ادام قۇقىقتارى جونىندەگى قازاقستاندىق بيۋرودا وتكەن ءباسپاسوز ءماسليحاتىندا ەرتاي سۇلتانبەكتىڭ تۋىستارى ونىڭ قىتايدا 25 مامىردا ۇستالعانىن، ودان بەرى حابار-وشارسىز ەكەنىن ايتادى. اعاسى جەڭىسبەك سۇلتانبەكتىڭ سوزىنشە، ەرتاي قامالعان كەزىندە قازاقستانداعى تۋىستارىنا "ەلباسىنان العىس حات العانىم ءۇشىن كىنəلىمىن بە" دەگەن مازمۇندا حابارلاما جىبەرگەن.
ءباسپاسوز جيىنىنا كەلگەن بەلسەندى سەرىكجان ءبىلəش "ەرتايدىڭ ۇستالۋىنىڭ تىكەلەي پرەزيدەنت نازارباەۆقا قاتىسى بار" دەگەن پىكىر ايتتى. ول ەرتاي سۇلتانبەكتىڭ اقىن، كومپوزيتور ءارى ۇستاز ەكەنىن، 2007 جىلى پرەزيدەنت نۇرسۇلتان نازارباەۆقا "نۇراعانىڭ مونولوگى" دەپ اتالاتىن پوەما ارناعانىن ايتتى. پوەمادان "ەگەمەن قازاقستان" گازەتىنە ءۇزىندى دە شىققان. پرەزيدەنت پوەما اۆتورىنا 2008 جىلى العىس حات جىبەرگەن.
جينالعاندار بۇل ءباسپاسوز كونفەرەنتسياسىن پرەزيدەنتتىڭ قىتايعا ساپارى كەزىندە əدەيى ۇيىمداستىرىپ وتىرعانىن جەتكىزدى. جەڭىسبەك سۇلتانبەك ءىنىسىنىڭ ەشقانداي دىنگە قاتىسى جوق ەكەنىن، قىتايدا قۇران كىتاپتاردى ورتەپ جاتقاندارىن، باۋىرىنىڭ ساياسي وقىتۋ ورتالىعىنان ءتىرى شىعاتىنىنا دا كۇمəنداناتىنىن جانە قاۋىپتەنەتىنىن ايتادى.
وتكەن ايدا قازاقستان سىرتقى ىستەر ءمينيسترى قايرات ءابدىراحمانوۆ قازاقستان ازاماتتىعىن العاننان كەيىن "قىتاي ازاماتتىعىنان شىعۋ زاڭدىلىعىن بۇزعان بولۋى ىقتيمال" دەگەن كۇدىكپەن قىتايدا ۇستالعان ەتنيكالىق قازاقتار تۋرالى جۋرناليستەر ساۋالىنا بەرگەن جاۋابىندا: "بىزدە ءدال قازىر 170-تەي ەتنيكالىق قازاق تۋرالى مالىمەت بار. ءاربىر ادام بويىنشا جۇمىس ىستەپ جاتىرمىز" دەپ ايتقان.
Abai.kz
