىنۋعا ۋاقىت جوق. تەتىكتى باسا سالىپ، دايىن لەبىزدى نەمەسە وتكرىتكانى جىبەرە سالاسىڭ، قۇدا دا تىنىش، قۇداعي دا تىنىش. ەندى ءبىرشاما ۋاقىتتان سوڭ «اقىلدى» سمارتفوننىڭ بەتىنە قاراپ كوزىڭدى قىسىپ قالساڭ بولدى: «قام جەمەڭىز، اجەسى، نەمەرەڭىزگە قۇلتەمىر بەسىك جىرىن ايتىپ جاتىر!» دەپ، ار جاعىنان ءۇزىلىپ-سوزىلىپ، جاڭعىرىعا شىققان عارىشتىق داۋىس اندەتىپ تۇراتىن شىعار.

جاستار ءۇشىن قام جەمەيمىن. جاڭالىق اتاۋلىنى شەتىنەن قاقشىپ الىپ، تالعاماستان قىلعىتۋدا. ال مەن سياقتى قارتاڭ جاندار قايتپەك؟ قۇرعاي باستاعان مي راديواكتيۆتىك جىلدامدىقپەن زىمىراعان وركەنيەت بوساعاسىنان سىعالاۋعا قاۋقارى جەتپەي، تەحنولوگيالىق توڭكەرىس پەن جاڭاشا ويلاۋ ءديزاينىنىڭ ءبىرىن قابىلداسا، ءبىرىن قابىلداي الماي، باعىتىنان اداسىپ، اقشا مەن كومپيۋتەرلىك تەحنولوگيا بيلىك قۇرعان زاماندا توزاقتاعى پەرىشتە بوپ سورلاپ قالسا شە؟ وندايلاردىڭ قوعامعا قاجەتى شامالى. جاقىن-تۋىستارىنا ارتىق سالماق.

قۇداي ساقتاسىن! ءوزىم مۇندايدان الىسپىن دەپ ميىعىنان مىرس ەتەتىندەر تابىلارى انىق. كۇل، كۇل! ءƏلى-اق كۇلكىڭ وسىلار! تاناعا تۋعان كۇن بۇزاۋعا تۋمايدى دەپ كىم ايتتى؟ ەرتە مە، كەش پە، كىمنىڭ بولماسىن، بەلى ءبىر بۇگىلەرى حاق. ال ومىردەگى وزگەرىس ۋاقىتتىڭ ءوزىن باسىپ وزعىسى كەلىپ ورشەلەنە تۇسەدى. بۇگىنگى ءبىلىم - ەرتەڭ جارامسىز. سوندا ادام ءومىرىنىڭ اقىرىنا دەيىن تولىققاندى تۇرمىس كەشۋى ءۇشىن ولە-ولگەنشە جەتىلە بەرۋى كەرەك پە؟

مىنا زامان قايدا بارىپ توقتايدى؟

گۇلماريا بارمانبەكوۆانىڭ Facebook-تەگى پاراقشاسىنان

Abai.kz