باتىس قازاقستان ءىىد قۇقىق قورعاۋ جۇيەسىن قايتا قۇرۋ جوباسىنا بايلانىستى جەكە قۇرامداعى قىزمەتكەرلەردىڭ وننان ءبىر بولىگىن قىسقارتپاق، دەپ حابارلايدى الماتى تەلەارناسى.

باتىس قازاقستان وبلىسى ىشكى ىستەر دەپارتامەنتى 3,5 مىڭ قىزمەتكەردىڭ ىشىنەن 300-دەن استام پوليتسەيدى جۇمىستان شىعارۋدى جوسپارلاپ وتىر.

وبلىستىق ىشكى ىستەر دەپارتامەنتى باسشىسىنىڭ ورىنباسارى بەرىك ءايمۋرزيننىڭ سوزىنە سۇيەنسەك، قۇقىق قورعاۋ جۇيەسىن وڭتايلاندىرۋ جوسپارىنا بايلانىستى پوليتسەيلەر وزدەرىنە ءتان ەمەس بىرقاتار قىزمەتتى اتقارمايتىن بولادى. الايدا، ناقتى قانداي قىزمەتتەر تۋرالى ءسوز بولىپ وتىرعانىن پوليتسيا باسشىسىنىڭ ورىنباسارى ايتا العان جوق، تەك جوبانىڭ نۇرسۇلتان نازارباەۆتىڭ تاپسىرماسىمەن ورىندالاتىنىن اتاپ ءوتتى.

«وسىعان بايلانىستى ىشكى ىستەر دەپارتامەنتى پوليتسيا دەپارتامەنتى دەپ اتالىپ، پوليتسيا قىزمەتىن عانا اتقاراتىن بولادى»، — دەيدى بەرىك ايمۋرزين.

ونىڭ حابارلاۋىنشا، 2019 جىلى پوليتسەيلەردىڭ ارقايسىسى اتتەستاتسيادان وتەدى.

«ىشكى ىستەر ورگاندارىندا زامان تالاپتارىنا ساي كەلەتىن قىزمەتكەرلەر عانا قالادى: بىلىكتى، زاڭگەرلىك ءبىلىمى بار ماماندار. قازىر جەكە قۇرامىنىڭ 10 %-ىن قىسقارتۋعا كىرىسىپ كەتتىك»، — دەيدى ايمۋرزين.

پوليتسيا باسشىنىڭ ورىنباسارى اتاپ وتكەندەي، باتىس قازاقستان وبلىسىندا ءىىد جەكە قۇرامىنىڭ قىزمەتكەرلەر سانى 3 500 ادام. ولاردىڭ 300-دەن استامى جۇمىستان شىعارىلادى.

Abai.kz