زاعيپ بالالار لايىقتى ءبىلىم الۋعا قۇقىلى – بۇل تۋرالى بۇگىن كەڭەس ءابساتيروۆ ءماجىلىستىڭ پلەنارلىق وتىرىسىندا مالىمدەدى.

«مۇمكىندىكتەرى شەكتەۋلى جاندار ءۇشىن قولايلى جاعداي جاساۋ مەملەكەتتىڭ الەۋمەتتىك ساياساتتاعى باسىمدىقتارىنىڭ ءبىرى بولىپ تابىلادى. نىسانداردىڭ قولجەتىمدىلىگىمەن قوسا اقپاراتتىق جانە سيگنالدىق ستەندتەردى ورناتۋ جانە ت.ب. ەرەكشە قاجەتتىلىكتەرى بار بالالار ءۇشىن ينكليۋزيۆتى ءبىلىم بەرۋدى ەنگىزۋ بويىنشا دا شارالار قابىلدانۋدا.

سوعان قاراماستان، مامانداردىڭ پايىمداۋىنشا، ءبىلىم جانە عىلىم مينيسترلىگىنىڭ جالپى ءبىلىم بەرەتىن مەكتەپتەردە ينكليۋزيۆتى وقىتۋدى دامىتۋ بويىنشا اتقارىپ جاتقان شارالارى كوزى ناشار كورەتىن جانە كوزى كورمەيتىن زاعيپ بالالارعا ارنالماعان. كەيبىر دەرەكتەرگە سۇيەنسەك، ولاردىڭ سانى 3 مىڭنان اسادى. زاعيپ بالالار تولىققاندى ءومىر سۇرۋگە، سونىڭ ىشىندە – كونستيتۋتسيادا كەپىلدىك بەرىلگەن تەگىن ورتا ءبىلىم الۋعا قۇقىلى. بىراق ولار ءتىپتى، جالپى ءبىلىم بەرەتىن مەكتەپتەردىڭ تۇزەتۋ سىنىپتارىندا دا وقي الماي، ارنايى مەكتەپ-ينتەرناتتاردا ءبىلىم الۋدا»، - دەلىنگەن ءبىلىم ءمينيسترىنىڭ اتىنا جولدانعان فراكتسيانىڭ دەپۋتاتتىق ساۋالىندا.

دەپۋتات اتاپ وتكەندەي، قازىرگى قولدانىستاعى مەكتەپ-ينتەرناتتارى مەكتەپ جاسىنداعى بارلىق كورۋ قابىلەتى ناشار جانە زاعيپ بالالاردى تولىق قامتىمايدى. ونىڭ ۇستىنە، مۇنداي مەكتەپتەر بۇكىل وبلىستاردا جوق. سوڭعى 3 جىلدا كاسىپكەرلەردىڭ دەمەۋشىلىگىمەن «دارا» جەكەمەنشىك قايىرىمدىلىق قورى زاعيپ بالالارعا ارنالعان سىنىپتاردى استانا، اقتاۋ جانە اقتوبە قالالارىندا اشقان. مەكتەپكە دەيىنگى مەكەمەلەردە مامانداندىرىلعان توپتار وتە سيرەك كەزدەسەدى، جوقتىڭ قاسى دەسە دە بولادى.

ءابساتيروۆتىڭ ايتۋىنشا، اتالمىش ءبىلىم بەرۋ مەكەمەلەرىندە ارناۋلى قارىپپەن جازىلعان كىتاپتار، تيفلوداپتەرلەر، تيفلوجابدىقتار جانە ت.ب. جەتىسپەيدى. ۇلعايتىلعان قارىپتەرمەن جانە برايل ارىپتەرىمەن وقۋلىقتار مەن وقۋ-ادىستەمەلىك قۇرالدارىن شىعاراتىن ەلىمىزدەگى جالعىز مەكەمە ولاردى تەك 1 جانە 2-سىنىپتارعا ارناپ شىعارادى. بۇنداي وقۋلىقتاردىڭ باعاسى16 مىڭ تەڭگەدەن باستالادى جانە ودان جوعارى،

ءدال وسىنداي ساناتتاعى بالالارمەن جۇمىس ىستەۋدە تۋىندايتىن كەلەسى ءبىر ماسەلە تيفلوپەداگوگ- مۇعالىمدەردىڭ جەتىسپەۋشىلىگى.

ەلىمىزدەگى كوپتەگەن پەداگوگيكالىق جوعارعى وقۋ ورىندارىنىڭ «دەفەكتولوگيا» كافەدرالارىندا پسيحولوگتار، لوگوپەدتەردى، سۋردو جانە وليگوفرەنوپەداگوگتاردى دايىندايدى. تەك ءبىر عانا جوعارعى وقۋ ورنى – اباي اتىنداعى پەداگوگيكالىق ۋنيۆەرسيتەت تيفلوپەداگوگتاردى وقىتادى.

«دارا» قورى بۇل ولقىلىقتىڭ دا ورنىن تولتىرۋعا تىرىسىپ، رەسەيدەن ارنايى مامانداردى شاقىرتىپ، يا بولماسا وزدەرى دايىنداپ شىعارعان پەداگوگتاردى تارتۋ ارقىلى ءتۇرلى سەمينارلار مەن شەبەرلىك-سىنىپتارىن ۇيىمداستىرۋدا. مامانداردىڭ پىكىرىنشە، كوزى ءناشار كورەتىن نەمەسە مۇلدەم كورمەيتىن بالالاردى وقىتۋ ءۇشىن ولاردىڭ جەكە تۇلعالىق ەرەكشەلىكتەرىن ەسكەرە وتىرىپ جاسالعان ءبىلىم بەرۋدىڭ يكەمدى مەملەكەتتىك ستاندارتتارىن ازىرلەۋدى تالاپ ەتەدى.

جوعارىدا ايتىلعانداردى ەسكەرە وتىرىپ، سونداي-اق پرەزيدەنتتىڭ بيىلعى جولداۋىندا باياندالعان نۇسقاۋلاردى نازارعا الا وتىرىپ، «اق جول» پارتياسىنىڭ فراكتسياسى ءبىلىم جانە عىلىم مينيسترلىگىنە بىرقاتار ۇسىنىستارىن جولدادى، سونىڭ ىشىندە: زاعيپ جاندارعا ءبىلىم بەرەتىن تيفلوپەداگوگتاردى دايىنداۋ بويىنشا مەملەكەتتىك تاپسىرىستى ۇلعايتۋ; مەكتەپكە دەيىنگى ءبىلىم بەرۋ مەكەمەلەرىندە زاعيپ جانە كورۋ قابىلەتى ناشار بالالارعا ارنالعان توپتاردى قۇرۋ; قازاقستاننىڭ ءار ايماعىندا كوزى كورمەيتىن جانە ناشار كورەتىن بالالارعا ارنالعان مەكتەپ-ينتەرناتتارىن اشۋدى ۇسىندى.

سونىمەن قاتار، «اق جول» دەپۋتاتتارى «پەداگوگتاردىڭ مارتەبەسى تۋرالى» زاڭدى ازىرلەۋ كەزىندە ەرەكشە قاجەتتىلىكتەرى بار بالالارمەن جۇمىس ىستەيتىن مۇعالىمدەردىڭ ەڭبەگىن ىنتالاندىرۋدى قاراستىرۋىن سۇرادى.

«اق جول» قدپ سايلاۋالدى باعدارلاماسىن جۇزەگە اسىرۋ جانە ءوز سايلاۋشىلارىنىڭ مۇددەسىن قورعاۋ بويىنشا جۇمىستاردى جالعاستىرۋدا.

Abai.kz