"Mağdenli Yer Hizmetleri ve Taşıma Anonim Şirketi" كومپانياسى 2015 جىلى ناۋرىزدا اربيتراج تريبۋنالىنا قازاقستان ۇكىمەتىنە قارسى شاعىم تۇسىرگەن. تۇركيالىق كومپانيا "اتىراۋ" الەۋمەتتىك-كاسىپكەرلىك كورپوراتسياسى" اكتسيونەرلىك قوعامىمەن بىرگە "اتما" اتىراۋ اۋەجايى جانە تاسىمالداۋ" اكتسيونەرلىك قوعامىنىڭ قۇرىلتايشىسى سانادى.

مينيسترلىك مالىمەتىنشە، تۇركيالىق كومپانيا ارىزىندا قازاقستاندى اتىراۋ حالىقارالىق اۋەجايىن قۇرۋ ارقىلى جانارماي جەتكىزۋ، جۇك قىزمەتى جانە تىكۇشاقتارعا قىزمەت كورسەتۋ مۇمكىندىكتەرىنەن ايىردى دەپ ايىپتاعان. شاعىمدانۋشى سونىمەن قاتار قازاقستاننان ءوزىنىڭ "اتما" اتىراۋ اۋەجايى جانە تاسىمالداۋ" اكتسيونەرلىك قوعامىنا سالعان قوسىمشا ينۆەستيتسياسىن (16 ميلليون دوللار) وتەۋىن تالاپ ەتكەن.

ادىلەت مينيسترلىگى اربيتراج تريبۋنالى 8 قاراشا كۇنى شىعارعان شەشىمىندە قازاقستان بيلىگى جانارماي جەتكىزۋ، جۇك قىزمەتى جانە تىكۇشاقتارعا قىزمەت كورسەتۋ بويىنشا قىزمەتتەردى مەنشىكتەپ الۋ ارەكەتتەرىن جاسامادى جانە شاعىمدانۋشىنىڭ قوسىمشا ينۆەستيتسياسىن قايتارىپ الۋىنا كەدەرگى كەلتىرمەدى دەپ تانىعانىن ايتادى.

رەسمي اقپارات بويىنشا، تريبۋنال قازاقستان ۇكىمەتى "شاعىمدانۋشىنىڭ قوسىمشا ينۆەستيتسياسىن قايتارۋعا مىندەتتى ەمەس جانە قازاقستان شەتەل ينۆەستيتسياسىن قورعاۋ جوننىدەگى حالىقارالىق مىندەتتەمەلەرىن تولىق ورىندادى" دەگەن قورىتىندى جاساعان.

Abai.kz