پارلامەنت سەناتى توراعاسىنىڭ ورىنباسارى بەكتاس بەكنازاروۆ باستاعان قازاقستاندىق دەلەگاتسيا 15-16 قاراشا كۇندەرى دۋبايدا وتكەن دۇنيەجۇزىلىك توزىمدىلىك سامميتىنە قاتىستى.

«ءپليۋراليزمنىڭ كومەگىمەن وركەندەۋ: يننوۆاتسيالار مەن ىنتىماقتاستىق ارقىلى الۋان تۇرلىلىكتى قولداۋ» تاقىرىبىنداعى فورۋم جۇمىسىنا ۇكىمەت، زاڭ شىعارۋ ورگاندارىنىڭ باسشىلارى، حالىقارالىق، ۇكىمەتتىك ەمەس جانە ءدىني ۇيىمداردىڭ وكىلدەرى قاتىستى. قازاقستاندىق دەلەگاتسيا قۇرامىندا سەناتور مۇرات باقتيارۇلى جانە قوعامدىق دامۋ ءمينيسترىنىڭ ورىنباسارى بەرىك ارىن بولدى.

سامميت بارىسىندا توزىمدىلىك ماسەلەلەرىنىڭ ءارتۇرلى كورىنىستەرى جان-جاقتى قارالدى. ءسوز العانداردىڭ باسىم بولىگى ساپالى ءبىلىم بەرۋ باعدارلامالارى، سونداي-اق وتباسىنداعى تاربيە ارقىلى جاستاردى تاربيەلەۋ جانە ولاردىڭ بويىندا توزىمدىلىك قۇندىلىقتارىن دامىتۋدىڭ ماڭىزدىلىعىن اتاپ ءوتتى. ساراپشىلار اتالعان سالانىڭ قىزمەتى باعدارلامالىق جانە كەشەندى سيپاتتا بولىپ، بارلىق مەملەكەتتەردىڭ ۇكىمەتتەرى ءۇشىن باسىم سالانىڭ ءبىرى بولۋى كەرەك دەگەن ورتاق پىكىرگە كەلدى. سونىمەن قاتار، مەملەكەتتىك جانە قوعامدىق قۇرىلىمدار مەن بۇقارالىق اقپارات قۇرالدارىنىڭ مۇمكىندىكتەرى مەن الەۋەتىن پايدالانۋ قاجەتتىگى دە ايتىلدى.

قاتىسۋشىلار ءارتۇرلى دەڭگەيدە بىرەگەي تاجىريبەلەردىڭ جيناقتالعانىن جانە ونى بىرىكتىرۋ ءارى ۇيلەستىرۋ كەرەكتىگىن دە اتاپ ءوتتى. توزىمدىلىكتى ىلگەرىلەتۋگە، سونىڭ ىشىندە دىنارالىق جانە ەتنوسارالىق داۋلاردىڭ، سونداي-اق ەكسترەميزم مەن راديكاليزمنىڭ الدىن الۋعا  باعىتتالعان ۇلتتىق جانە حالىقارالىق شارالارعا باعدارلانۋ قاجەتتىگى دە بىرنەشە مارتە اتالىپ ءوتىلدى. شارا بارىسىندا ءتۇرلى قاۋىمداستىقتار اراسىنداعى مادەنيەتارالىق بايلانىستار مەن حالىقارالىق قاتىناستاردى دامىتۋ، ادام قۇقىقتارىن قامتاماسىز ەتۋ اياسىندا ءدىني، ناسىلدىك، ەتنوستىق جانە باسقا دا بەلگىلەر بويىنشا كەمسىتۋگە جول بەرمەۋ تۋرالى ايتىلدى.

قابىلداۋشى تاراپ وكىلدەرى حالىقارالىق قوعامداستىققا بىرىككەن اراب امىرلىكتەرىندە قۇرىلعان ەڭبەك، ءبىلىم بەرۋ، ءدىني، پەنيتەنتسيارلىق جانە باسقا دا ءتۇرلى سالالاردا توزىمدىلىكتى قولداۋ مەن كۇشەيتۋ ينستيتۋتتارى مەن تەتىكتەرى تۋرالى جان-جاقتى حاباردار ەتتى. سونداي-اق، توزىمدىلىك پەن قوعامدىق كەلىسىمدى قامتاماسىز ەتۋدە قول جەتكەن جەتىستىكتەرى مەن تاجىريبەسىن بولىسۋگە ءازىر ەكەنىن ءبىلدىردى. ءارتۇرلى 200 ەتنوس وكىلدەرى تۇرىپ جاتقان اراب امىرلىكتەرى ەل ەكونوميكاسىنىڭ جانە حالىقتىڭ ءال-اۋقاتىنىڭ  دامۋىنا ىقپال ەتەتىن وزىندىك توزىمدىلىك ۇلگىسىن قالىپتاستىردى دەپ ايتۋعا بولادى.

دۇنيەجۇزىلىك توزىمدىلىك ءسامميتى مازمۇندى ءارى جوعارى ۇيىمداستىرۋشىلىق دەڭگەيىندە ءوتتى. كوپتەگەن قاتىسۋشىلار، سونىڭ ىشىندە قازاقستان دەلەگاتسياسى دا وسى فورۋمدى الەمدىك دەڭگەيدەگى تۇراقتى ۇنقاتىسۋ الاڭىنا اينالدىرۋ تۋرالى ويلارىن ءبىلدىردى.

سامميت اياسىندا پارلامەنت سەناتى توراعاسىنىڭ ورىنباسارى بەكتاس بەكنازاروۆ ءباا ۇلتتىق فەدەرالدىق مەدجلىسىنىڭ توراعاسى، دوكتور امال ءال-كۋبەيسيمەن كەزدەستى. تاراپتار ەكىجاقتى قاتىناستاردىڭ جاي-كۇيىن وڭ باعالادى جانە پارلامەنتارالىق ديپلوماتيانى ودان ءارى دامىتۋعا سەنىم ءبىلدىردى.

قازاقستان رەسپۋبليكاسى پارلامەنتى

سەناتىنىڭ ءباسپاسوز قىزمەتى

Abai.kz