ۇكىمەت قازاقتىڭ «اۋليەكول» اسىل تۇقىمدى ءىرى قاراسىن سۋبسيديادان نەگە قالىس قالدىردى؟ – بۇل جونىندە بۇگىن ءماجىلىستىڭ پلەنارلىق وتىرىسىندا «اق جول» پارلامەنتتىك فراكتسياسىنىڭ دەپۋتاتى ەرلان بارلىباەۆ قر پرەمەر-ءمينيسترىنىڭ ورىنباسارى، اۋىل شارۋاشىلىعى ءمينيسترى ومىرزاق شوكەەۆتىڭ اتىنا دەپۋتاتتىق ساۋال جولدادى.

«وسى جىلى ۇكىمەت اسىل تۇقىمدى مالدىڭ ونىمدىلىگىن ارتتىرۋ ءۇشىن سۋبسيديانىڭ جاڭا ەرەجەلەرىن بەكىتتى. الايدا، ەرەجەدە وتاندىق ءىرى قارا مالدىڭ ەتتى تۇقىمدارىنىڭ سانىن ۇلعايتۋدى ىنتالاندىرۋ شارالارى قاراستىرىلماعان. ياعني، يمپورتتىق انالىق مال باسىن سۋبسيديالاۋدى ساقتاپ قالىپ، ال وتاندىق اسىل تۇقىمدى تانالاردى ساتىپ الۋ مەملەكەتتىك قولداۋدان تىس قالىپ وتىر»، - دەپ مالىمدەدى بارلىباەۆ.

دەپۋتاتتىڭ ايتۋىنشا، ەلىمىزگە كەز-كەلگەن تۇقىمنىڭ انالىق مال باسىن اكەلىپ، ول ءۇشىن سۋبسيديا الۋعا بولادى. دەگەنمەن، اۋليەكول تۇقىمى قازاقستاننان باسقا جەردە جوق، سوندىقتان ونى ەشقايدان اكەلە المايمىز. ەگەر ەلىمىزدە اسىل تۇقىمدى انالىق باستى ساتىپ الۋدى سۋبسيديالاۋ توقتاتىلسا، ەت وندىرۋشىلەر تولىعىمەن يمپورتتىق اسىل تۇقىمداردى اكەلۋگە ءماجبۇر بولادى. وسىنىڭ سالدارىنان ۋاقىت وتە كەلە جالعىز قازاقستاندىق، ەكسپورتتىق پوتەنتسيالى جوعارى تۇقىمنىڭ سانى ازايادى.

ەستەرىڭىزگە سالا كەتەيىك، 1992 جىلى ەلىمىزدە جاڭا اۋليەكول ارنايى ەتتى ءىرى قارا تۇقىمىن شىعارۋ جۇمىستارى ءساتتى اياقتالدى. وسى جۇمىسقا وتاندىق سەلەكتسيونەرلەر مەن عالىمداردىڭ 30 جىل قاجىرلى ەڭبەگى مەن ءومىرى ارنالدى. ءدال وسى اۋليەكول تۇقىمى قازاقستاندىق برەندكە اينالا الاتىن وتاندىق سەلەكتسيانىڭ العاشقى جانە ازىرگە جالعىز جەتىستىگى بولىپ وتىر.

قازاقستاندا ەت ءوندىرىسى، اۋىل شارۋاشىلعىنىڭ ەڭ نەگىزگى جانە باسىم سالاسىنىڭ ءبىرى بولىپ تابىلادى. ەلباسى 2014 جىلعى جولداۋىندا ەلىمىزدى اسا ءىرى ايماقتىق ەت ەكسپورتيورى ەتۋ جونىندە مىندەت قويعان.

«بىراق، مەملەكەت يمپورتتى سۋبسيديالاۋعا جانە شەتەلدىك ءىرى قارانى باعىپ قاعۋعا اجەپتەۋىر قاراجات ءبولىپ، ال قازاقتىڭ «اۋليەكول» اسىل تۇقىمىن نازاردان تىس قالدىرىپ وتىر»، - دەپ اتاپ ءوتتى حالىق قالاۋلىسى.

ايتا كەتكەن ءجون،ببۇل تۇقىمنىڭ ەڭ باستى ەرەكشەلىگى - ول ءبىزدىڭ قاتاڭ كليماتقا بەيىمدىلىگى جانە ەتىنىڭ جوعارى ساپاسى. تولدەۋ قابىلەتى وتە جوعارى، ورتاشا كورسەتكىشى 80-85 پايىز، جاقسى كۇتىم كورسە 97-100 پايىزعا جەتەدى.

وسىلايشا، «اق جول» دەموكراتيالىق پارتياسىنىڭ فراكتسياسى وتاندىق سەلەكتسيا جەتىستىگىن ساقتاپ قالۋ ءۇشىن ۇكىمەتتەن ءتيىستى مەملەكەتتىك قولداۋ شارالارىن قاراستىرۋدى سۇرادى.

Abai.kz