قر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا ەلوردادا ءوتىپ جاتقان ءVىىى ازاماتتىق فورۋمدا ازاماتتىق سەكتوردىڭ كەلەشەگى تۋرالى اڭگىمە ءوربىتتى، دەپ حابارلايدى قازاقپارات ءتىلشىسى.

ازاماتتىق فورۋم بارىسىندا «مەن سەنەمىن» تاقىرىبىندا سەسسيا جۇمىسى ءوتتى. وعان بەلگىلى تەلەجۇرگىزۋشى دانا نۇرجىگىت مودەراتورلىق جاساپ، ازاماتتىق سەكتوردىڭ بولاشاعى جايلى اڭگىمەگە قر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆانى تارتتى.

«قازىرگى تاڭدا الەمدىك ساياساتتا، قوعامدىق باستامالاردا ايەلدەردىڭ بەلسەندىلىگى تۋرالى كوپ ايتىلادى. بۇل رەتتە، ءبىزدىڭ ەلدەگى جاعداي قانداي دەپ ويلايسىز؟»، - دەپ سۇراق قويدى دانا نۇرجىگىت.

بۇل ساۋالعا جاۋاپ بەرگەن ايدا بالاەۆا جالپى، ايەلدەر - مەملەكەتتىڭ تىرەگى ءارى قولداۋى ەكەنىن اتاپ ءوتتى.

«بۇل تۋرالى ءاردايىم مەملەكەت باسشىسى دا ايتىپ كەلەدى. ەلباسى ءوز سوزىندە «ءىستى ايەلدەرگە تاپسىرعان دۇرىس، سەبەبى ولاردىڭ جاۋاپكەرشىلىگى مول» دەپ ايتىپ وتىرادى. سوندىقتان، ايەلدەردىڭ جاۋاپكەرشىلىگى مەن ەڭبەكقورلىعى مول ەكەنىن ايتا كەتۋ كەرەك. ايەل دەگەن، ەڭ الدىمەن - انا. سول سەبەپتى، بارلىق اۋقىمدى تاربيەلىك ميسسيا ايەلدەرگە جۇكتەلگەن. ءبىزدىڭ مۇعالىمدەر مەن تاربيەشىلەر، انالارىمىز شىنىندا دا، بالالارىمىزدىڭ ىشكى دۇنيەسىن قالىپتاستىرىپ، سول ارقىلى قوعامنىڭ ىرگەسىن قالايدى. بۇگىنگى تاڭدا بارلىق ايەلدەرگە قانداي جۇمىسپەن اينالىسۋدى ءجون دەپ تاپسا دا، بارلىق جاعداي جاسالعان. ەر بولسىن، ايەل بولسىن ەلىمىزدەگى جاۋاپكەرشىلىگى مول كەز كەلگەن ازامات ءوز ماقساتىنا جەتە الادى. مەملەكەتتىك قىزمەتتە دە، جۋرناليستيكادا دا، ۇكىمەتتىك ەمەس ۇيىمداردا دا، بارلىق سالادا... سوندىقتان، ايەلدەر، البەتتە - ءبىزدىڭ مەملەكەتتىڭ تىرەگى»، - دەدى ايدا بالاەۆا.

سونىمەن قاتار دانا نۇرجىگىت ازاماتتىق سەكتوردى كۇتىپ تۇرعان وزگەرىستەرگە قاتىستى ايدا بالاەۆانىڭ پىكىرىن سۇرادى.

«مەنىڭ ويىمشا، وزگەرىستەر كۇنى ەرتەڭ باستالىپ كەتۋى كەرەك. ءتىپتى بۇگىن دە... سەبەبى، مەنىڭ ەسەپتەۋىمشە، وسى فورۋمداعى ءبىزدىڭ كەزدەسۋ كوپتەگەن ماڭىزدى ءارى الەۋمەتتىك ماسەلەلەردى شەشۋگە باعىتتالعان ناقتى شارالاردى ازىرلەۋگە مۇمكىندىك بەرەدى. تيىسىنشە، بۇل شارالار وتە ءتيىمدى بولۋى كەرەك. ويتكەنى، ءبارى دە ءبىر-ءبىرىن ءوزارا اقپاراتتاندىرىپ ءىس اتقارسا - ماقسات ورىندالادى. ءبىزدىڭ وسىلاي جينالىپ، ماسەلەلەردى تالقىلاۋىمىزدىڭ ماڭىزى زور. باستى قۇندىلىعىمىز - ازاماتتاردىڭ اماندىعى مەن تۇراقتىلىعى. ءاربىر كەزدەسۋىمىز - بىرلەسكەن جۇمىستارىمىزدى جەتىلدىرە ءتۇسىپ، ديالوگىمىز كونسترۋكتيۆتى بولا تۇسەر دەگەن سەنىمدەمىن»، - دەدى ايدا بالاەۆا.

بۇعان دەيىن حابارلاعانىمىزداي، استانادا ءVىىى ازاماتتىق فورۋم ءوتىپ جاتىر. ەلباسىنىڭ قاتىسۋى كۇتىلەتىن اۋقىمدى شارا ەكى كۇنگە سوزىلادى.

Abai.kz