كولىك رەفورماسىن جۇزەگە اسىرۋ اياسىندا قالانىڭ جولاۋشىلار كولىگىن جاڭارتۋ ودان ءارى جالعاسۋدا. جۇمىس ساپارى كەزىندە الماتى اكىمى باۋىرجان بايبەك قالاعا كەلگەن جاڭا اۆتوبۋستاردى كوردى.

سىيىمدىلىعى ۇلكەن جاڭا اۆتوبۋستار №48 باعىت بويىنشا جۇرەدى، سونىمەن قاتار № 12, 19, 56, 70, 77, 123, 124, 137 باعىتتار كۇشەيتىلەدى.

ەرتەڭنەن باستاپ № 36, 51, 125 باعىتتاعى ەسكى گازەلدەردىڭ ورنىنا جاڭا اۆتوبۋستار قىزمەت كورسەتە باستايدى، بۇلار قوزعالىسى شەكتەۋلى جاندار ءۇشىن قولايلى ءارى تار كوشەلەرمەن جۇرە الادى. № 40, 46,122 باعىتتار دا كۇشەيتىلەدى.

بۇلاردان وزگە، № 59, 69, 71 باعىتتاردى جىلجىمالى سوستاۆ تولىق جاڭارادى. № 8, 44, 74 باعىتتار بويىنشا قوسىمشا اۆتوبۋستار شىعادى.

№205 باعىت بويىنشا جاڭا ماگيسترالدى قوزعالىس اشىلادى، ول رايىمبەك داڭعىلى بويىمەن «بارلىق» بازارىنان قالانىڭ باستىس جاعىن جانە «جەتىسۋ» بازارىنىڭ شىعىس جاعىن قامتيدى. بۇل باعىت بويىنشا جولاۋشىلارعا جاڭا 20 اۆتوبۋس قىزمەت كورسەتەدى.

الماتى اگلومەراتسياسى بويىنشا جولاۋشىلاردى تاسىمالداۋ ساپاسىن ارتتىرۋ ءۇشىن قاسكەلەڭ قالاسىنا قاتىنايتىن ۇزىندىعى 12 مەترلى اۆتوبۋستار جۇرەتىن جاڭا باعىت اشۋ جوسپارلانۋدا.

الماتى اكىمى باۋىرجان بايبەك قازىرگى كەزدە كولىك سالاسىندا اشىق نارىقتىق مەحانيزمدەردىڭ جۇمىس ىستەي باستاعانىن اتاپ ءوتتى. جىلجىمالى سوستاۆتى جاڭارتۋ، ارنايى جولاقتار اشۋ ارقاسىندا جولاۋشىلار اعىنى ارتۋدا.

«ەسكى ءارى ءتۇتىن شىعاراتىن اۆتوبۋستار قالادا ءجۇرۋى ءتيىس ەمەس. ەگەر كورسەتىلگەن قولداۋعا قاراماستان جەكە تاسىمالداۋشى جىلجىمالى سوستاۆتى جاڭالاماسا، وندا ولارمەن كەلىسىم بۇزىلادى. جاڭا تەحنولوگيالاردى ەنگىزىپ، بولاشاقتا ءبىر كولىكتەن ەكىنشىسىنە تەگىن اۋىسۋدى قاراستىرعان ءجون. جولاۋشىلاردىڭ كولىك جۇمىسىنا قاناعاتتانۋى – تاسىمالداۋدىڭ باستى كريتەريى. جەكە كولىكتى قازىرگى دەڭگەيدە ۇستاپ تۇرۋ ءۇشىن لايىقتى بالاما ۇسىنۋ قاجەت»، - دەپ اتاپ ءوتتى مەگاپوليس باسشىسى.

ايتا كەتەرلىگى، قالاعا جاڭادان كەلگەن تومەن ەدەندى لياز ماركالى اۆتوبۋستار كونديتسيونەرلەرمەن، ۆيدەوباقىلاۋ كامەرالارىمەن جابدىقتالعان جانە ەكولوگيالىق سىنىپتاعى ەۆرو-5 ستاندارتىنا ساي. جىلجىمالى سوستاۆتىڭ دايىندىعىنا وراي باعىتتارعا شىعۋمەن كەزەڭمەن اتقارىلادى.

الماتىدا جىل اياعىنا دەيىن جاڭا قوعامدىق كولىكتىڭ ۇلەسى 87%-عا دەيىن جەتەتىن بولادى.

Abai.kz