قازىر بىزدە سپورت سالاسىنداعى جەتىستىك ەل دامۋىنىڭ ەرەكشە بەلگىلەرىنىڭ ءبىرى سانالادى. نەگە ەكەنىن قايدام، ءبىزدىڭ ءار جەڭىسىمىز مەملەكەتتىڭ دامۋىنىڭ، ساياسات كەمەلدىگىنىڭ كورىنىسى رەتىندە ناسيحاتتالادى. ءبىز حالىقتىڭ رۋحاني اشتىقتىڭ ورنىن الەمدىك ارەنالاردا جەڭىپ العان جۇلدەلەرمەن تولتىرىپ، ۇلت ابىرويىن سپورتشىلار ارقىلى اسقاقتاتۋدى كوزدەيتىن ەلمىز. 

راس، حالىقارالىق باسەكەلەردەن بايگە الاتىن سپورتشىنى دايىنداپ شىعۋ وڭاي شارۋا ەمەس. بۇل جەردە سپورتتىڭ ءار سالاسىن باسقارىپ وتىرعان فەدەراتسيالاردىڭ اتقارار ءرولى دە ەرەكشە. سپورتشىنىڭ تالانتىن تانىپ تاربيەلەيتىن دە، توماعاسىن تارتىپ تۋرنيرلەرگە قاتىستىراتىن دا سولار.

ءجۇز جۇيرىكتىڭ اراسىنان شىن تۇلپاردى تانىپ، ۇلتتىق قۇرامانى كىل مىقتىلاردان جاساقتاۋ ءۇشىن كاسىبي بىلىكتىلىك كەرەك. سول ءۇشىن سپورتتىڭ كەز-كەلگەن ءتۇرىن سول سالانىڭ مامانى باسقارعانى وڭ ەمەس پە؟ الايدا، ءبىزدىڭ ەلدە ءبارى باسقاشا. سپورت فەدەراتسيالارىن اكىم-قارالار مەن مينيستر-ميلليونەرلەر باسقارىپ وتىر.

ءسوزىمىز دالەلدى بولۋ ءۇشىن اتتارىن اتاپ، تۇستەرىن تۇستەيىك.

قر فۋتبول فەدەراتسياسىنىڭ پرەزيدەنتى قازاقستان رەسپۋبليكاسى پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ.

جاقسىبەكوۆ پەن فۋتبولدىڭ اراسىندا قانداي بايلانىس بار؟ ايتىڭىزشى. ونىڭ ەلىمىزدەگى ىرگەلى بانكتىڭ ءبىرىن ۋىسىندا ۇستاپ وتىرعانى از با؟ ەلباسىنىڭ سەنىمدى سەرىگى بولۋدىڭ ءوزى جاقسىبەكوۆ ءۇشىن جەتپەي مە؟ فۋتبول فەدەراتسياسىن ناق مامانعا باسقارتۋعا نە كەدەرگى؟ ءومىرى دۇرىس دوپ تەبە المايتىن اياقدوپشىلارىمىز جاقسىبەكوۆكە قانداي ابىروي اپەرەدى؟

قر جەڭىل اتلەتيكا فەدەراتسياسىنىڭ پرەزيدەنتى شىعىس قازاقستان وبلىسىنىڭ اكىمى دانيال احمەتوۆ.

احمەتوۆ جەڭىل اتلەتيكامەن اينالىسقان ادام با؟ جوق، ارينە! ءبىر كەزدەرى ۇكىمەت باسقارىپ، باسى داۋعا شاتىلىپ، بىرەر جىل ەل نازارىنان تىس كەتكەن ساياسي تۇلعا وسى فەدەراتسيانى باسقاراتىنىن ءوزى بىلە مە ەكەن؟ بىلسە، ءبىر وبلىستىڭ قىرۋار شارۋاسىنان قولى بوسامايتىن ادام ول جۇمىسىن قالاي اتقارىپ ءجۇر؟ سۇراق بار، جاۋاپ جوق.

