نۇرسۇلتان نازارباەۆ پارلامەنت ءماجىلىسىنىڭ دەپۋتاتى، «اق جول» دەموكراتيالىق پارتياسى فراكتسياسىنىڭ جەتەكشىسى ازات پەرۋاشەۆپەن كەزدەستى، دەپ حابارلايدى اقوردانىڭ رەسمي سايتى.

كەزدەسۋ بارىسىندا مەملەكەت باسشىسىنا «اق جول» دەموكراتيالىق پارتياسى مەن ونىڭ پارلامەنت ماجىلىسىندەگى فراكتسياسىنىڭ جۇمىسى جونىندە مالىمەت بەرىلدى.

قازاقستان پرەزيدەنتى «اق جول» دەموكراتيالىق پارتياسىنىڭ مەملەكەتتىك ساياساتتى جۇزەگە اسىرۋ جانە ونىڭ نەگىزگى باسىمدىقتارىن حالىققا ءتۇسىندىرۋ ۇدەرىسىندەگى ءرولىن ەرەكشە اتاپ ءوتتى.

– ءسىز ەلىمىزدەگى تاجىريبەلى پارلامەنت دەپۋتاتتارىنىڭ ءبىرى رەتىندە ۇزاق جىلداردان بەرى «اق جول» پارتياسىنا باسشىلىق ەتىپ كەلەسىز. پارتيالارىڭىز ناقتى جۇمىستار اتقارۋدا. مەملەكەتتىڭ جۇرگىزىپ جاتقان ساياساتىنا قولداۋ ءبىلدىرىپ، حالىق بىرلىگىن نىعايتۋ ىسىنە ءوز ۇلەستەرىڭىزدى قوسىپ وتىرسىزدار، – دەدى ەلباسى.

ا.پەرۋاشەۆ پارتيا فراكتسياسىنىڭ بيىلعى جولداۋدىڭ نەگىزگى باعىتتارىن ورىنداۋ، سونىڭ ىشىندە «بيزنەستىڭ جول كارتاسى-2020»، «يندۋستريالىق-يننوۆاتسيالىق دامۋ» باعدارلامالارىن ودان ءارى جۇزەگە اسىرۋعا جانە وتاندىق بيزنەستى قولداۋ ماقساتىمەن قابىلدانىپ جاتقان شارالارعا قاتىستى ۇسىنىستار ەنگىزۋ جونىندەگى جۇمىستارىن اتاپ ءوتتى.

Abai.kz