شىمكەنتتەگى مۇناي وڭدەۋ زاۋىتىندا جاڭعىرتۋ جوباسى اياقتالىپ، يزومەرلەۋ قوندىرعىسى قوسىلعاننان كەيىن جوعارى وكتاندى بەنزيندەردى شىعارۋ كورسەتكىشى 100 پروتسەنتتى قۇرادى، دەپ حابارلايدى اباي-اقپارات turkystan.kz-گە سىلتەمە جاساپ.

ال موتورلى وتىنداردىڭ ساپاسى كەدەن وداعىنىڭ تەحنيكالىق رەگلامەنتىنىڭ تالاپتارىنا سايكەس ك4 جانە ك5 ەكولوگيالىق كلاسىنا جەتكىزىلدى. ياعني قازىر ەۋرو-4 جانە ەۋرو-5 ستاندارتىنا ساي جانارماي مەن ديزەلدى وتىن شىعارۋدا. كۇردەلى جوندەۋدىڭ ناتيجەسىندە بۇگىندە ءوندىرىس كولەمى 1 ملن تونناعا ارتىپ، 6 ملن-عا جەتتى. مۇنىمەن شەكتەلىپ قالماي، جىلىنا 400 مىڭ توننا اۋە كەروسينىن دە وندىرەدى. ەلىمىزدە شىعارىلاتىن مۇناي ونىمدەرىنىڭ ۇشتەن ءبىرى وسى زاۋىتقا تيەسىلى. ەندىگى جەردە زاۋىتتىڭ بارلىق وندىرىستىك پروتسەستەرى ءبىر جەردەن باسقارىلادى. مۇنداعى تەحنولوگيالار ساندىق جۇيەگە كوشىرىلىپ، وپەراتورلار زاماناۋي اۆتوماتتاندىرىلعان تسيفرلىق  جۇيەنى پايدالانۋدا. جاڭعىرتۋ اياسىندا مۇندا 11 تەحنولوگيالىق قوندىرعى مەن جالپى زاۋىت شارۋاشىلىعىنىڭ 29 نىسانى سالىنعان بولاتىن.

«بۇل جوبانىڭ ماقساتى جوعارى وكتاندى بەنزين الۋ، ديزەل وتىنىن ءوندىرۋ، سىعىمدالعان گازدى ماقساتتى پايدالانۋ بولاتىن. قازىر جۇمىستىڭ بارلىعى اۆتوماتتى تۇردە جولعا قويىلعان. بىزدەگى ماماندار بىلىكتى. تسيفرلىق جۇيەمەن جۇمىس جاساي بىلەدى. زاۋىتتىڭ جۇمىسىن جانداندىرۋ ءۇشىن جاڭعىرتۋ قاجەت. قازىر وسىنىڭ ارقاسىندا مازۋتتان جوعارى وكتاندى جانار-جاعارماي شىعارۋدامىز»، – دەدى شىمكەنت مۇناي وڭدەۋ زاۋىتىنىڭ №3 تسەح باسشىسىنىڭ ورىنباسارى مۇرات تاپبەرگەنوۆ.

Abai.kz