ورامال ماسەلەسى بۇگىن عانا بولىپ وتىرعان جوق قوي. ەگەر قازىر شەشىلمەسە ءارى قاراي ۇلكەن ماسەلەگە اينالادى. 6 جاسار قىزدى ورامالمەن قاپتاپ مەكتەپكە جىبەرۋدىڭ لوگيكاسىن ۇعىنا الماي-اق قويدىم. ءدال سول قىزدارىن مەكتەپكە ورامالمەن جىبەرەتىن اتا-انالار - بارىپ تۇرعان ەگويست ءھام بالالارىن ەش ويلاعىسى كەلمەيتىن ادامدار دەپ ەسەپتەيمىن. ءوزىڭىز ويلاپ قاراڭىز، بۇكىل مەكتەپتەگى قىزداردىڭ شاشى اشىق جۇرەدى. ولاردىڭ كوبى ءدىني ماسەلەلەردەن حابارى دا جوق. سىنىپقا باسى ورانعان وزدەرىمەن قاتار قىز كىرىپ كەلەدى. نە ىستەيدى ول بالالار؟ ارينە، ول ورامالدى قىزدان الىس جۇرەتىن بولادى. ونىڭ ۇستىنە ۇيىنە بارىپ بولعان جاعدايدى ايتسا، كادىمگى قىزداردىڭ اكە-شەشەلەرى "ويباي، جولاما وندايلارعا" دەيدى. ناتيجەسىندە، ەندى عانا مەكتەپتە بارعان كىشكەنتاي قىز قوعامنان وقشاۋلانىپ، ءوزىن بوتەن سەزىنىپ دەپرەسسياعا ۇشىراي باستايدى. ال، ول كەزەڭ بالالاردىڭ قالىپتاسۋ كەزەڭى ەكەنىن ەسكەرسەك، الگى قىزدىڭ بولاشاعى قانداي بولارىن ويلاي بەرىڭىز. ول قىز بولاشاقتا ەشكىممەن ارالاسپايتىن بولادى. ەسەيگەن كەزدە قوعام ونى قابىلداعانىمەن، بالانىڭ ساناسىندا قالىپ كەتكەن كومپلەكس پەن رەنىشتىڭ سوڭى نەگە اپاراتىنىن ەسەپتەي كورىڭىز...
مەدرەسەدە وقىپ شىققان سوڭ، ەسەيە كەلە كوپشىلىك سىنىپتاستارىمىزبەن جولىعىپ كوردىك. سونىڭ بارلىعى دا كەزىندە ماكسيمۋم تاقۋالىققا ۇمتىلعان جاستار ەدى. بىراق، سول قىسىمنان شىققان بويدا ءبارى وزگەردى. سىزدەرگە ايتايىن، ۇلكەن ومىرگە قادام باسقان كەزدە، سول كەزەڭدەگى ءدىندار بالالاردىڭ ىشىندەگى قىسىم كورىپ وسكەندەرى ەەڭ قۋىپ كەتەتىندەردىڭ قاتارىندا بولادى. كادىمگى جاستار جاساۋى مۇمكىن كۇنالاردى ون ەسەلەپ جاساپ، ىشتەي جارىلادى. ەشكىم ءوز بالاسىنا زورلاپ ءدىن قابىلداتۋعا قاقىسى جوق. ءدىن ءار ادامنىڭ اقىلى تولىسىپ، سانالى تۇردە قابىلداۋى ياكي قابىلداماۋى ءتيىس نارسە بولۋى كەرەك.
سوندىقتان، مەكتەپكە ورامالسىز كىرگىزۋ - مەملەكەتتىڭ قىلمىسى ەمەس. مەكتەپتە ورامالمەن جىبەرۋ - اتا-انانىڭ قىلمىسى. ءھام ول ءۇشىن جاۋاپ بەرۋى ءتيىس سول اتا-انالار.
ارينە، بارلىعىمىز ۇرپاقتارىمىزدىڭ بولاشاعى جارقىن بولۋىن ءھام ادامي قالىپتان تايماس ىزگى جاندار بولىپ قالىپتاسۋىن قالايمىز. دەگەنمەن، تاربيە دەگەن ءبىر تۇتام ورامالمەن بەرىلمەيدى. ول ادامنىڭ ساناسىندا بەرىلەتىن/قالىپتاساتىن ەكوسيستەما. وزدەرى ءالى ءومىر كورمەي، بولمىسى جاي عانا ءدىني رومانتيكاعا ۇشىراعان اتا-انانىڭ اقىماقتىعىنان جاس بالالاردىڭ ءومىرى بۇزىلماسىن!

سادىق شەرىمبەكتىڭ facebook پاراقشاسىنان

Abai.kz