قالاي بايقامادىم، قالاي تالانتىنا باسىمدى شايقامادىم؟ مەندە كوز جوق، ايتارعا ءسوز جوق! قۇدايىم–اۋ، ايەلىم ايگىلى بولايىن دەپ جۇرگەن، باسىنا بەس توننا باق قونايىن دەپ جۇرگەن، ەندى– ەندى بولايىن دەپ جۇرگەن ءانشى ەكەن عوي؟ ءبيتىمىزدى سىعىپ، قانىن جالاپ جۇرگەن ءبىز سياقتىلارعا بۇل دەگەنىڭىز كەرەمەت ەمەس پە؟
دەرەۋ «ەت اسىپ جەيمىز!» اتتى ءاننىڭ ماتىنىنە فونوگرامما جازدىردىق. ءاننىڭ ءانىن جازعان ءوزىم، ءسوزىن جازعان ايەلىم شىڭعىرگۇل. «سورپا ىشتىك»، «مەنىڭ قاتىنىم»، «ءيتتىڭ بالاسى»، «مىجىلعان ماحاببات» اندەرىمىزگە دە بەينە بايان ءتۇسىرىپ، تەلەديدارلاردا كورسەتىلگەننەن باستاپ، اتاعىمىز اسپانعا ءىلىنىپ قالدى! جەر باسىپ جۇرە الماي، تىرقىلداپ كۇلە الاماي قالدىق. ىڭىرانىپ. اقشا دەگەن ءار «كاستىرولىمىزدەن» ءجۇز مىڭداپ ءتۇسىپ جاتتى! ويباي–اۋ، مەنىڭ ايەلىم ءانشى ەكەن عوي! داۋسىنىڭ جەتپەگەن، قىرىلداعان، ىرىلداعان جەرلەرىن اۋەن ارلەۋشىمىز جوندەپ بەرە قويادى. سىزىلىپ تۇر! تەك اۋزىڭدى جىبىرلاتىپ تۇرساڭ بولدى. ونىڭ دا ەرەجەسى بار ەكەن. بۇعان كەلىسپەگەن ايەلىم، ساحنادا ساعىز شايناپ تۇراتىن بولدى. ال، مەن تەرىس قاراپ تۇرىپ ءان شىرقايمىن. كەشىرىڭىزدەر، ويتكەنى اۋزىم و باستان قيسىق ەدى... ۇيالامىن. «ەت اسىپ جەيمىز!» ءانىن شىرقاعانىمىزدا ايەلىم ساحناعا پىسكەن ەتتى الىپ شىعىپ، ءبىر جىلىكتى ماعان ۇستاتا سالادى. ەرىن جىبىرلاتۋدان قۇتىلۋدىڭ ءبىر ءادىسى، دەرەۋ ەت جەي باستايمىز. تىڭدارماندارىمىز، مۇنى انگە بايلانىستى وبراز ەكەن دەپ ءتۇسىنىپ ءجۇردى. سورپا تۋرالى ءان شىرقاساق، سورپا ىشەمىز. راحات ەكەن! ءبىر ايدىڭ ىشىندە جارداي بولىپ، ارەڭ جۇرەتىن قازداي بولىپ، سەمىرىپ كەتتىك. سودان، «كاستىرولدە» جۇرسەك، حالىقتى الدايمىز، ءتىرى داۋىسپەن ءان شىرقاۋعا بارمايمىز. جالعىز بىزدەر دەيسىزدەر مە؟ قازاقستانداعى «مەنمىن!» دەيتىن انشىلەردىڭ ءبارى حالىقتى فونوگراممامەن الدايدى، ءسويتىپ ەكى قابات كوتتەدج سالىپ، قىمبات ماشينالارىمەن ماقتانادى. ينستاگرامدا. ءبىز دە ماقتانىپ ءجۇرمىز.
ءبىر كۇنى قىزىق ەمەس كونتسەرت بەرىپ جاتقانبىز. ءبىر ايەل ءان شىرقاپ تۇرعان ايەلىمە ءتۋفليىن لاقتىرعانى! ءۇندى فيلمىندەگى انشىگە لاقتىرعانداي... ايەلىم ءتۋفليدى قاعىپ الىپ:
–ەكىنشىسىن لاقتىر! –دەدى. اناۋ ەكىنشىسىمەن جىبەرىپ ۇردى دا:
–حالىقتى نەگە الدايسىڭدار؟ جويىلسىن، فونوگرامما! –دەپ ايقايلادى. سول ەكەن، جۇرتتىڭ ءبارى اياق كيىمدەرىن لاقتىرا باستادى، ساحنادا اياق كيىمدەر تاۋداي بولىپ ءۇيىلىپ قالدى. كاشولوكتەرىن لاقتىرسا مەيلى عوي. تۇرا قاشتىق. «ءولا، دەيدى ايەلىم ەنتىگىپ، –ەگەر فونوگرامماعا تيىم سالۋ تۇرالى زاڭ قابىلدانىپ كەتسە، وشەمىز!»
–زاڭ قابىلدانسا، باسقا ەلگە كوشەمىز! –دەيمىن مەن جۇباتقان بولىپ.
ۇيگە كەلگەن سوڭ، «قاشىپ كەتتىك!» اتتى ءان تۋدى. ءانىن جازعان ءوزىم، ءسوزىن جازعان ايەلىم... قالاي، تىڭدايسىزدار ما؟

مۇحتار  شەرىمنىڭ  facebook  پاراقشاسىنان

Abai.kz