قر مەملەكەتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ پاراقورلاردى ۇستاۋعا سەپتەسكەن ادامعا "پارا بەرمەك". ياعني، اگەنتتىكتىڭ توراعاسى جەمقورلىق تۋرالى حابارلاعان قازاقستاندىقتارعا 730 $ كولەمىندە سىياقى بەرەتىنىن ايتقان. بۇل تۋرالى اگەنتتىكتىڭ توراعاسى Facebook الەۋمەتتىك جەلىسىندەگى پاراقشاسىندا جازدى.

«ءاربىرىمىز قازىرگى ۋاقىتتا دا، بولاشاقتا دا سىبايلاس جەمقورلىققا ورىن جوق دەپ ايتاتىن بولساق، ءاربىر قازاقستاندىق جەمقورلىقتى جەڭۋگە بولاتىنىنا سەنەتىن بولسا، ەلدەگى سىبايلاس جەمقورلىقتى جەڭۋ ابدەن مۇمكىن ەكەنىنە كوزىم جەتتى. ەڭ باستىسى، ءاربىر ازاماتتىڭ قازىردەن باستاپ وسىعان ۇمتىلۋى ماڭىزدى. دوستار، ەگەر ءسىز سىبايلاس جەمقورلىققا قاتىستى زاڭبۇزۋشىلىق ورىن الىپ جاتقانىنا كۋا بولساڭىز، ياعني پارا ۇسىنىلىپ نەمەسە بەرىلىپ جاتقانىن كورسەڭىز، بيۋدجەت قارجىسىنىڭ ۇرلانۋى جوسپارلانىپ جاتقانىن بىلسەڭىز، قىزمەتىن اسىرا پايدالانۋ ورىن الىپ جاتقانىنا كۋاگەر بولساڭىز دەرەۋ اگەنتتىككە حابارلاسىڭىزدار» ، - دەگەن شپەكباەۆ .

شپەكباەۆ بىردە-ءبىر قوڭىراۋ قاراۋسىز قالمايتىنىن، سىبايلاس جەمقورلىققا قاتىستى اقپاراتپەن بولىسكەن ازاماتتارعا قۇپيالىلىق پەن قۇقىقتىق قورعاۋعا كەپىلدەمە بەرىلەتىنىن دە مالىمدەدى. ەگەر اقپارات راستالعان جاعدايدا، اقپاراتپەن ءبولىسۋشى 240 مىڭ تەڭگەگە ($730) دەيىن سىياقى الا الادى.

ءشارىپحان قايسار

Abai.kz