ەستە بولسا، وسىدان ەكى-ءۇش جىلداي بۇرىن تولە بي كوشەسى بويىنداعى تىلەنديەۆ كوشەسىنىڭ ەكى جاعى كەي تۇرعىنداردىڭ جايمالارىن جەرگە جايىپ تاستاپ، ەسكى-قۇسقىلارىن الاڭسىز ساتا بەرەتىن كادىمگى جابايى بازارعا اينالعان ەدى. سوسىن ول بازار جۇرت تالابىمەن جوعالىپ كەتكەندەي بولىپ ەدى.

بيىل جاز باستالعالى بەرى قايتا جاندانىپ شىعا كەلدى. ونىڭ ءوزىن كەز­دەيسوق بايقادىق. وندا دا بيلىك ورىندارى دەمالىپ جاتاتىن دەمالىس كۇندەرى تەمىر-تەرسەك ساتاتىن «تۇلپار» بازارىنىڭ تولە بي كوشەسى جاق بەتىندە جابايى ساۋدا كادىمگىدەي قىزىپ سالا بەردى. ءتىپتى، كەيبىر ساۋداگەرلەر وسى ماڭداعى بازارلاردا وتپەي جاتقان ەسكى-قۇسقى زاتتارىن اكەلىپ ساتىپ جاتقانىن دا بايقاپ قالدىق.

ارينە، ءبىز جۇرتتىڭ ءوز زاتتارىن ساتقانىنا ەش قارسى ەمەسپىز. بىراق، ونىڭ ءبارى زاڭدى، مادەني تۇردە بولسا دەپ ويلايسىڭ عوي. ويتكەنى، قازىر قالا كوشەلەرى جاڭارىپ، جاسارىپ جاتقاندا، مىنا ساۋدا كوڭىلگە قاياۋ تۇسىرەدى ەكەن. اسىرەسە، قارا جەرگە كادىمگى جايمالارىن جايىپ، ساۋدا جاساۋ – بىزدەن الدەقايدا تومەن تۇراتىن كەدەي ەلدەردە كەزدەسپەيتىن بە ەدى؟ ونىڭ ۇستىنە الەمنىڭ دامىعان 100 قالاسى قاتارىنا كىرگەن الماتى ءۇشىن مۇنداي ساۋدا تىپتەن ۇيات قوي…

وسى جەكسەنبىدە وسى ساۋدانى تاعى كوردىم. ءتىپتى، ونداعىلار قۇيىپ تۇرعان جاڭبىرعا دا قارار ەمەس. بالاقتارىن تىزەگە دەيىن قايىرىپ الىپ، وتكەن-كەتكەن ءبىرلى-جارىم ادامعا ءوز تاۋارىن ۇسىنىپ الەككە ءتۇسىپ جاتىر.ءتىپتى، توگىپ جاتقان جاڭبىرلى كۇنى ولارىنا ەشكىمنىڭ قارامايتىنىن دا قاپەرلەرىنە ىلەر ەمەس!

Abai.kz