وسىدان كەيىن ددسۇ باس ديرەكتورى تەدروس گەبرەيەسۋس مىرزا قر پارلامەنتى سەناتىنىڭ توراعاسى قاسىم-جومارت توقاەۆ مىرزانىڭ قابىلداۋىندا بولدى.

تاراپتار استانادا وتكەن مەديتسينالىق-سانيتارلىق العاشقى كومەك كورسەتۋ جونىندەگى كونفەرەنتسيانى قورىتىندىلاپ، ءوزارا پىكىر الماستى.

ۇيىم باسشىسى قازاقستاندا ۇيىمداستىرىلعان جاھاندىق جيىننىڭ ماڭىزدىلىعىنا توقتالىپ، بۇل سالادا ءبىزدىڭ ەلدە تولىمدى ىستەردىڭ اتقارىلىپ جاتقانىن ايتتى.

اسىرەسە استانا دەكلاراتسياسىنىڭ قابىلدانۋى وتاندىق مەديتسينانىڭ قۇلاشتاپ دامۋىنا سەرپىن بەرەدى دەدى. ونىڭ ايتۋىنشا، قازاقستاننىڭ دەنساۋلىق ساقتاۋ سالاسىندا ۇستانعان سارابدال ساياساتى كوپتەگەن ەلگە ۇلگى بولۋى ءتيىس. سوندىقتان ولار  استانا دەكلاراتسياسىن الەم تىلدەرىنە اۋدارۋ كەرەك دەپ ەسەپتەيدى. ءوز كەزەگىندە سەنات توراعاسى سىيلى مەيمانعا العىس ءبىلدىرىپ، اراداعى بايلانىستىڭ ءالى دە بەكي تۇسۋىنە اتسالىساتىنىن ايتتى.

ال كەشە الماتى قالاسىنىڭ اكىمى باۋىرجان بايبەك  دۇنيەجۇزىلىك دەنساۋلىق ساقتاۋ ۇيىمى ەۋروپالىق بيۋروسىنىڭ ديرەكتورى جۋجاننا ياكابپەن كەزدەسىپ، مەگاپوليستە ءوتىپ جاتقان "سالاۋاتتى قالالار" ەۋروپالىق جەلىسى مەرلەرىنىڭ ءسامميتى جۇمىسىن ءھام ءوزارا ىنتىماقتاستىقتىڭ پەرسپەكتيۆالارىن تالقىلاعان بولاتىن.

ءسوز بارىسىندا جۋجاننا ياكاب ددسۇ-نىڭ الماتىمەن، جالپى قازاقستانمەن ىنتىماقتاستىعى دەڭگەيىن جوعارى باعالادى، سالاۋاتتى ءومىردى قالىپتاستىرۋ مەن دەنساۋلىق ساقتاۋ سالاسىن مودەرنيزاتسيالاۋدىڭ وڭ ناتيجەلەرىن اتاپ ءوتتى.

"جايلى قالا كەڭىستىگىن ارتتىرۋ، قوعامدىق كولىكتى دامىتۋ، ۆەلوسيپەدشىلەر جانە سپورتشىلار ءۇشىن قولايلى ينفراقۇرىلىمدى قالىپتاستىرۋ قالا تۇرعىندارىنىڭ دەنساۋلىعىن جاقسارتادى. جۇرگىزىلگەن زەرتتەۋلەر كورسەتكەندەي، قالانى دۇرىس جوسپارلاۋ ونكولوگيالىق جانە جۇرەك- قان تامىرلارى اۋرۋلارى سالدارىنان بولاتىن ءولىم دەڭگەيىن ورتا ەسەپپەن 25 پايىزعا قىسقارتادى ەكەن. الماتىنىڭ تاجىريبەسى تەك قازاقستانعا عانا ەمەس، ەۋروپا ءوڭىرىنىڭ بىرقاتار قالالارىنا دا پايدالى", -دەدى ول.

"مەملەكەت باسشىسىنىڭ جولداۋىندا ەلىمىزدىڭ ودان ءارى دامۋىنا ىقپال ەتەتىن قالالاردى تۇراقتى ورىستەتۋگە ەرەكشە ءمان بەرىلگەن. جا يلى جانە ەكولوگيالىق قالا كەڭىستىگىن،وسەر ەلدەرىندەگىدەي ساپالى ءبىلىم مەن دەنساۋلىق ساقتاۋ قىزمەتىن قالىپتاستىرۋ ءبىزدىڭ باستى باعىتتارىمىزدىڭ ءبىرى بولىپ تابىلادى. وسى ورايدا ساپالى، جوعارى دامىعان مەديتسينالىق قىزمەت كورسەتۋدەگى وزگە قالالاردىڭ وزىق تاجىريبەلەرى بىزگە وتە قىزىق", -دەپ اتاپ ءوتتى ءوز كەزەگىندە باۋىرجان بايبەك.

ايتا كەتەيىك، استانادا 25–26 قازان كۇندەرى مەديتسينالىق-سانيتارلىق العاشقى كومەك (مساك) جونىندەگى جاھاندىق كونفەرەنتسياسى وتەدى.