قازاقستاندا ينجەنەرلىك باعىت وتە جاقسى دامىعان. بۇل تۋرالى بۇگىن «Digital Bridge» حالىقارالىق يننوۆاتسيالىق فورۋمى اياسىندا باق وكىلدەرىنە سۇحبات بەرگەن «The Startup Owners Manueal» تەڭ اۆتورى، كاسىپكەر بوب دورف ءبىلدىردى، دەپ حابارلايدى قازاقپارات ءتىلشىسى.

«قازاقستانعا العاش رەت كەلىپ وتىرسام دا، سىزدەردىڭ قول جەتكىزگەن جەتىستىكتەرىڭىزدى كورىپ تاڭ قالدىم. كەشە 60-تان استام ستارتاپپەن تانىسقان ەدىم. قازاقستاننىڭ بۇل باعىتتا جۇمىس ىستەي باستاۋى  شابىتتاندىرادى. ەلدە ينجەنەرلىك باعىت وتە جاقسى دامىعان ەكەن. سونىڭ ارقاسىندا ەلدەرىڭىزدىڭ ستارتاپەرلەرى بارىنشا قاراپايىم ءارى وتە ءتيىمدى ادىستەردى قولدانادى»، - دەدى ول.

ونىڭ پايىمىنشا، بۇل قازاقستان ءۇشىن وتە جاقسى. سەبەبى ونى ارقاسىندا جاڭا سالالاردى دامىتۋعا مۇمكىنشىلىك  مول.

«ولار وعان مول ەنەرگيا جۇمساپ، قوماقتى قاراجات سالادى. ناتيجەسىندە ونىڭ جاھاندىق دەڭگەيدە دە، قازاقستان ءۇشىن تە پايداسى مول. جالپى، قازاقستانعا كەلۋدەگى باستى ماقساتىم ىنتىماقتاستىقتى ودان ارى دامىتۋ ءۇشىن بايلانىس ورناتۋ بولدى»، - دەدى بوب دورف.

ايتا كەتەيىك، فورۋمىنىڭ اشىلۋىندا قر اقپارات جانە كوممۋنيكاتسيالار ءمينيسترى داۋرەن اباەۆ قازاقستان ازيا مەن ەۋروپا تەحنولوگيالىق ورتالىقتارىنىڭ اراسىندا التىن كوپىرگە اينالاتىندىعىن ايتتى.

Digital Bridge - قازاقستانداعى بيىلعى جىلى ءوتىپ وتىرعان باستى يننوۆاتسيالىق وقيعا.

قاتىسۋشىلار فورۋمنىڭ ديالوگتىك الاڭىندا تسيفرلاندىرۋ سالاسىنداعى سوڭعى الەمدىك ترەندتەردى تالقىلاپ، الدىڭعى قاتارلى تاجىريبەلەرمەن جانە بيزنەس-مودەلدەرمەن بولىسەدى. فورۋمعا حالىقارالىق ءىت-قوعامداستىعىنىڭ نەگىزگى وكىلدەرى، تەحنولوگيا سالاسىنداعى تانىلعان ساراپشىلار، كاسىپورىن باسشىلارى، تەحنولوگيالىق كاسىپكەرلەر، سونداي-اق بىرقاتار ەلدىڭ مەملەكەتتىك سەكتورلارىنىڭ وكىلدەرى، عالىمدار، تسيفرلىق ازىرلەمەلەر سالاسىنىڭ ماماندارى، ۆەنچۋرلىق ينۆەستورلار قاتىسۋدا.

فورۋم اياسىندا «تسيفرلىق ەكونوميكا دامۋىنىڭ جاھاندىق ترەندى جونىندە ديالوگى» اتتى پلەنارلىق سەسسياسى وتەدى. سونىمەن قاتار، سەسسيا جۇمىسىنا قر پرەمەر-ءمينيسترى باقىتجان ساعىنتاەۆ، رەسەي فەدەراتسياسىنىڭ تسيفرلىق دامۋ، بايلانىس جانە بۇقارالىق كوممۋنيكاتسيالار ءمينيسترى كونستانتين نوسكوۆ قاتىسادى دەپ كۇتىلۋدە.

Abai.kz