رەداكتسيامىزعا الماتى وبلىسى، كەگەن اۋدانى، قارقارا اۋىلىنان قانات ەسىمدى ازامات حابارلاستى. ايتۋىنشا، مالىك مەيىرمانوۆ ەسىمدى جەكە كاسىپكەر قاراماعىنداعى مالشىلارعا ءۇش جىلدان بەرى جالاقىسىن بەرمەگەن. ءتىپتى، كەيبىر ولگەن مالدارىن سولاردىڭ موينىنا ءىلىپ، ۇرىپ-سوعاتىن كورىنەدى.

قانات، (جەكە باس قاۋىپسىزدىگى  ءۇشىن اتى-ءجونىن جاسىرا تۇرۋدى ءوتىندى، بىزدە ونىڭ داۋىس جازباسى مەن شىن اتى-ءجونى بار):

- قارقارادا ادامداردى قۇلدىقتا ۇستايتىن  مالىك مەيىرمانوۆ نەگىزىنەن شونجىنىڭ ادامى. بۇرىن قارجى پوليتسياسىندا قىزمەت ەتكەن. قازىر - وتستاۆكادا. جەكە كاسىپكەرلىكپەن اينالىسادى. جايلاۋى - قارقارادا، قىستاۋى - شونجىدا.

2015 جىلى مەيىرمانوۆتىڭ قاراماعىندا ىستەپ، بەس جىل بويى جالاقىسىن الماعان مالشىلار تۋرالى جاس الاش گازەتى  “قارقارا  قۋعىندارى”  دەگەن اتپەن ماقالا جاريالاپتى. ول كەزدە دە مالشىلاردى ۇرىپ، جالا جاۋىپ، كۇن كورسەتپەگەن سوڭ، ولار قاشىپ كەتكەن. بىراق، مەيىرمانوۆ “ول مالشىلار مەنىڭ مالىمدى ۇرلادى” دەپ ۇستەرىنەن ارىز جازىپ، مالشىلاردى وزىنە قايتارىپ العان ەكەن. بىراق، سول مالشىلاردىڭ قازىر قايدا ەكەنىن ەشكىم دە بىلمەيدى. ياعني، ءىز-ءتۇزسىز جوعالتىپ جىبەرگەن.

 بۇل سودان ءۇش جىلدان كەيىن بولىپ جاتقان اڭگىمە عوي.

ءمادي مۇحامەدقاليەۆ  دەگەن جىگىت ءۇش جىلدان بەرى جالاقىسىن الماعان. نەگىزى ول ءۇش ايعا ساقمانعا دەپ قانا بارعان ەكەن. سوسىن وعان 50 مىڭ تەڭگە جانە  بىر قوي بەرەم، جايلاۋعا شىق دەپ وتىنگەن. سودان  باستاپ جىبەرمەي، قۇلدىقتا ۇستاپ كەلە جاتىر. مىنە، ءۇشىنشى جىلعا كەتتى. ولگەن مالدى دا، جوعالعان مالدى دا ءماديدىڭ  موينىنا ءىلىپ، ەشقانداي جالاقى دا تولەمەيدى. قىسقاسى قۇل بوپ ءجۇر.

ەكىنشىسى، گروس لەۆ اندرەەۆيچ دەگەن ازامات. بۇل كىسىگە جەتى اي جالاقىسىن بەرمەگەن سوڭ، ءبىر رەت قاشىپ كەتكەن. بىراق  “مەن ساعان زارپلاتىڭدى بەرەمىن، ەگەر قايتپاساڭ، مالىم جوعالدى دەپ ۇستىڭنەن ارىز ءتۇسىرىپ، سوتتاتامىن” دەپ قورقىتقان. ءسويتىپ ول امالسىزدان قايتىپ كەلگەن. بىراق، كەلگەلى بەرى تاعى دا جالاقىسىن الا الماي، تەگىن جۇمىس ىستەپ ءجۇر.

بۇلار بىلايشا ايتقاندا، قۇلدىقتا ءجۇر عوي. ەندى وسى ەكى ازامات كومەك سۇراپ وتىر.

مەن بۇل ماسەلەنى پروكۋراتۋراعا دا، رۋۆد عا دا اپارىپ بەرە الامىن. بىراق، قۇزىەرتتى ورگاندار قىلمىستىق ءىس قوزعامايتىنىن بىلەمىن. قازىرگى جۇيە سونداي. سوندىقتان جۋرناليستەرگە شىعىپ وتىرمىن.

قاناتتىڭ ايتۋىنشا، قۇلدىقتا جۇرگەن ءمادي مۇحامەدقاليەۆ 1981 جىلى تۋعان. وسكەمەندە وتباسى بار، بىراق مۇلدەم حابارلاسۋعا مۇمكىندىگى جوق.

ەكىنشى "قۇل" لەۆ اندرەەۆيچتىڭ دە وتباسى بار. اكەسى مالىك مەيىرمانوۆپەن سويلەسىپ تۇرادى ەكەن. بىراق، مەيىرمانوۆ “ول ءوزى كەتپەي ءجۇر” دەپ اكەسىن الدايتىن كورىنەدى.

بىراق، قازىر ەكەۋىندە دە تەلەفون جوق. ەشكىممەن بايلانىستىرمايدى.

ايتپاقشى، ءبىر-ەكى جىل بۇرىن ءمادي باسىنداعى جاعدايدى ايتىپ شونجىنىڭ ءاىىب-نە شاعىمدانىپتى. بىراق، سول جەردە ءبىراز ءىس قارالعانىمەن، ەشقانداي ناتيجە بولماعان.

ال، وسى ماسەلەنى كوتەرگەنى ءۇشىن ازاماتتىڭ وزىنە دە قىسىم جاسالعان كورىنەدى.

سوندا، ادام قۇقىعىن اياققا تاپتاعان بۇل كاسىپكەر كىم؟ نەگە قۇزىرلى ورىندار ءتيىستى شارا قابىلداپ، بۇل ماسەلەنىڭ شەشىمىن تاپپايدى؟ الدە، ولار دا مەيىرمانوۆتىڭ ءوز ادامى ما؟

نۇربيكە بەكسۇلتانقىزى

Abai.kz