تاقىرىبىمىزدىڭ وسىلايشا اتالۋ سەبەبى بار. ويتكەنى، بۇگىنگى اڭگمەمىز كەشە عانا مەكتەپتى اياقتاپ شىققان جاس تۇلەك جايلى بولماق. 

جاقىندا قر ۇقك شەكارا قىزمەتى اكادەمياسىنىڭ قارا وي ەلدى مەكەنىندە ورنالاسقان دالالىق وقۋدى قامتاماسىز ەتۋ باسقارماسىندا 260-تان استام جاس كۋرسانتتارعا  ارنالعان كورسەتىلىم ساباعى ءوتتى.

ءبىرىنشى كەزەكتە ارنايى ماشىقتاندىرىلعان قىزمەت اتتارىمەن مەملەكەتتىك شەكارا بەلدەۋلەرىن كۇزەتۋ كەزىندەگى بىلۋگە قاجەتتى قوزعالىس تۇرلەرىن كورسەتتى. ولاردىڭ نازارلارىنا ات ۇستىندەگى جەلىس، باياۋ شابىس، سونداي-اق سولعا جانە وڭعا قوزعالىستارى كورسەتىلدى.

ودان ءارى ءتورت اتتىلىنىڭ بىرىككەن قوزعالىسى كەزىندەگى ءتۇرلى ادىستەرىمەن قاتار باعىتتارىن وزگەرتۋ، دياگونال بويىمەن شاۋىپ وڭعا، سولعا بۇرىلۋ مەن ارتقا اينالىپ، كەرى ءجۇرۋ ادىستەرى دە كوپشىلىك نازارىنا ۇسىنىلدى.

سونىمەن قاتار، اتتىلى شەكاراشىنىڭ ءتۇرلى بيىكتىكتەگى توسقاۋىلداردى شاۋىپ كەلە جاتقان بويدا سەكىرۋ ارقىلى الىستاتۋ تاسىلدەرى مەن ات ۇستىندە ساپتىق پارمەندەردى ورىنداۋ امالدارىن دا كورەرمەندەر جاقىننان تاماشالادى.

ءارى قاراي، ۇقك شەكارا قىزمەتى كينولوگيالىق ورتالىعىنىڭ ماماندارى ءتۇرلى باعىتتا ۇيرەتىلگەن قىزمەت يتتەرىن پايدالانۋدىڭ امال-تاسىلدەرىن شەبەرلىكپەن كورسەتتى. ورتاعا مەملەكەتتىك شەكارا كۇزەتىندەگى شەكارا ساقشىلارى ءۇشىن قىزمەتتى ساپالى ۇيىمداستىرۋعا كوبىنە پايدالانىلاتىن نەمىس وۆچاركاسى، بەلگيالىق وۆچاركا،  ورىستىڭ اڭشىلىق ءيتى جانە شىعىس-ەۋروپالىق وۆچاركاسى شىعارىلدى. قىزمەت يتتەرىنىڭ تۇقىمدارىنا قاراي ءتۇرلى باعىتتا پايدالاناتىندىعىن تۇسىندىرە كەلىپ، ولاردىڭ جاۋىنگەرلىك تاپسىرمالاردى ورىنداۋىن ءىس جۇزىندە كورسەتتى. ادامنىڭ ءتىلىن قالتقىسىز «تۇسىنەتىن» وۆچاركالار يەسىنىڭ بىرنەشە مەتر قاشىقتىقتا تۇرىپ، بەرگەن پارمەندەرىن بۇلجىتپاي ورىنداپ، كورەرمەندەردى ءتانتى ەتتى. بەرىلگەن بۇيرىقتى قالت جىبەرمەي ورىنداۋعا ماشىقتاندىرىلعان شەكاراشى يتتەر قول جۇكتەرىنە جاسىرىلعان ەسىرتكى زاتتارىن انىقتاۋدا جانە كولىكتەردەگى جارىلعىش زاتتاردى تابۋدا مۇدىرگەن جوق.

سودان كەيىن ورتاعا پاتريوتتىق رۋحقا تولى جىگەرلى ءاننىڭ ۇنىمەن «بوران» دەسانتتىق-شابۋىلداۋشى توبىنىڭ جەكە قۇرامى شىقتى. كورسەتىلىم الاڭى قارۋدىڭ داۋسىمەن ءدۇرسىل قاعىپ، جەر بەتىن ءتۇتىن جاپتى. ورتاعا شىققان ارنايى جاساقتىڭ جەكە قۇرامى شەكاراشى كۋرسانتتارعا  مەملەكەتتىك شەكارانى بۇزۋشىمەن بەتپە-بەت كەزدەسكەن جاعدايداعى قارۋمەن جانە قارۋسىز قاقتىعىسقا ءتۇسۋ تاسىلدەرىن كورسەتتى. سونىمەن قاتار، لاڭكەستەردى قۇرىقتاۋ كەزىندەگى سۋىق قارۋدى قولدانۋ مەن قويان-قولتىق ۇرىستى پايدالانۋدىڭ امالدارىن شەبەر ورىنداپ شىقتى.

كورسەتىلىم ساباعىنان كەيىن سونى اسەرگە بولەنگەن كۋرسانتتاردىڭ جانارلارىنان ۇشقىن كوردىك. مۇنى ءبىز بولاشاق شەكاراشى وفيتسەرلەردىڭ قاتارىن كوبەيتۋگە ءوز ەركىمەن نيەت ءبىلدىرىپ تاڭداعان ماماندىقتارى ءۇشىن ەش وكىنبەيتىندىكتەرىنىڭ بەلگىسى دەپ تۇسىندىك.

