قازاقستان رەسپۋبليكاسى مادەنيەت جانە سپورت مينيسترلىگى «ەسىك» مەملەكەتتىك تاريحي-مادەني قورىق-مۋزەيىندەگى قازاقستان رەسپۋبليكاسى مەن كورەيا رەسپۋبليكاسىنىڭ بىرىككەن «ۇلى جىبەك جولى بويىنداعى دوستىق جانە ارىپتەستىك» ەستەلىك-بەلگىسى ەسكەرتكىشى اشىلدى.  بۇل تۋرالى مينيسترلىكتىڭ ءباسپاسوز قىزمەتى حابارلايدى.  

قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن «ەسىك» مەملەكەتتىك تاريحي-مادەني قورىق-مۋزەيى اۋماعىنا قازاقستان رەسپۋبليكاسى مەن وڭتۇستىك كورەيا ەلدەرىنىڭ بىرىككەن «ۇلى جىبەك جولى بويىنداعى دوستىق جانە ارىپتەستىك» ەستەلىك-بەلگىسىنىڭ اشىلۋ سالاتاناتى بولىپ ءوتتى. بۇل ەستەلىك-بەلگىسى كورەيا رەسپۋبليكاسى تاراپىنان 2013 جىلدان باستاپ كورەيا، قىتاي، يران، وزبەكستان، تۇركيا، ءۇندىستان سىندى ۇلى جىبەك جولى بويىنداعى ەلدەردە قويىلعان. قازاقستاندا تۇڭعىش رەت قويىلعالى تۇرعان ەستەلىك-بەلگىنى ورنالاستىرۋ مارتەبەسى ەجەلگى جىبەك جولىنىڭ بويىندا جاتقان قر مادەنيەت جانە سپورت مينيسترلىگى «ەسىك» مەملەكەتتىك تاريحي-مادەني قورىق-مۋزەيىنىڭ ەنشىسىنە بۇيىردى.

ەستەرىڭىزگە سالا كەتەيىك، بۇل شارانى الماتى قالاسىندا 2018 جىلدىڭ 1 ماۋسىمى كۇنى كورەيا رەسپۋبليكاسىنىڭ كەنسانبۋك-دو ايماعى ەكونوميكانى دامىتۋ ۇيىمىنىڭ ۇيىمداستىرۋىمەن وتەتىن «ۇلى جىبەك جولى جانە سولتۇستىك باعىتتاعى ارىپتەستىك» اتتى حالىقارالىق فورۋمنىڭ سالتاناتتى جالعاسى دەۋگە بولادى.

سالتاناتتى شاراعا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەديۇلى، كورەيا رەسپۋبليكاسىنىڭ كەنسانبۋك-دو ايماعىنىڭ گۋبەرناتورى كيم كۆان ەن، الماتى قالاسىنداعى كورەيا رەسپۋبليكاسىنىڭ باس كونسۋلى جون سىن مين، كەنسانبۋك-دو ايماعىنىڭ حالىقارالىق قاتىناستار ەلشىسى جو زۋڭ چول، وركەنيەتتەر الماسۋى ينستيتۋتىنىڭ ديرەكتورى زون سۋ يل، كەنبۋك ۋنيۆەرسيتەتىنىڭ پروفەسسورى پاك چون سۋ، كەنحي ۋنيۆەرسيتەتىنىڭ پروفەسسورى كان ينۋك، زۋنان ۋنيۆەرسيتەتىنىڭ وقىتۋشىسى زون ينپەن، كەمەن ۋنيۆەرسيتەتىنىڭ وقىتۋشىسى  سو زون سۋ جانە  سىرتقى ساياسات ينستيتۋتى قىزمەتكەرى مين زي ەن  شەتەلدىك دەلەگاتسيا وكىلدەرى قاتىستى.

قر مادەنيەت جانە سپورت ءمينيسترى ارىستانبەك مۇحامەديۇلى:

«ۇلى جىبەك جولى ادامزاتتىڭ ەكونوميكالىق تۇرعىدان عانا ەمەس، ەڭ باستىسى مادەني قارىم-قاتىناس تۇرعىسىنان دا ءبىر-بىرىمەن ارالاسۋىنا زور ىقپال جاسادى. حالىقارالىق ساۋدا جانە ديپلوماتيا جولى رەتىندە قىزمەت ەتكەن بۇل ساۋدا جولى سونداي-اق مادەنيەتتىڭ تارالۋىنا، وركەنيەتتىڭ دامۋىنا جانە قالالار مەن ەلدى مەكەندەردىڭ ورلەۋىنە ءتيىمدى ىقپال ەتىپ وتىرعان. ارينە وركەنيەتتەر مەن مادەنيەتتىڭ الماسۋلارىنا ءمان بەرگەن ۇلى جىبەك جولىنىڭ اسىرەسە قازاق جەرى ارقىلى وتكەن تارماقتارى ءبىزدىڭ قىزىعۋشىلىعىمىزدى تۋدىرادى. ويتكەنى اناعۇرلىم تىنىش ءارى قاۋىپسىز سانالعان بۇل تارماقتاعى ساۋدا جولى اسىرەسە تۇركى داۋىرىندە ەرەكشە سۇرانىسقا يە بولدى. بۇل الدىمەن تۇركى قاعاندارىنىڭ وسى ايماقتاردا جۇرگىزىپ وتىرعان ساياساتىنىڭ ناتيجەسىندە ورناعان تىنىشتىق پەن قاۋىپسىزدىك فاكتورى دەپ سانايمىز.

