الماتىداعى مامانداندىرىلعان اۋدانارالىق سوتتا ەكس-اكىم ۆيكتور حراپۋنوۆ پەن ونىڭ ايەلى لەيلا حراپۋنوۆاعا قاتىستى سوت ۇكىمى شىقتى، - دەپ حابارلايدى Tengrinews.kz تىلشىسى سوت زالىنان.

"17 جىلعا باس بوستاندىعىنان ايىرىلسىن، سونداي-اق، مۇلكى تاركىلەنىپ، مەملەكەتتىك قىزمەتتە جۇمىس ىستەۋ قۇقىعىنان ايىرىلسىن. جازاسىن ماكسيمالدى قاۋىپسىزدىك مەكەمەسىندە وتەسىن", - دەدى سۋديا.

ال لەيلا حراپۋنوۆاعا سوت 14 جىلعا باس بوستاندىعىنان ايىرۋ تۋرالى ۇكىم شىعاردى. سوتتىڭ شەشىمىمەن حراپۋنوۆانىڭ دا مۇلكى تاركىلەنىپ، مەملەكەتتىك قىزمەتتە جۇمىس ىستەۋ قۇقىعىنان ايىرىلدى.

وسى ءىس بويىنشا سوت الدىندا ياكوۆ زاياتس، عابيدەن قايىمسۇلتانوۆ، ايار ءىلياسوۆ، قۋاندىق بيسقۇلتانوۆ، اباي ساپاروۆ، التاي قاسىموۆ، سەرىك ەسمۇقانوۆ، ايناكۇل سادىقباەۆا، ابىلايحان قارىمساقوۆ پەن ابدۋل-عازيز مۇقاشەۆ كەلدى.

مەملەكەتتىك ايىپتاۋشى ۆيكتور حراپۋنوۆتى 20 جىلعا، ال لەيلانى 17 جىلعا باس بوستاندىعىنان ايىرۋدى سۇراعان بولاتىن. بۇدان بولەك پروكۋرور ولاردى مەملەكەتتىك قىزمەتتە جانە قارجى ۇيىمدارىندا 7 جىل ۋاقىت جۇمىس ىستەۋ قۇقىعىنان، سونداي-اق، ماراپاتتارىنان ايىرۋدى سۇراعان بولاتىن.

ەسكە سالايىق، ۆيكتور حراپۋنوۆ پەن ونىڭ ايەلى لەيلا حراپۋنوۆاعا قاتىستى قازاقستاندا ۇزىن سانى 24 قىلمىستىق ءىس قوزعالىپ، قىزمەت بابىن اسىرا پايدالاندى، الاياقتىق جولمەن بيۋدجەت قارجىسىن جىمقىردى، زاڭسىز جەكەشەلەندىرۋ جۇرگىزدى، زاڭسىز كىرىستەردى زاڭداستىرىپ الدى، پارا الدى، ۇيىمداسقان قىلمىستىق توپتى قۇردى جانە ولارعا جەتەكشىلىك ەتتى دەگەن ايىپ تاعىلعان بولاتىن. 2008 جىلعى ساۋىردە ول قازىر وتباسىمەن تۇرىپ جاتقان شۆەيتسارياعا قونىس اۋدارعان بولاتىن. ال 2012 جىلى قازاندا ۆيكتور حراپۋنوۆتىڭ ايەلى - لەيلاعا ءىرى كولەمدىە الاياقتىق جاساعانى ءۇشىن حالىقارالىق ىزدەۋ جاريالانعان ەدى.

Abai.kz