اپپاق ارماندارىن ارقالاپ، كيەلى قر ۇقك شەكارا قىزمەتى اكادەمياسىنا وقۋعا ءتۇسىپ، ودان ءارى  شەكاراشى ماماندىعىنىڭ قىر-سىرىن مەڭگەرەمىن، وقيمىن كانىگى كاسىبي شەكاراشى وفيتسەر اتانامىن دەپ تىلەك ءبىلدىرىپ كەلگەن بارلىق شەكاراشىلارعا اق جول تىلەيمىز. شەكاراشى وفيتسەر دەگەن قاسيەتتى اتاققا تەك قانا جىگىتتىڭ جىگىتى عانا قولى جەتكىزەتىنىن بىلەمىز. سوندىقتان دا، بۇگىنگى جولى بولىپ شەكاراشى كيىمىن كيگەن كۋرسانتتار وقۋ بارىسىندا قايراتتىلىق تانىتىپ، اسكەري سالانىڭ قيىنشىلىعىنا مويىماي وزىنە جۇكتەلگەن جاۋاپتى مىندەتتى ابىرويلى اتقارسا بولعانى.

بەكنۇر اسىلحانوۆ، جاس كۋرسانت:

-بالا كەزىمنەن اسكەري قىزمەتشى بولۋدى ارماندادىم. مەكتەپ قابىرعاسىندا العاشقى اسكەري دايىندىق پانىنە ەرەكشە كوڭىل بولەتىنمىن. سونداعى ويىم اسكەري ساباقتى جاقسى مەڭگەرىپ السام ءبىر كادەمە جارار دەگەنىم عوي. مىنە،قر ۇقك شەكارا قىزمەتى اكادەمياسىنا وقۋعا تاپسىرۋ ءۇشىن وسىندا كەلدىم. الايدا، شەكاراشى اتانۋ مەن ءۇشىن وڭاي بولمادى. نورماتيۆتەردى ويداعىداي تاپسىرۋ ءۇشىن بارىمدى سالدىم. اينالاما قاراسام ءوزىم سياقتى قازاقتىڭ قارا دومالاق بالالارى، بۇلاردان قاي جەرىم كەم دەگەندەي نامىسقا تىرىسىپ باقتىم. ونىڭ ۇستىنە، ۇلتتىق بىرىڭعاي تەستتەن جوعارى بال جيناعان ەدىم. جامان بولعان جوق. ناتيجەسىندە اكادەميا كۋرسانتى اتاندىم. 

مۇندا اسىرەسە ماعان ۇناعانى تاۋعا ورمەلەۋ ءۇشىن جاسالعان قۇرىلعىلار. ونى قالاي پايدالانۋ كەرەك ەكەنىن تۋرالى الداعى ۋاقىتتا ساباق وتكىزىلەدى ەكەن. سونىمەن قاتار، قىزمەت بارىسىندا پايدالانىلاتىن بايلانىس قۇرىلعىلار دا مەنىڭ كوڭىلىمنەن شىقتى. ولارمەن جۇمىس جاساۋ ماعان بالا كەزىمنەن ۇنايتىن. قىسقاسى بۇگىنگى كورسەتىلىم ساباعىنان تاماشا اسەر الدىم. ماماندىعىم شەكاراشى وفيتسەر بولعاننان سوڭ شەكاراشىلاردىڭ اسكەري قىزمەتتى ۇيىمداستىرۋىنان تولىقتاي حاباردار بولۋىم كەرەك.    

ەربوسىن ديحانباي، جاس كۋرسانت:

-مەن الماتى وبلىسى رايىمبەك اۋدانى تەكەس اۋىلىندا تۋىلدىم. وزدەرىڭىز بىلەسىزدەر، ءبىز جاقتا قازاق-قىتاي شەكاراسى ورنالاسقاندىقتان مەن تۋىپ وسكەن ءوڭىر شەكارالىق ايماق بولىپ سانالادى. سوندىقتان بولار جوعارى سىنىپتا وقىپ جۇرگەنىمدە اۋىلداعى مەكتەبىمىزگە شەكاراشىلار كەلىپ قر ۇقك شەكارا قىزمەتى اكادەمياسىنا وقۋعا ءتۇسۋ جونىندە ۇگىت-ناسيحات جۇرگىزدى. سودان كەيىن، ينتەرنەت كوزدەرىنەن اتالمىش وقۋ ورنى تۋرالى قاراپ، ىزدەي باستادىم. يۋتۋب جەلىسىنەن كورگەن اتالمىش وقۋ ورداسى جايلى بەينەبايانداعى اسكەري وقۋ مەن اسكەري ءتارتىپ تۋرالى مالىمەت ماعان ەرەكشە وڭ اسەرىن قالدىردى. سودان كەيىن، ىشتەي شەكاراشى وفيتسەر بولۋعا بەل بۋدىم. كوپ تىلەۋى كول دەگەندەي، جولىپ بولىپ وقۋعا ءتۇسىپ، شەكارا قىزمەتى اكادەمياسىنىڭ كۋرسانتى اتاندىم.  ال بۇگىنگى كورسەتىلىم ساباعىنان ويىما تۇيگەنىم كوپ بولدى. ات قۇلاعىندا ويناۋ، يتپەن جۇمىس جاساۋ، شەكارا بۇزۋشىسىن قۇرىقتاۋداعى امال-تاسىلدەردى ءبىلۋ – شەكاراشىلاردىڭ مىندەتى دەپ تۇسىنەمىن. سوندىقتان، اسكەري قىزمەتتە كەزدەسەتىن بارلىق قيىندىقتارعا ءازىرمىن دەپ تولىقتاي ايتا الامىن.

جانات جابىربەكوۆ،

قرۇقك شەكارا قىزمەتى اكادەمياسىنىڭ

ءباسپاسوز حاتشىسى

Abai.kz