ال تيمۋر قۇلىباەۆ ءبىر ءوزى قر وليمپيادا كوميتەتىنىڭ، قر بوكس فەدەراتسياسىنىڭ، قر سۋ سپورتى تۇرلەرى فەدەراتسياسىنىڭ پرەزيدەنتى. تاكەڭە وسىنىڭ ءبارى ارتىق جۇك ەمەس پە؟ ءبىر سپورت بولسا جارايدى، بىرنەشە فەدەراتسيانىڭ تىزگىنى و كىسىگە نەگە كەرەك؟ وسى سالانىڭ جىلىگىن شاعىپ، مايىن ىشكەن ماماندار جوق پا؟

بۇلاردان بولەك، قر اۋىر اتلەتيكا فەدەراتسياسىن باسقارىپ وتىرعان جانات تۇسىپبەكوۆ، قر كۇرەس فەدەراتسياسىنىڭ باسشىسى ساۋات مىڭباەۆ مىرزالاردىڭ دا سپورتقا قاراعاندا بيلىك پەن بيزنەسكە جاقىن ەكەنىن جۇرتشىلىق جاقسى بىلەدى.

وسىعان قاراپ بۇرىنعى قازاقتىڭ «شىمشىق سويسا دا قاساپشى سويسىن» دەگەن ءسوزى بۇگىنگى قازاقتار ءۇشىن قۇنىن جويعانىن بايقايسىز. جەر كولەمى جاعىنان ەلىمىز بويىنشا ءۇشىنشى ورىندا تۇرعان شىعىس قازاقستان وبلىسىن باسقارىپ وتىرعان دانيال كەنجەتايۇلى مەن پرەزيدەنت اكىمشىلىگىنىڭ باسشىسى ادىلبەك رىسكەلدىۇلىنىڭ «جاپاكەشتىگىنە» تاڭعالماۋعا امالىمىز جوق. بۇل ەكى كىسىدەن بولەك، جوعاردا ءبىز ءسوز ەتكەن فەدەراتسيا پرەزيدەنتتەرىنىڭ قاي-قايسىسى دا قوس قولىن قالتاسىنا سالىپ بوس جۇرگەن جاندار ەمەس. مەملەكەتتىك ماڭىزى بار ءىرى قىزمەتتەردە وتىرعان كىسىلەر.

ءبىز ءۇشىن سپورت فەدەراتسيالارىن كىم باسقارعانى ماڭىزدى ەمەس. ماڭىزدىسى ەل سەنگەن باسشىنىڭ ەل سپورتى ءۇشىن ىستەگەن جۇمىسى بولماق. ەندەشە، سپورتقا ءۇش قايناسا سورپاسى قوسىلمايتىن وسى باسشىلار ءوزى باسقارىپ وتىرعان فەدەراتسيانىڭ دامۋى ءۇشىن ۇلەس قوسا الما ما؟ مىسال ءۇشىن ايتايىق، ءومىرى جۇمساق كرەسلودا وتىرىپ كەلە جاتقان دانيال احمەتوۆتى جەڭىل اتلەتيكا سالاسى ءۇشىن تاپتىرماس تۇلعا دەۋ قيىن. سول سەكىلدى ادىلبەك جاقسىبەكوۆتىڭ دا العان ءبىلىمى مەن ەڭبەك جولى فۋتبولعا مۇلدە قاتىسسىز.

ءدال وسى ايۋعا قوي باقتىراتىن قىلىعىمىز قازاق سپورتىنىڭ دامۋىنا تۇساۋ بولىپ كەلەدى. باسىنان داۋى ارىلمايتىن فۋتبول فەدەراتسياسىنا وسىدان بەس جىل بۇرىن ەرلان قوجاعاپانوۆ دەگەن باسشى كەلدى. ەكونوميست، قارجىگەر، زاڭگەر ماماندىقتارىنا يە، ەڭبەك جولىندا ەشقاشان سپورتقا قاتىستى قىزمەت اتقارماعان ادام. قازاق فۋتبولىنىڭ قوس تىزگىنىن قوجاعاپانوۆ قولعا العان ءۇش جىلدا ەل فۋتبولى داۋ-داماي مەن ءوزارا كەلىسپەۋشىلكتەردەن كوز اشپادى.

