قازاقستاندا مەملەكەتتىك قىزمەتتىڭ 78% ەلەكتروندى فورماتتا كورسەتىلەدى جانە الداعى ەكى جىلدا بۇل كورسەتكىش 90%-كە جەتەدى.

بۇل تۋرالى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ استانادا ازيا جانە تىنىق مۇحيت ايماعىنىڭ ەلدەرى ءۇشىن كوررۋپتسياعا قارسى باستامالاردىڭ قوعامدىق پاراساتتىلىق جەلىسىنىڭ مەملەكەتتىك ساتىپ الۋلار سالاسىنداعى سىبايلاس جەمقورلىقتىڭ الدىن الۋ ماسەلەلەرىنە ارنالعان كەزەكتى وتىرىسىندا ايتتى.

ءوز سوزىندە اگەنتتىك باسشىسى كاسىبي جانە سىبايلاس جەمقورلىقتان ازات مەملەكەت قالىپتاستىرۋدا قازاقستاننىڭ بىرنەشە ماڭىزدى كەزەڭنەن وتكەنىن اتاپ ءوتتى.

«1995 جىلدىڭ وزىندە ءبىز تمد ەلدەرى ءۇشىن ۇلگى بولعان سىبايلاس جەمقورلىققا قارسى كۇرەس تۋرالى زاڭدى جانە «سىبايلاس جەمقورلىقپەن كۇرەس» باعدارلاماسىن قابىلدادىق. سول كەزدەرى مەملەكەتتىك قىزمەت تۋرالى زاڭ قابىلدانىپ، اگەنتتىك مارتەبەسىندەگى ۋاكىلەتتى ورگان قۇرىلدى. 2015-2025 جىلدارعا ارنالعان قر سىبايلاس جەمقورلىققا قارسى ستراتەگياسى قابىلداندى. ەلىمىزدەگى مەملەكەتتىك باسقارۋدىڭ تەرەڭ ينستيتۋتتسيونالدىق رەفورمالارىنىڭ جول كارتاسىنا اينالعان «100 ناقتى قادام» ۇلت جوسپارىن» ىسكە اسىرۋ دا مەملەكەتتىك قىزمەت جۇيەسىن جانە سىبايلاس جەمقورلىققا قارسى ساياساتىن جاڭعىرتۋعا ەلەۋلى ۇلەس قوستى»، - دەپ اتاپ ءوتتى اليك شپەكباەۆ.

ونىڭ ايتۋىنشا، قازاقستاندا كاسىبي جانە قارجىلاي ىنتالاندىرىلعان اشىق جانە ەسەپ بەرۋشى مەملەكەتتىك اپپارات قالىپتاستى جانە زاڭنىڭ ۇستەمدىگى مەن قاتاڭ جازالاۋ پرينتسيپتەرىنىڭ ساقتالۋى قامتاماسىز ەتىلدى. مەملەكەتتىك قىزمەتتەردى تسيفرلاندىرۋ بويىنشا دا ناقتى جۇمىس جۇرگىزىلىپ كەلەدى.

«قازىرگى ۋاقىتتا كوسەتىلەتىن قىزمەتتىڭ 78% ەلەكتروندى فورماتتا. جاقىن ەكى جىلدىڭ ىشىندە ونى 90%-كە جەتكىزۋ جوسپارلانۋدا. بۇگىنگى كۇننىڭ وزىندە قازاقستان بۇۇ ءتيىستى رەيتينگىندە ەلەكتروندى ۇكىمەتتى دامىتۋدىڭ جوعارى دەڭگەيى بار ەلدەردىڭ قاتارىنا كىرىپ تۇر»، - دەيدى اگەنتتىك توراعاسى.

قازاقستان بۇۇ سىبايلاس جەمقورلىققا قارسى كونۆەنتسياسىن راتيفيكاتسيالاپ، ەىدۇ سىبايلاس جەمقورلىققا قارسى ىستانبۇل ءىس-قيمىل جوسپارىنا قوسىلعان. 2025 جىلى قىلمىستىڭ الدىن الۋ مەن قىلمىستىق سوت تورەلىگى جونىندە بۇۇ كونگرەسىن وتكىزۋگە دايىندىق ءجۇرىپ جاتىر.

«مۇنىڭ ءبارى بىزگە ەڭ ۇزدىك حالىقارالىق تاجىريبەلەر مەن قوعامدىق قۇرىلىمداردىڭ ەرەكشەلىكتەرىن ۇتىمدى ۇلەستىرىپ سىبايلاس جەمقورلىققا قارسى كۇرەستە ءوز ۇلگىمىزدى قۇرۋعا مۇمكىندىك بەرەدى»، - دەدى اليك شپەكباەۆ.

Abai.kz