بۇگىنگى  ەستەلىك-بەلگى اشىلىپ وتىرعان «ەسىك» قورىق-مۋزەيىنىڭ اۋماعى دا ەجەلگى جىبەك جولى وتەتىن اۋماققا جاتادى. تەك «ەسىك» قورىق-مۋزەيىنىڭ عانا ەمەس جالپى قازاقستان رەسپۋبليكاسى مادەنيەت جانە سپورت مينيسترلىگىنە قاراستى كوپتەگەن قورىق-مۋزەيلەر ورنالاسقان اۋماقتار دا وسىناۋ ەجەلگى ۇلى ەكونوميكالىق، مادەني-رۋحاني ءھام ديپلوماتيالىق جولدىڭ بويىندا ورنالاسقان. سىزدەردى ەلىمىزدە تۇڭعىش رەت ىسكە اسقالى وتىرعان وسىنداي ايتۋلى شارانىڭ العاشقى كۋاگەرلەرىنىڭ ءبىرى بولۋعا شاقىرامىز».

كيم كۆان ەن، كورەيا رەسپۋبليكاسى، كەنسانبۋك-دو ايماعىنىڭ گۋبەرناتورى:

بۇگىن مەن ءۇشىن وتە ماڭىزدى كۇن. سەبەبى، وسىدان مىڭداعان جىلدار بۇرىن اتا-بابامىز نەگىزىن سالعان «جىبەك جولىن» بۇگىندە جاڭاشا جاڭعىرتۋ باقىتىنا يە بولىپ وتىرمىن. مەن ەڭ اۋەلى جىلى قوناقجايلىعى مەن قازاق مادەنيەتى تاريحىن جەكە ءوزى تۇسىندىرگەنى ءۇشىن قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەديۇلى مىرزاعا، وسىناۋ بايلانىستارعا ەرەكشە ەڭبەك سىڭىرگەن، «ەسىك» قورىق-مۋزەيىنىڭ ديرەكتورى گۇلميرا مۋحتاروۆاعا العىس ايتقىم كەلەدى.

بۇگىن وسىندا مەنىمەن قاتار كوپتەگەن پروفەسسورلار مەن عالىمدار كەلىپ وتىر.  ولاردىڭ كوبى كەشەگى وتكەن حالىقارالىق فورۋمعا قاتىستى جانە سول فورۋمدا كوپتەگەن پىكىر-تالاستار جاسادى. ارينە، عىلىمي تۇرعىدا ونداي بولۋى زاڭدىلىق.

مەن بۇگىندە قازاقستاندىق مادەنيەت سالاسىنىڭ اس اجىلدام قارقىنمەن دامىپ كەلە جاتقانىن كورىپ وتىرمىن جانە ول تۇرعىدا مادەنيەت جانە سپورت ءمينيسترى ارىستانبەك مۇحامەديۇلىنىڭ ەڭبەگى مەن اسەرى وتە زور دەپ بىلەمىن.

ءدال وسى جەردە سيللا پاتشالىعىنىڭ تاريحي-مادەني مۇرالارى مەن وسىنداعى تاريحي-مادەني مۇرالاردىڭ وتە قاتتى ۇقساس ەكەنىنە كوزىم جەتىپ وتىر. سوندىقتان دا مەن بۇگىن «التىن ادامنىڭ» ءبىر ءمۇسىنى مەن كوشىرمەسىن ارنايى تاپسىرىسپەن جاساتىپ سيللاعا اپارىپ قويامىن دەپ شەشتىم. كورەيا رەسپۋبليكاسىنىڭ جاڭا پرەزيدەنتى جاقىن ارادا «جاڭا سولتۇستىك ساياسات» اتتى جوبا ۇسىندى. وسى ارادا سولتۇستىك باعىت بويىنشا جۇمىس جاسايتىن كوميتەت باسشىلارى دا قاتىسىپ وتىر.

ياعني، ەكى ەل اراسىندا اسىرەسە، سيللا مەن ەسىك مادەنيەتتەرى اراسىندا بولاشاقتا بىرىگە وتىرىپ اتقاراتىن زەرتتەۋ جۇمىتارى كوپ دەپ بىلەمىن جانە اتاقارامىز دەپ سەنەمىن.

ءىس-شارا بارىسىندا قۇرمەتتى قوناقتار «ەسىك» قورىق-مۋزەيىنىڭ ەكسپوزيتسيا زالدارىمەن، «ەسىك» قورىق-مۋزەيى مەن وڭتۇستىك كورەيا عىلىمي مەكەمەلەرى اراسىنداعى قارىم-قاتىناستارعا ارنالعان فوتوكورمەمەن تانىستى. وعان قوسا جىبەك جولى بويىنداعى وسىنداي ەرەكشە بەلگىلەردىڭ ءمانى مەن ماڭىزى تۋرالى ەگجەي-تەگجەيلى باياندالىپ، كەمەنگ ۋنيۆەرسيتەتىنىڭ تاەكۆوندو كومانداسىنىڭ، «ارقايىم» ەتنو-فولك-توبى مەن «تورپي» كوركەمونەر توبى سىندى ەكى ەلدىڭ ۇلتتىق داستۇردەگى ءان-كۇي ونەرى وكىلدەرىنىڭ شەبەرلىگىن ءدۇيىم جۇرتقا پاش ەتتى.

Abai.kz