ءبارىمىز بىلەتىندەي، 2016 جىلى ەلىمىزدە ۇلكەن جەر داۋى ورىن الدى. قازاق جۇرتى جەردىڭ شەتەلدىكتەرگە جالعا بەرىلمەۋىن اشىق تالاپ ەتتى. سونىمەن قاتار، قازاق جەرىنە كوز قىزارتقان قىتاي ەلىنە كوپشىلىكتىڭ وشپەندىلىگى ەرەكشە بولاتىن.

وسى كەزدە قىسپاقتا قالعان قازاق بيلىگىنە كومەكتەسىپ، قىتايمەن «دوستىقتى» بەينەلەۋ ءۇشىن ەرلان قوجاعاپانوۆ باستاعان فۋتبول فەدەراتسياسى قيىننان قيىستىرىپ قىتاي قۇراماسىمەن جولداستىق كەزدەسۋ ۇيىمداستىردى. بۇلاي دەيتىنىمىز، حالىقارالىق جولداستىق كەزدەسۋ وتكىزەتىن ارنايى ۋاقىت بولادى. ال FIFA كۇنتىزبەسىندە بەلگىلەنبەگەن ۋاقىتتا جولداستىق ماتچ وتكىزۋدىڭ ەش ءجونى جوق.

ال بۇعان قاراعان قازاقستان فۋتبول فەدەراتسياسى جوق. ەشكىمنىڭ قارسىلىعىنا قاراماي دەگەنىن جاسادى. بۇل شەشىمدى قولداماعان «فۋتبولدىڭ مامانى بولعانىمەن، ساياساتتان حابارى جوق» كاسىپقوي فۋتبول ليگاسىنىڭ باسشىسى ولجاس ابراەۆ قىزمەتىنەن قۋىلدى. مەزگىلسىز بەلگىلەنگەن جولداستىق كەزدەسۋ ءۇشىن پرەمەر ليگا ويىندارى وڭدى-سولدى جىلجىتىلىپ، چەمپيونات كۇنتىزبەسىندە كوپتەگەن وزگەرىستەر ورىن العانى سپورت جانكۇيەرلەرىن قاتتى قىنجىلتقان بولاتىن.

ودان دا جامانى، 7 ماۋسىم كۇنى قىتايدا وتكەن جولداستىق كەزدەسۋدە قازاقستان قۇراماسىنىڭ بەلدى ويىنشىسى ۇلان قونىسباەۆ اۋىر جاراقات الدى. تالانتتى فۋتبولشى سودان ەكى جىل بويى جاسىل الاڭعا شىعا العان جوق. ۇلاننىڭ جاراقاتى قازاق فۋتبولى ءۇشىن اۋىر جوعالتۋ بولعانىن جانكۇيەر قاۋىم جاقسى بىلەدى.

باستا ايتقانىمىزداي سپورتتاعى جەتىستىك سپورتشىنىڭ تالانتى مەن تالابىنىڭ ارقاسىندا عانا كەلمەيدى، وعان الاڭ سىرتىنداعى باپكەرلەر قوسىنى، باسشىلىق القاسى، قولداۋشىلار قولپاشى - ءبارى دە اۋاداي قاجەت. الايدا قازاق سپورتىنىڭ ەكى تىزگىن ءبىر شىلبىرىن قولعا العان قازىرگى باسشىلار قوسىنى كوز قۋانتپايدى. بىزشە، سپورت فەدەراتسيالارىن ءار سالانىڭ ءوز مامانى باسقارسا وڭ بولار ەدى. كاسىپتىك مامان ءوز ءىسىن جاقسى بىلەدى. بۇعان قوسا، ءوزىنىڭ سۇيىكتى كاسىبىنە جاناشىرلىق تانىتاتىنى تاعى بار.

قۋانىش قاپپاس

Abai.kz