مەملەكەت باسشىسى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى.

كۇن تارتىبىنە سايكەس جيىندا ەلىمىزدەگى قۇرىلىمدىق جانە ينستيتۋتسيونالدىق رەفورمالاردىڭ جۇزەگە اسىرىلۋ بارىسى جانە سولتۇستىك قازاقستان وبلىسىنىڭ الەۋمەتتىك-ەكونوميكالىق احۋالى تالقىلاندى.

وتىرىستى اشقان مەملەكەت باسشىسى 2008 جىلعى الەمدىك قارجى داعدارىسىنىڭ سالدارىنا قاراماستان، ەكونوميكالىق تۇراقتىلىقتى ساقتاۋ ءۇشىن ىسكە اسىرىلعان شارالارعا نازار اۋداردى.

– الەمدىك قارجى داعدارىسى باستالعان ساتتەن بەرى 10 جىل ءوتتى. جاعداي وزگەردى. داعدارىستان شىعۋ ءۇشىن ءبىز ارنايى باعدارلامالار ازىرلەدىك، جول كارتاسىن قابىلدادىق، جۇمىستان بوساپ قالعان ادامدارعا قول ۇشىن سوزدىق. كوپتەگەن شارالار جۇزەگە اسىرىلدى. ءبىز شەتەلدەن ينۆەستيتسيا تارتتىق جانە  ءوز قارجىمىزدى دا پايدالاندىق. سول ارقىلى ۇلتتىق ەكونوميكامىزدى قۇلدىراتپاي داعدارىستان شىعۋعا مۇمكىندىك الدىق، – دەدى قازاقستان پرەزيدەنتى.

نۇرسۇلتان نازارباەۆ جاھاندىق ۇردىستەر مەن قالىپتاسقان گەوساياسي احۋالدى ەسكەرە وتىرىپ، دامۋدىڭ جاڭا باعدارلامالارىن ازىرلەۋ قاجەتتىگىن ايتتى.

– پرەزيدەنت اكىمشىلىگى مەن ۇكىمەت ودان ءارى دامۋىمىزدىڭ جولدارىن ىزدەستىرۋى كەرەك. ءبىز بولاشاقتا ءتيىستى شارالار قابىلداۋ ءۇشىن بولجام جاساۋىمىز قاجەت. ءبىزدىڭ الداعى ءىس-اركەتتەرىمىز جونىندە ايقىن ۇستانىمىمىز بولۋعا ءتيىس، – دەدى مەملەكەت باسشىسى.

قازاقستان پرەزيدەنتى قازىرگى مەملەكەتتىك جانە سالالىق باعدارلامالاردى جۇزەگە اسىرۋدىڭ تيىمدىلىگىنە توقتالىپ، ولاردىڭ ۋاقتىلى جانە ساپالى ورىندالۋىنىڭ ماڭىزدىلىعىن اتاپ ءوتتى.

نۇرسۇلتان نازارباەۆ اگروونەركاسىپ سەكتورىن ودان ءارى دامىتۋ جانە قايتا وڭدەۋ سالاسىنا ينۆەستيتسيا تارتۋ  ءۇشىن ءتيىستى شارالار قابىلداۋ قاجەتتىگىنە نازار اۋداردى.

ەلباسى مەملەكەتتىك ورگانداردىڭ قىزمەتى ەل تۇرعىندارىنىڭ ءال-اۋقاتىن ارتتىرۋعا باعىتتالۋى ءتيىس ەكەنىن ايتتى.

– ءبىزدىڭ بۇكىل جۇمىسىمىز حالىقتىڭ تابىسىن ارتتىرۋدى كوزدەيدى. ەگەر ولاي بولماسا، وندا ۇكىمەتتىڭ شاماسى كەلمەي وتىر دەگەن ءسوز، – دەدى قازاقستان پرەزيدەنتى.

سونىمەن قاتار، نۇرسۇلتان نازارباەۆ حالىقتى جۇمىسپەن قامتۋ، مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ، شاعىن جانە ورتا بيزنەستى قولداۋ، جاستارعا كاسىبي ءبىلىم بەرىپ، جۇمىسقا ورنالاستىرۋ ماسەلەلەرىنە توقتالدى.

جيىن بارىسىندا پرەمەر-مينيستر ب.ساعىنتاەۆ، ۇلتتىق بانك توراعاسى د.اقىشەۆ، باس پروكۋرور ق.قوجامجاروۆ جانە سولتۇستىك قازاقستان وبلىسىنىڭ اكىمى ق.اقساقالوۆ بايانداما جاسادى.

باسقوسۋ قورىتىندىسى بويىنشا قازاقستان پرەزيدەنتى ۇكىمەتكە جانە باسقا دا مۇددەلى مەملەكەتتىك ورگاندارعا بىرقاتار ناقتى تاپسىرما بەردى جانە ولاردىڭ ورىندالۋىن قاداعالاۋدى پرەزيدەنت اكىمشىلىگى مەن قاۋىپسىزدىك كەڭەسىنىڭ اپپاراتىنا تاپسىردى.

Abai.kz