ەلباسى ن.نازارباەۆتىڭ «ۇلى دالانىڭ جەتى قىرى» اتتى ماقالاسىنا وراي تۇركىستان وبلىسىنىڭ وڭىرلىك كوممۋنيكاتسيالىق قىزمەتىندە ءباسپاسوز ءماسليحاتى ءوتتى. بريفينگكە قاتىسقان «ساق» كينوستۋدياسىنىڭ ديرەكتورى نۇريددين پاتتەەۆ پرەزيدەنت ماقالاسىنداعى قويىلعان ماقساتتار توڭىرەگىندە تۇركىستان وبلىسىندا جۇزەگە اسقان جوبالارعا توقتالدى،- دەپ حابارلايدى قازاقپارات ءتىلشىسى.

نۇريددين پاتتەەۆتىڭ سوزىنشە، وتكەن جىلى وڭىردە وبلىس اكىمى جانسەيىت تۇيمەباەۆتىڭ قولداۋىمەن «كونە جەتىگەننىڭ سىرى» اتتى 10 سەريالى تەلەحيكايا تۇسىرىلگەن.

«رۋحاني جاڭعىرۋ» باعدارلاماسى اياسىندا تۇسىرىلگەن تۋىندىلار كورەرمەن قاۋىمعا ۇسىنىلدى. بۇدان وزگە، «كيەلى قازىعۇرت»،  «وتىراردى قورعاۋ»، «كۇش اتاسى - قاجىمۇقان»، «بايدىبەك بي» اتتى انيماتسيالىق فيلمدەر رەسپۋبليكالىق جانە جەرگىلىكتى تەلەارنالاردا كورسەتىلدى. سونداي-اق، «ۇلى جىبەك جولىنداعى ەسكەرتكىشتەر» اتتى دەرەكتى فيلم تاسپالانىپ، كوپشىلىك تاماشالاپ ۇلگەردى»، - دەدى نۇريددين پاتتەەۆ.

ايتا كەتەيىك،  مەملەكەت باسشىسىنىڭ «ۇلى دالانىڭ جەتى قىرى» ماقالاسىندا تۋعان جەر مەن تۇلعالاردى تانىتاتىن كينو جانە انيماتسيالىق تۋىندىلار ءتۇسىرۋ قاجەتتىگى ايتىلعان بولاتىن.

«جالپى، حالىقتىڭ ساناسىندا فيلمدەردەگى جارقىن كينووبرازدار ىرگەلى عىلىمي مونوگرافيالارداعى دەرەكتى پورترەتتەردەن گورى ماڭىزدىراق ءرول اتقارادى.  سوندىقتان، تەز ارادا قازاقستاننىڭ وركەنيەت تاريحىنىڭ ۇزدىكسىز دامۋىن كورسەتەتىن دەرەكتى-قويىلىمدىق فيلمدەردىڭ، تەلەۆيزيالىق سەريالدار مەن تولىقمەتراجدى كوركەم كارتينالاردىڭ ارنايى تسيكلىن وندىرىسكە ەنگىزۋ كەرەك. ۇلت قاھارماندارىن ۇلگى تۇتۋ ءۇردىسىن قالىپتاستىرۋعا جول اشاتىن ساپالى بالالار فيلمدەرى مەن مۋلتيپليكاتسيالىق سەريالداردى اسا قاجەت ەتەتىن وسكەلەڭ ۇرپاقتىڭ دا تالعامىنا ەرەكشە نازار اۋدارۋ كەرەك. ءبىزدىڭ داڭقتى باتىرلارىمىز، ويشىلدارىمىز بەن ەل بيلەۋشىلەرىمىز - تەك قازاقستان عانا ەمەس، سونداي-اق بۇكىل الەم بويىنشا ەلىكتەۋگە لايىقتى تۇلعالار» دەپ اتاپ كورسەتكەن.

بۇل رەتتە اعىمداعى جىلى وبلىس باسشىسىنىڭ  قولداۋىمەن وڭىردە «ورداباسى - بىرلىك تۋى» اتتى انيماتسيالىق ءفيلمنىڭ ءتۇسىرىلىمى اياقتالىپ، تۇساۋكەسەرى جوسپارلانۋدا. سونىمەن قاتار، «تۇركىستان»، «وقسىز» انيماتسيالىق فيلمدەرى مەن «تولە بي» تەلەسەريالىنىڭ ءتۇسىرىلىم جۇمىستارى جالعاسىپ جاتىر.

Abai.kz