قازاقستان پرەزيدەنتى بىرىككەن ۇلتتار ۇيىمى وركەنيەتتەر اليانسىنىڭ جوعارى وكىلى ناسير ءابدۋلازيز ءال-ناسەرمەن كەزدەستى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

مەملەكەت باسشىسى سەزگە قاتىسقانى ءۇشىن ناسير ءابدۋلازيز ءال-ناسەرگە ريزاشىلىق ءبىلدىرىپ، وركەنيەتتەر اليانسى قازاقستاننىڭ وسى باستاماسىنا تۇراقتى قولداۋ كورسەتىپ كەلە جاتقانىن اتاپ ءوتتى.

– قازاقستان كوپكونفەسسيالى مەملەكەت رەتىندە كونفەسسياارالىق ديالوگتى دامىتۋ ىسىنە ءوز ۇلەسىن قوسۋدا. بۇل ءوزىڭىز وكىلدىك ەتەتىن ۇيىمنىڭ ماقساتتارىنا ساي كەلەدى، – دەدى نۇرسۇلتان نازارباەۆ.

وركەنيەتتەر اليانسىنىڭ جوعارى وكىلى فورۋمعا قاتىسۋعا مۇمكىندىك بەرىلگەنى ءۇشىن مەملەكەت باسشىسىنا العىس ايتىپ، قازاقستاننىڭ الەمدەگى مادەنيەتتەر اراسىنداعى ءوزارا تۇسىنىستىكتى دامىتۋ ىسىندەگى رولى ايرىقشا ەكەنىن اتاپ ءوتتى.

– مەن الەمدىك جانە ءداستۇرلى دىندەر كوشباسشىلارىنىڭ سەزىنە ءۇشىنشى رەت قاتىسىپ وتىرمىن. بۇعان دەيىن مەن ەشقاشان وسىنشاما ءدىن وكىلدەرىمەن كەزدەسكەن ەمەسپىن. ەلدەرىڭىزدىڭ وركەنيەتارالىق ديالوگتى دامىتۋ جولىنداعى كۇش-جىگەرىن جوعارى باعالايمىن، – دەدى ناسير ءابدۋلازيز ءال-ناسەر.

كەزدەسۋ بارىسىندا قازاقستان پرەزيدەنتى حالىقتار اراسىنداعى بەيبىتشىلىكتى، دوستىق پەن ىنتىماقتاستىقتى نىعايتۋعا جانە قوعامداعى ءوزارا كەلىسىمدى ساقتاۋعا قوسقان ۇلەسى ءۇشىن ناسير ءابدۋلازيز ءال-ناسەردى ءىى دارەجەلى «دوستىق» وردەنىمەن ماراپاتتادى.

Abai.kz