قازاقستاندىق ماماندار ءتورت جىل بويى ماتەريالدىق ەمەس مادەني مۇرانى قورعاۋ جونىندەگى ۇكىمەتارالىق كوميتەتتىڭ جۇمىسىنا قاتىساتىن بولادى، - دەپ حابارلايدى اباي-اقپارات.

يۋنەسكو-نىڭ وسى ماڭىزدى ورگانىنا سايلاۋ ماتەريالدىق ەمەس مادەني مۇرانى (مەمم) قورعاۋ جونىندەگى كونۆەنتسياعا تاراپ مەملەكەتتەر باس اسسامبلەياسىنىڭ 4-6 ماۋسىم ارالىعىندا پاريجدە وتكەن 7-ءشى سەسسياسى شەڭبەرىندە ءوتتى.

سەسسياعا قاتىسقان 156 مەملەكەتتىڭ 98-ءى قازاقستان كانديداتۋراسىنا داۋىس بەردى. ەلىمىزدى قولداعان كوپتەگەن دەلەگاتتار قازاق حالقىنىڭ باي مادەنيەتى مەن داستۇرلەرىن ناسيحاتتاۋ ءۇشىن ەڭبەك ەتىپ جۇرگەن قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسيا ماماندارىنىڭ كاسىبي قاسيەتتەرىن جانە مەملەكەتىمىزدىڭ جوعارى حالىقارالىق بەدەلىن اتاپ ءوتتى.

سايلاۋ قورىتىندىسىمەن قازاقستاننىڭ يۋنەسكو جانىنداعى تۇراقتى وكىلدىگى باس اسسامبلەياعا قاتىسۋشىلارعا بىلدىرگەن سەنىمدەرى ءۇشىن ريزاشىلىق ءبىلدىرىپ، ۇلتىمىزدىڭ مادەني مۇراسىن بۇكىل الەمگە تانىتۋ جۇمىستارى ەلباسى نۇرسۇلتان نازارباەۆتىڭ «رۋحاني جاڭعىرۋ» ستراتەگياسىنىڭ ماڭىزدى مىندەتتەرىنىڭ ءبىرى بولىپ تابىلاتىنىنا ەرەكشە توقتادى. سونىمەن بىرگە، مەمم قورعاۋ كوميتەتىندەگى وتاندىق مامانداردىڭ قىزمەتى ولاردىڭ كاسىبي قابىلەتتىلىكتەرىن نىعايتىپ، دۇنيە جۇزىندە مادەني مۇرانى قورعاۋدىڭ تەورياسىنا جانە پراكتيكاسىنا ءوز ۇلەسىن قوسۋلارىنا مۇمكىندىك بەرەدى.

مەمم ۇعىمى اۋىزەكى داستۇرلەر جانە مادەنيەتتى تانىتۋدىڭ باسقا فورمالارىن، ورىنداۋشى ونەرلەر، ادەت-عۇرىپتار مەن مەرەكەلەر، تابيعات جانە عالام تۋرالى نانىمدار، ءداستۇرلى قولونەرگە قاتىستى داعدىلاردى قامتيدى. ال مۇرانى قورعاۋ ءبىرنىشى كەزەكتە ونى انىقتاۋ، قايتا جانداندىرۋ، سيپاتتاۋ، زەرتتەۋ، ناسيحاتتاۋ جانە كەلەسى ۇرپاققا جەتكىزۋ ءۇشىن جاعداي جاساۋدى قوسا الا ونىڭ جالپى ومىرشەڭدىگىن قامتاماسىز ەتۋ ماقساتىن بىلدىرەدى. مەمم قورعاۋ جونىندە كونۆەنتسيا 2003 جىلى قابىلدانىپ، وسى كۇنگە دەيىن 178 مەملەكەتپەن راتيفيكاتسيالاندى. كونۆەنتسيا ماقساتتارىن 24 مەملەكەتتەن تۇراتىن مەمم قورعاۋ جونىندەگى كوميتەت جۇزەگە اسىرادى. ءوزىنىڭ جىل سايىنعى باسقوسۋلارىندا ول وسى سالاداعى حالىقارالىق جانە ۇلتتىق دەڭگەيدەگى ءىس-شارالاردىڭ تيىمدىلىگىن قاراستىرادى.

كونۆەنتسيانىڭ نەگىزگى قۇرالدارىنىڭ ءبىرى بولىپ مەمم بويىنشا رەپرەزەنتاتيۆتى ءتىزىم تابىلادى. بۇگىندە قازاقستاننىڭ يۋنەسكو جانە يسەسكو ىستەرى جونىندەگى ۇلتتىق كوميسسيانىڭ جانىندا قۇرىلعان مەمم قورعاۋ جونىندەگى ۇلتتىق كوميتەت ماماندارىنىڭ كۇشىمەن تىزىمگە 8 قازاقستاندىق ءوتىنىم ەنگىزىلدى. ولاردىڭ اراسىندا - دومبىرامەن كۇي تارتۋ، قازاقشا كۇرەس، اسىق اتۋ، ايتىس، كيىز ءۇي قۇرۋ، ناۋرىزدى مەرەكەلەۋ داستۇرلەرى، سايات قۇستارىمەن اڭ اۋلاۋ جانە جۇقا نان (قاتىرما / لاۆاش / يۋپكا / يۋفكا) ءپىسىرۋ ونەرلەرى بار. تاعى دا بەس ءوتىنىم قاراستىرىلۋىن كۇتۋدە.

وسى سالادا جۇيەلى نەگىزدە اتقارىلىپ جاتقان جۇمىستار ءتول مادەنيەتىمىز ارقىلى ەلىمىزدىڭ الەمگە تانىلۋىنا جانە شەتەلدىك تۋريستەردى تارتۋعا جول اشادى.

Abai.kz