قازاق تالانتتى حالىق. كەز كەلگەن سالانى باعىندىرىپ، الەمدىك دەڭگەيدە رەكوردتار جاساۋعا مۇمكىندىگى مول. ونى كورىپ تە ءجۇرمىز. بىراق «اۋىلداعىنىڭ اۋىزى ساسىق» دەمەكشى، سپورت سالاسىنا شەتەلدىك لەگيونەرلەردى شاقىرىپ، ميلليوندار شاشامىز. نامىس ءۇشىن. بىراق قانداي دا ءبىر حالىقارالىق جارىستارداعى جەڭىستى بىزگە لەگيونەرلەر اپەرىپ جاتسا، ونى جۇرتتىڭ ءبارى كورىپ وتىر عوي. كۇلەدى. «قازاقتار وزدەرىنىڭ شاماسى جەتپەگەن سوڭ، تاعى شەتەلدىكتەردىڭ ارقاسىندا اتتارىن شىعارىپ ءجۇر» دەپ. نامىستى جىبەرمەيمىز دەپ جاساعان ءىسىمىز نامىسىمىزدى تاپتاپ جاتىر.

نامىس دەمەكشى، كەزىندە ۇلتجاندى ازاماتتار «نامىس» اتتى بالالار فۋتبول قۇراماسىن جاساقتاپ، شەت ەلگە وقىپ، جاتتىعۋعا جىبەرىپ ەدى. سول بالالاردىڭ ۇلكەن سپورتقا جولىن اشۋعا لايىقتى ارەكەت جاسالمادى. ءتىپتى، وسىدىن از ۋاقىت بۇرىن لەگيونەرلەردىڭ جەرگىلىكتىلەردى كومانداعا كىرگىزبەۋ ءۇشىن بارىن سالاتىنى تۋرالى اقپارات تا جارىق كورگەن بولاتىن. ولارعا كەرەگى – اقشا. جالپى، وسى شەتەلدىك لەگيونەرلەرگە، جالپى سپورتقا بولىنەتىن اقشا مەن ونىڭ ءتيىمدى پايدالانۋىن جاقسىلاپ تەكسەرۋ قاجەت. ەلدىڭ نامىسى وسى ەلدىڭ ازاماتتارىنا كەرەك. بىراق ءوز سپورتشىلارىمىزدى تاربيەلەپ، ءوسىرۋ ماسەلەسىنە ءالى كۇنگە لايىقتى دارەجەدە كوڭىل بولىنبەي كەلەدى. كەشە سەنات توراعاسى قاسىم-جومارت توقاەۆ قاراعاندى حالقىمەن كەزدەسۋىندە وسى ماسەلەگە قاتىستى سىن پىكىرىن ورتاعا سالدى.

- ءبىز كوبىنە شەتەلدىك سپورتشىلاردى شاقىرامىز. جەڭىس تە اكەلەر. بىراق بۇل كورسەتكىش پە؟ جوق. ءبىز قازاق جاستارى، قازاقستاندىق جاستار اراسىنان وليمپيادا چەمپيوندارىن، الەمدىك جانە قۇرلىقتىق چەمپيوناتتاردىڭ جەڭىمپازدارىن دايىنداۋىمىز قاجەت. بۇل ءۇشىن ءبىز بالالار مەن جاسوسپىرىمدەر سپورتىن، دەنە شىنىقتىرۋدى، سالاۋاتتى ءومىر سالتىن دامىتۋعا ەكپىن جاساۋعا ءتيىسپىز» ، - دەدى ق.توقاەۆ.

ايتقانىنداي-اق، ايماقتاردا نەلەر تالانتتى جاستار بار. تەك ولاردى تاۋىپ، تاربيەلەپ، باعىتتاۋ، جاعداي تۋعىزۋ كەرەك. جاعداي دەمەكشى، ەلباسى بيىلعى جولداۋىندا وڭىرلىك دەڭگەيدە رەزەرۆتەر تابۋ ارقىلى بۇقارالىق سپورت پەن دەنە شىنىقتىرۋدىڭ حالىققا قولجەتىمدىلىگىن ارتتىرۋدى تاپسىردى. بولاشاقتا ءتيىستى ينفراقۇرىلىمىن دامىتۋعا اسا مۇقتاج ەلدى مەكەندەردە 100 دەنە شىنىقتىرۋ-ساۋىقتىرۋ كەشەنىن سالۋ جوسپارلانىپ وتىر. ەندىگى ماسەلە وسى مۇمكىندىكتى دۇرىس پايدالانۋدا.

ادىلبەك قابا

Abai.kz