"باستى دەرجاۆالار اراسىنداعى قارىم-قاتىناستاردىڭ تەكەتىرەستىك سيپاتى بىرتە-بىرتە شيەلەنىستى تارقاتۋعا باعىتتالعان XX عاسىرداعى ءتيىمدى تەتىكتەردىڭ كۇيرەۋىنە اكەلە جاتىر. بۇل شىعىس-باتىس باعىتى بويىنشا قارۋلانۋدىڭ بەلەڭ الۋىنا اكەپ سوقتىراتىن اسكەري الەۋەتتىڭ شەكتەن تىس ارتۋىنا سەبەپ بولادى", – دەدى قازاقستان پرەزيدەنتى.

ەلباسى يادرولىق دەرجاۆالاردىڭ جاۋاپكەرشىلىك تانىتىپ، قارۋ-جاراقتاردى تاراتپاۋ جانە قارۋسىزدانۋ قاعيداتتارى مەن يدەيالارىنا ادالدىعىن كورسەتۋگە ءتيىس ەكەنىن ايتتى.

"ديالوگ پەن سەنىمدى قالپىنا كەلتىرۋ كەڭ اۋقىمدى يادرولىق داعدارىسقا يتەرمەلەيتىن ءتۇرلى جاعدايلاردىڭ تۋىنداۋ قاتەرىن ورشىتپەۋدىڭ بەرىك كەپىلى بولماق. مەن كوپتەگەن جىلدار بويى الەمدىك قوعامداستىق الدىندا بۇكىل ادامزات ءۇشىن ەڭ نەگىزگى ماسەلە رەتىندە يادرولىق قارۋ-جاراقتى تاراتپاۋ رەجىمىن كۇشەيتۋ ماسەلەسىن كوتەرىپ كەلەمىن. بۇعان قازاقستاننىڭ جاھاندىق انتيادرولىق قوزعالىسقا زور ۇلەس قوسقان مەملەكەت رەتىندە مورالدىق تۇرعىدان تولىق قۇقى بار", – دەدى نۇرسۇلتان نازارباەۆ.

بيىل قازان ايىندا اقش پرەزيدەنتى دونالد ترامپ قۇراما شتاتتار رەسەيمەن ورتا جانە شاعىن قاشىقتىقتاعى زىمىراندار جونىندە كەلىسىمنەن شىعۋعا نيەتتى ەكەنىن مالىمدەگەن. وعان سەبەپ، رەسەي كەلىسىمدى بۇزىپ، ەۋروپاعا يادرولىق وقتۇمسىق تاسىمالدايتىن شاعىن زىمىراندار ورناتىپ جاتىر دەدى. بۇل ايىپتاۋلاردى تەرىسكە شىعارعان رەسەي ۆاشينگتونعا جاۋاپ رەتىندە "اسكەري-تەحنيكالىق تۇرعىدان ءتيىستى شارا قولدانامىز" دەدى.

Abai.kz