مەملەكەت باسشىسى فينليانديا رەسپۋبليكاسىنىڭ بيزنەس وكىلدەرىمەن كەزدەستى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

نۇرسۇلتان نازارباەۆ فينليانديا رەسپۋبليكاسى قازاقستاننىڭ ساۋدا-ەكونوميكا سالاسىنداعى ماڭىزدى سەرىكتەستەرىنىڭ ءبىرى ەكەنىن اتاپ ءوتىپ، ەكى ەل اراسىنداعى قارىم-قاتىناستار دوستىق پەن ءوزارا سەنىمگە نەگىزدەلگەنىن ايتتى.

– تاۋەلسىزدىك جىلدارى فينليانديا قازاقستانعا 300 ميلليون اقش دوللارىنان استام ينۆەستيتسيا قۇيدى. قازاقستاندا فين كاپيتالىنىڭ قاتىسۋىمەن ءتۇرلى سالالاردا 100-گە جۋىق كاسىپورىن تىركەلگەن، – دەدى مەملەكەت باسشىسى.

نۇرسۇلتان نازارباەۆ قازاقستاننىڭ ءتيىمدى بيزنەس جۇرگىزۋ ءۇشىن جاڭا مۇمكىندىكتەرگە جول اشاتىنىن ايتىپ، بۇگىنگى كەزدەسۋدىڭ ماقساتى ەكونوميكالىق قارىم-قاتىناستاردى جانداندىرۋ جانە جاڭا ارىپتەستەر ىزدەستىرۋ ەكەنىن اتاپ ءوتتى.

– ينۆەستورلارمەن جانە بيزنەس وكىلدەرىمەن ءوزارا ءتيىمدى ءىس-قيمىل جۇرگىزۋ ماقساتىمەن «قازاق ينۆەست» جانە «قازاق ەكسپورت» ۇلتتىق كومپانيالارى قۇرىلدى. پرەزيدەنت جانىندا شەتەل ينۆەستورلارىنىڭ كەڭەسى جۇمىس ىستەيدى. مەتاللۋرگيا، مۇناي وڭدەۋ، ماشينا جاساۋ، حيميا، ازىق-تۇلىك ءوندىرۋ سياقتى باسىم باعىتتاعى ينۆەستيتسيالىق جوبالاردى ىسكە اسىرۋ بارىسىندا كورپوراتيۆتىك، جەر جانە مۇلىك سالىقتارىنان بوساتۋ قاراستىرىلعان، جەر قويناۋىن پايدالانۋعا ليتسەنزيا الۋ جانە كەلىسىم-شارتتار جاساسۋ ءتارتىبى جەڭىلدەتىلگەن. سونداي-اق، شەت ەلدەردەن جۇمىس كۇشىن تارتۋ ءىسى كۆوتاسىز ءارى رۇقسات الۋ ءراسىمىنسىز جۇرگىزىلەدى، – دەدى قازاقستان پرەزيدەنتى.

مەملەكەت باسشىسى جيىنعا قاتىسىپ وتىرعان بيزنەسمەندەرگە قازاقستاندا جۇرگىزىلىپ جاتقان اۋقىمدى جەكەشەلەندىرۋ جونىندە ايتىپ، بۇل ىسكە شەت ەلدەردەن، سونىڭ ىشىندە فين ينۆەستورلارىنان سۇرانىس بار ەكەنىن اتاپ ءوتتى.

– ءبىز فينليانديا – قىتاي باعىتى بويىنشا قازاقستان اۋماعى ارقىلى وتەتىن جاڭا تەمىر جول اشقانىمىزعا قۋانىشتىمىز. ەندى، بۇل باعىت بويىنشا جانە كەرى قاراي جونەلتىلەتىن كونتەينەرلىك تاسىمال ۋاقىتى تەڭىز جولىنا قاراعاندا 4 ەسە قىسقارادى، – دەدى مەملەكەت باسشىسى.

قازاقستان پرەزيدەنتى اۋىل شارۋاشىلىعى تاۋارلارىن وندىرۋشىلەرگە مەملەكەتتىك قولداۋ كورسەتۋ ماسەلەلەرىنە توقتالىپ، فين كومپانيالارىن اگرووندىرىس كەشەنىندەگى جوبالاردى ىسكە اسىرۋعا بەلسەندى اتسالىسۋعا شاقىردى.

– قازاقستان ەكونوميكانى جەدەل جاڭعىرتۋعا، جاڭا تەحنولوگيا مەن يننوۆاتسيانى ەنگىزۋگە باعىت الدى. «تسيفرلىق قازاقستان» ارنايى مەملەكەتتىك باعدارلاماسى جۇزەگە اسىرىلۋدا. فين كومپانيالارىنىڭ وسى سالاداعى تاجىريبەسى بىزدىڭ ىنتىماقتاستىعىمىزعا جاڭا جول اشار ەدى، – دەدى نۇرسۇلتان نازارباەۆ.

سونىمەن قاتار، مەملەكەت باسشىسى «استانا» حالىقارالىق قارجى ورتالىعىنىڭ جانە سونىڭ جانىنان اشىلعان جوعارى تەحنولوگيالىق بيرجانىڭ ارتىقشىلىقتارى جونىندە ايتىپ، وسى جوبانى جۇزەگە اسىرۋعا شانحاي قور بيرجاسى مەن NASDAQ امەريكالىق بيرجاسىنىڭ اتسالىسقانىن اتاپ ءوتتى.

– «استانا» حالىقارالىق قارجى ورتالىعىنىڭ «جاسىل»، يسلامدىق جانە يننوۆاتسيالىق قارجى قۇرالدارىن دامىتۋدىڭ وڭىرلىك ورتالىعىنا اينالۋعا تولىق مۇمكىندىگى بار. فين كومپانيالارىن وسى ورتالىقتىڭ جۇمىسىنا اتسالىسۋعا شاقىرامىن، – دەدى قازاقستان پرەزيدەنتى.

كەزدەسۋ سوڭىندا نۇرسۇلتان نازارباەۆ فين كاسىپكەرلەرىنىڭ ەكى ەل اراسىنداعى بيزنەستى دامىتۋ جانە ءوزارا ءتيىمدى ارىپتەستىكتى نىعايتۋ ءۇشىن قازاقستانداعى بارلىق مۇمكىندىكتەردى پايدالاناتىنىنا سەنىم ءبىلدىردى.

Abai.kz