زەينەتاقى قورىنىڭ اقشاسى قىتاي كومپانيالارىنا قۇيىلعانى بەلگىلى بولدى، - دەپ حابارلايدى اباي-اقپارات كتك تەلەارناسىنىڭ جاڭالىقتار بولىمىنە سىلتەمە جاساي وتىرىپ.

جۇرتتىڭ كارىلىككە جيعان اقشاسى ەندى قىتاي مەن ءۇندىستاننىڭ كۆازيمەملەكەتتىك كومپانيالارىنا قۇيىلعان. بۇرىن اكتيۆتەردى ءتيىمسىز كاسىپورىندارعا اۋدارىپ، اۋرەگە تۇسكەن  قارجىگەرلەر بۇل جولى ينۆەستيتسيالار دەر كەزىندە، ءارى مول تابىسپەن قايتادى دەپ سەنىمدى. دەسە دە، بۇل جاعدايدىڭ قامسىز قارتتىقتى اڭسايتىن حالىقتى الاڭداتپاي قويمايتىنى بەلگىلى.

ماماندارعا سەنسەك، الاڭداۋعا ەش نەگىز جوق. تاۋەلسىز ەكونوميستەر دە زەينەتاقى قورىنداعى اقشانىڭ تەككە جاتپاي، تابىس اكەلگەنى دۇرىس دەيدى. بىراق، ءازىربايجان بانكىنەن قايتۋى باس قايعىعا اينالعان 71 ميلليارد تەڭگەنىڭ كوپتىڭ كوڭىلىنە كۇدىك ۇيالاتىپ قويعانى بار.

جالپى جيناقتاردى ينۆەستيتسيالاۋ ۇلتتىق بانكتىڭ قۇزىرىنداعى ماسەلە. سول باس بانك ەشتەڭەگە قاراماستان، وتكەن جىلى زەينەتاقى اكتيۆتەرىن پولشا مەن برازيليا، مەكسيكا، يندونەزيا سىندى دامۋشى ەلدەر ۇكىمەتىنىڭ باعالى قاعازدارىنا سالا باستاعان ەدى. مىنە، وسى ستراتەگيانىڭ جالعاسى رەتىندە ۇلتتىق بانك وتكەن ايدا ءۇندىستان مەن قىتايدىڭ كۆازيمەملەكەتتىك سەكتورىنا دا قاراجات اۋدارعان. باقانداي 30 ميلليارد تەڭگە. سوزدەرىنە سەنسەك، قازاقستاندىقتاردىڭ اقشاسى تەك كرەديتتىك رەيتينگى جوعارى كومپانيالارعا قۇيىلىپتى.

قادىرجان زابيح، «بجزق» اق قوعاممەن بايلانىس دەپارتامەنتىنىڭ ديرەكتورى:

- ينۆەستيتسيالار وتە قۇندى، ەكونوميكالىق رەسۋرستارى باي ەلدەرگە سالىنادى.  بۇل ينۆەستيتسيالار سول ەلدەردىڭ ۇكىمەتتەرى تاراپىنان باقىلانىپ، قارالىپ وتىرادى. مۇنىڭ ءبارى ولاردىڭ نەسيەلىك تاۋەكەلدىلىگىن تومەندەتەدى.

قىرۋار  قاراجات شەت مەملەكەتتەرگە بۇدان ءارى دە ينۆەستيتسيالانا بەرمەك.

Abai.kz