قازاقستان پرەزيدەنتى «استانا» حالىقارالىق قارجى ورتالىعىنىڭ بيرجاسىنداعى العاشقى ساۋدا-ساتتىقتى باستاۋ راسىمىنە قاتىستى.

مەملەكەت باسشىسى ءىس-شارادا سويلەگەن سوزىندە «استانا» حالىقارالىق قارجى ورتالىعىنىڭ بيرجاسىنداعى العاشقى ساۋدا-ساتتىقتى باستاۋ ءراسىمىنىڭ ۇلتتىق ۆاليۋتامىز – تەڭگەنىڭ 25 جىلدىق مەرەيتويى قارساڭىندا ءوتۋىنىڭ سيمۆولدىق ءمانى زور ەكەنىن ايتتى.

نۇرسۇلتان نازارباەۆ ءتول تەڭگەمىزدى ەنگىزۋ ءوز قارجى جۇيەمىزدى قالىپتاستىرىپ، مەملەكەتىمىزدىڭ ەكونوميكالىق دەربەستىگىن قامتاماسىز ەتۋگە مۇمكىندىك بەرگەنىن اتاپ ءوتتى.

– سودان بەرى قازاقستان ەكونوميكاسى ەداۋىر ءوسىپ، حالىقتىڭ تۇرمىس دەڭگەيى دە ارتتى. اۋقىمدى رەفورمالار جۇرگىزىلىپ جاتىر. «استانا» حالىقارالىق قارجى ورتالىعىنىڭ ىسكە قوسىلۋى – ەلىمىزدى ودان ءارى ورنىقتى دامىتۋدىڭ ماڭىزدى قادامى، – دەدى ەلباسى.

قازاقستان پرەزيدەنتى راسىمگە قاتىسۋشىلارعا الەمدىك ۋران نارىعىنىڭ 20 پايىزعا جۋىعىن قامتيتىن «قازاتومونەركاسىپ» ۇلتتىق كومپانياسى بۇگىن ءىرو-عا العاش رەت شىعىپ وتىرعانىن ايتتى.

– كەلەشەكتە ءبىز «قازاقتەلەكوم»، «ەير استانا»، «قازمۇنايگاز» جانە وزگە دە ۇلتتىق كومپانيالاردىڭ اكتيۆتەرىن ساتىلىمعا شىعارۋدى جوسپارلاپ وتىرمىز. «استانا» حالىقارالىق قارجى ورتالىعى ەلىمىزگە شەت ەلدەردىڭ كاپيتالىن تارتۋدىڭ قۇرالىنا اينالىپ، قور نارىعىن دامۋدىڭ جاڭا دەڭگەيىنە شىعارۋعا ءتيىس. مۇندا الەمنىڭ ۇزدىك تاجىريبەلەرى جاپپاي قولدانىلىپ، تاجىريبەلى سەرىكتەستەر مەن ساراپشىلار تارتىلعان، سونداي-اق ونىڭ جۇمىسىنا قاتىسۋشىلار ءۇشىن تەڭدەسسىز جاعدايلار جاسالعان، – دەدى مەملەكەت باسشىسى.

نۇرسۇلتان نازارباەۆ كەلەشەكتە «استانا» حالىقارالىق قارجى ورتالىعى ءوڭىردىڭ باستى قارجى حابىنا اينالىپ، ازيانىڭ ۇزدىك قارجى ورتالىقتارىنىڭ قاتارىنا قوسىلۋعا ءتيىس ەكەنىن اتاپ ءوتتى.

– قارجى ورتالىعى قازىردىڭ وزىندە ەلوردامىزعا «قارجى استاناسى» دەگەن جاڭا مارتەبە بەردى. جاھاندىق قارجى ورتالىقتارىنىڭ رەيتينگىندە باس قالامىز تەك سوڭعى جىلدىڭ وزىندە 27 ساتىعا كوتەرىلدى. استانا تۇرعىندار مەن ەلوردا قوناقتارى ءۇشىن مەيلىنشە قولايلى جاعداي جاسالاتىن «اقىلدى قالا» رەتىندە ودان ءارى دامي بەرەدى، – دەدى ەلباسى.

سوڭىندا قازاقستان پرەزيدەنتى مەملەكەتىمىزدىڭ بارلىق باستامالارى حالقىمىزدىڭ ءال-اۋقاتى مەن ەلىمىزدىڭ جاھاندىق باسەكەگە قابىلەتتىلىگىن ارتتىرۋعا باعىتتالعانىن ايتتى.

Abai.kz