«ولار نەگىزىنەن بيلىكتە ىستەيتىن نەمەسە كۇش قۇرىلىمىندا بايلانىسى بار ادامدار. ولار 5-6 موتورلى قايىقپەن كەلىپ، كۇنىنە مىڭعا جۋىق جابايى قۇستاردى اتادى»، - دەگەن جەرگىلىكتى اڭشى.

جەرگىلىكتى تۇرعىنداردىڭ ايتۋىنشا، اتىلعان قۇس ەتى بازارلاردا ساتىلىپ جاتىر.

«تاپشىلىقتىڭ سالدارىنان ءبىز جابايى قۇستاردىڭ ەتىن ساتىپ الىپ جاتىرمىز. ولار جارتى كەلى ەتتى 40 ماناتقا ساتىپ جاتىر»، - دەدى ەسەنگۋلى اۋدانىنىڭ اڭشىسى تىلشىگە بەرگەن سۇقباتىندا. (تۇركىمەنستان ورتالىق بانك باعامى بويىنشا 1 اقش دوللارى - 3.5 مانات)

جابايى قۇستاردان بولەك، اقبوكەندەر قازاق دالاسىنداعى قالىڭ قىستان قاشىپ كەلىپ جاتىر. «بالكان ءۋالاياتىنىڭ سولتۇستىگىندەگى چولۋن گىرى، بەگارسلان جانە گاپلانگىر قورىقتارىنا قازاق دالاسىنان اقبوكەندەر اۋىپ كەلىپ جاتىر. بىراق مۇنداي قاستەرلى اڭداردى دا قاسكويلەر اتىپ جاتىر»، - دەيدى قۇقىق قورعاۋ ورگاندارىنداعى قىزمەتكەر.

ونىڭ سوزىنشە، اقبوكەندەردى ءولتىرىپ جاتىر دەگەن حابار جەتكەن سوڭ، پوليتسيا قىزمەتكەرلەرى جازىق دالاعا شىققان. «ءبىز كولىكتەگى تسيستەرنادان قان اعىپ جاتقانىن بايقادىق. بارىپ تەكسەرسەك، 43 كيىكتى ءولتىرىپ، تسيستەرناعا تىعىپ تاستاپتى»، - دەيدى جەرگىلىكتى پوليتسيا وكىلى.

Abai.kz