ەلباسى: تۇركىستان – تۇركى حالقىنىڭ كيەلى مەكەنى
قازاقستان پرەزيدەنتى تۇركىستان قالاسىن دامىتۋ جونىندە كەڭەس وتكىزدى، دەپ حابارلايدى اقوردانىڭ ءباسپاسوز قىزمەتى.
جيىن بارىسىندا مەملەكەت باسشىسىنا تۇركىستان قالاسىن دامىتۋدىڭ جوسپارى مەن پەرسپەكتيۆالارى جونىندە مالىمدەلىپ، وبلىس ورتالىعىن شىمكەنت قالاسىنان تۇركىستان قالاسىنا كوشىرۋگە قاتىستى تاپسىرمالاردىڭ ورىندالۋى تۋرالى باياندالدى.
– ەلىمىزدە جاڭادان تۇركىستان وبلىسىنىڭ پايدا بولعانى بارشاعا ءمالىم. بۇل ورىندى شەشىم دەپ سانايمىن. وبلىس ورتالىعى ەندى تۇركىستان قالاسىنا كوشەدى. بۇل – بارلىق جاعىنان دا كۇردەلى ۇدەرىس، – دەدى قازاقستان پرەزيدەنتى.
ەلباسى قازاقستان حالقى ءۇشىن دە، بۇكىل تۇركى الەمى ءۇشىن دە تۇركىستان قالاسىنىڭ تاريحي ءارى رۋحاني ءمانى زور ەكەنىنە ايرىقشا توقتالدى.
– بۇل – تۇركى حالىقتارىنىڭ كيەلى مەكەنى. سوندىقتان مۇندا جۇرت كوپ كەلەدى. بۇل جەردە كوپتەگەن تانىمال تۇلعالار جەرلەنگەن، – دەدى نۇرسۇلتان نازارباەۆ.
كەڭەستە پرەمەر-ءمينيستردىڭ ءبىرىنشى ورىنباسارى ا.ءماميننىڭ تۇركىستان قالاسىنىڭ اۋماقتىق دامۋ تۇجىرىمداماسى جونىندەگى بايانداماسى جانە تۇركىستان وبلىسىنىڭ اكىمى ج.تۇيمەباەۆتىڭ اكىمشىلىك-اۋماقتىق باسقارۋ ورگاندارىن جاڭا وبلىس ورتالىعىنا كوشىرۋ بارىسى جونىندەگى بايانداماسى تىڭدالدى. اتاپ ايتقاندا، قازاقستان پرەزيدەنتىنە ينفراقۇرىلىمدىق جانە الەۋمەتتىك نىساندار سالۋ جوسپارى، سونداي-اق قالانى ەنەرگيامەن جانە سۋمەن قامتاماسىز ەتۋگە قاتىستى ۇسىنىلعان شەشىمدەر جونىندە ەگجەي-تەگجەيلى مالىمەت بەرىلدى.
جيىن قورىتىندىسى بويىنشا ۇكىمەتكە جانە وبلىس باسشىلىعىنا بىرقاتار ناقتى تاپسىرما جۇكتەلدى.
Abai.kz
