ۇلتتىق بىرىڭعاي تەستىلەۋگە ەنگىزىلگەن وزگەرىستەرگە سايكەس وقۋشى جوو-عا ءتۇسۋ ءۇشىن قانشا بالل جيناۋى كەرەك؟ بۇل تۋرالى ۇكىمەت وتىرىسىنان كەيىن ءبىلىم جانە عىلىم ءمينيسترى ەرلان ساعاديەۆ تىلشىلەرگە ايتتى، دەپ حابارلايدى اباي-اقپارات turkystan.kz-گە سىلتەمە جاساپ.

«قۇجاتتاردى تاپسىرىپ، ۇبت-دان وتۋگە بولادى (قاڭتار ايىندا). 50 بالل الساڭىز، سول جوعارى وقۋ ورنىنا ءتۇسىپ، شارتتى قورعاۋ دەيدى عوي، سول جەردە ۇلكەن ۇبت-نى كۇتۋگە بولادى. ەكىنشى ۇبت جازدا بولادى عوي. گرانتقا تۇسكىسى كەلسە، وندا جازداعى - ەكىنشى ۇبت-عا قاتىسۋعا قۇقىلى. جوو-دا اقشاسىن ءوزىم تولەپ وقيمىن دەسە، ۇبت-عا (جازداعى - اۆت.) بارماي، قاڭتار ايىندا بەكىتىلىپ، ۋنيۆەرسيتەتكە كۇزدە ءبىر-اق بارا الادى»، - دەدى ەرلان ساعاديەۆ تىلشىلەرگە بەرگەن جاۋابىندا.

ءمينيستردىڭ ايتۋىنشا، مەكتەپ بىتىرەردەن التى اي بۇرىن اقىلى وقۋعا تۇسەتىندەر جوو-داعى بەكىتىلگەن تولەممەن، ەشقانداي جەڭىلدىكسىز ءبىلىم الاتىن بولادى.

ياعني، جوو-دا اقىلى وقۋدى قالايتىن مەكتەپ تۇلەكتەرى ۇبت-نى قاڭتار ايىندا تاپسىرىپ، جازداعى ءداستۇرلى ۇبت-عا قاتىسپاۋعا قۇقىلى.

ەسكە سالا كەتسەك، قر ءبىلىم جانە عىلىم ءمينيسترى ەرلان ساعاديەۆ بۇگىنگى ۇكىمەت وتىرىسىندا ۇلتتىق بىرىڭعاي تەستىلەۋگە قاتىستى وزگەرىستەردى جاريالاعان بولاتىن. ونىڭ ايتۋىنشا، بىرىنشىدەن، كەلەسى جىلدان باستاپ ۇبت جىل ىشىندە قاڭتار ايىندا باستالىپ، بىرنەشە رەت وتكىزىلەدى. ەكىنشىدەن، قاڭتاردان باستاپ مەكتەپ تۇلەكتەرى ءۇشىن اقىلى نەگىزدە وقۋدا شارتتى تۇردە تۇسۋگە مۇمكىندىك بەرىلەدى. ۇشىنشىدەن، جوعارى وقۋ ورىندارىندا شەتەل ازاماتتارىنىڭ وقۋ جىلى كەزىندە وقۋعا قابىلداۋ مۇمكىندىگى قاراستىرىلعان. تورتىنشىدەن، شەتەل ازاماتتارى، سونىڭ ىشىندە قازاق دياسپوراسى ءۇشىن ستيپەنديالىق باعدارلامالار ەنگىزىلەدى. بەسىنشىدەن، ماگيستراتۋراعا قابىلداۋدىڭ جاڭا مودەلى ەنگىزىلۋدە.

Abai.kz