24-قاراشا كۇنى Tengrinews سايتىندا “مينيسترى مۆد كازاحستانا: كتو زاپومنيلسيا نا ەتوم پوستۋ” اتتى ماقالا جاريالاندى. سايت قازىرگى ىشكى ىستەر مينيسترلىگىنىڭ اتقارىپ جاتقان ىستەرىمەن قاتار سوناۋ 1920 جىلدان بەرگى تاريحىن ماقتانىشپەن ءتۇزىپ شىعىپتى.

سول ماقتاۋلىلاردىڭ اراسىندا اندرەي پلاتەۆ، گريگوري كنيازەۆ، ميحايل بەرسەنوۆ اتتى ورىس گەنەرالدارى دا بار. كەۋدەسىن وردەن-مەدالدارعا تولتىرعان بۇل ۇشتىك كىم دەسەڭىز، ولار – كەشەگى جەلتوقسان كوتەرىلىسىندە قازاق جاستارىن قۋدالاپ، مۇردەلەرىن قالا سىرتىنداعى قوقىستارعا تاستاۋعا تاپسىرما بەرگەن گوربوچەۆ پەن كولبيننىڭ شولاق بەلسەندىلەرى. سايتتاعى ماقالاعا سەنسەك، قازىرگى ءبىزدىڭ تاۋەلسىز قر ءىىم سول ورگانداردىڭ جالعاسى ەكەن. سوندا قاسىموۆ باستاعان مينيسترلىك الاش ارىستارىن قۋدالاعان نكۆد-نىڭ زاڭدى مۇراگەرى بولىپ شىعا ما؟

ءبىزدىڭ تاريحىمىزدا نكۆد-نىڭ جەندەتتەرى جاساعان قىلمىستار از ەمەس. بىراق، ولارعا تاريحي باعا ءالى دە بەرىلگەن جوق.

ەگەر، ءبىزدىڭ ءىىم شىن مانىندە رەفورما جاساعىسى كەلسە، وزىنە دەيىنگى شەندىلەردىڭ قاتەلىگىنە ءادىل باعا بەرۋدەن جانە سونى قايتالاماۋدان باستاۋ كەرەك ەدى. بىراق، قاسىموۆ مىرزا رەفورمانى سىرت كيىمنەن باستاۋدى ءجون كورىپتى.

مۇرات ابەنوۆ:

-تاۋەلسىز قازاقستان پوليتسياسى وسى ۋاقىتقا دەيىن قۇرمەت تاقتاسىندا عانا ەمەس، وقىرمانى كوپ پورتالدا وسىنداي ارنايى ماقالا جازىپ،  قازىرگى مينيستىرلىك باسشىلارى كەڭەس ۇكىمەتىندەگى نكۆد جانە ميليتسيانى باسقارعان گەنەرالداردىڭ "ىزگى ءىسىنىڭ جالعاستىرۋشىسى" دەپ ماقتانادى.

ءبىزدىڭ پوليتسيا "ماقتانىشتارى" 1986 جىلى جاستارىمىزدى الماتى ورتالىق الاڭنان اسكەر كۇشىمەن قۋدالاپ ۇرىپ سوققان ، قىزدارىمىزدىڭ باسىن كۇرەكپەن جارعان سول كەزدەگى قازسسر ءىىم ءمينيستىرى پلاتاەۆ اندرەي.
تاعى ءبىر ءبىزدىڭ پوليتسياعا "قۇرمەتتى" "قازاققا ەڭبەگى سىنگەن" گەنەرال كنيازەۆا گريگوري . بۇل كولبينمەن بىرگە سۆەردلوۆسك قالاسىنان كەلگەن ، جەلتوقسان وقيعاسىنا قاتىسقانداردى سوتتاتىپ، تۇرمەگە قاماۋعا سەبەپكەر بولعان قىلمىسكەر.

تاۋەلسىزدىگىمىز ءۇشىن كۇرەستىڭ قۇربانى قايرات رىسقىلبەكوۆتىڭ ولىمىنە تىكەلەي قاتىسى بار رەسسەي گەنەرالدارى ءالى توردە تۇرعاندارى قالاي؟

بۇل ساتقىندىق پا الدە ساياسي قاتەلىك پە؟ تۇسىنىكسىز...

ءتۇيىن. ءبىز كەڭەس وداعىنىڭ قازاق حالقىنا جاساعان بارلىق قىلمىسىن اشكەرەلەۋگە ءتيىسپىز. ال، سول قىلمىستار وسىنداي كەيبىر شەندىلەردىڭ قولىمەن جاسالدى. دەمەك، تاۋەلسىز قازاق پوليتسياسى سول قىلمىستارعا ءادىل باعا بەرۋ كەرەكتىگىن جانە سول كەزدەگى قاتەلىكتەردى قايتالاماۋ قاجەتتىگىن تاعى قايتالاپ ايتامىز.

بىراق، ءوزى دە جاڭاوزەن قىرعىنىن جاساپ، “حالىق الاڭعا تاعى شىقسا، تاعى دا وق اتامىز” دەگەن قالمۇحامەد قاسىموۆتان ازىرگە مۇنداي ەرلىك شىعا قويمايتىن سياقتى.

نۇربيكە بەكسۇلتانقىزى

Abai.kz