پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا قازاقستان رەسپۋبليكاسىنىڭ  اكىمشىلىك-اۋماقتىق قۇرىلىسى ماسەلەلەرى بويىنشا وزگەرىستەر ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

«مەملەكەت باسشىسىنىڭ جارلىعىنا سايكەس، شىمكەنت قالاسى رەسپۋبليكالىق ماڭىزى بار شاھار ساناتىنا جاتقىزىلدى. وڭتۇستىك قازاقستان وبلىسى اتاۋى تۇركىستان وبلىسى دەپ وزگەرتىلدى جانە ونىڭ اكىمشىلىك ورتالىعى شىمكەنت قالاسىنان تۇركىستان قالاسىنا كوشىرىلدى. كونستيتۋتسيالىق زاڭ جوباسىمەن «قازاقستان رەسپۋبليكاسىندا سايلاۋ تۋرالى» جانە «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» كونستيتۋتسيالىق زاڭدارعا وزگەرىستەر ەنگىزۋ كوزدەلگەن»، - دەدى قر ۇلتتىق ەكونوميكا ءبىرىنشى ۆيتسە-ءمينيسترى رۋسلان دالەنوۆ.

ونىڭ سوزىنە قاراعاندا، اتالعان زاڭ جوباسىن قابىلداۋ زاڭنامالىق اكتىلەردىڭ رەسپۋبليكالىق ماڭىزى بار قالالارعا قاتىستى نورمالارىن شىمكەنت قالاسىنا دا قولدانۋعا مۇمكىندىك بەرەدى.

«تۇركىستان قالاسىن دامىتۋ ءۇشىن شاھاردى دامىتۋ بويىنشا باس جوسپاردىڭ تۇجىرىمداماسى قابىلداندى. قازىرگى ۋاقىتتا باس جوسپار ازىرلەنۋدە جانە ءتيىستى كونكۋرس وتكىزىلدى. جوسپاردا قالانى دامىتۋدىڭ باعىتتارى ايقىندالاتىن بولادى. ونىڭ ىشىندە كولىك، ينفراقۇرىلىم، قۇرىلىس، تاريحي نىسانداردى قورعاۋ، سونداي-اق باسقا دا باعىتتار قامتىلعان. بۇدان باسقا، 2024 جىلعا دەيىن تۇركىستان وبلىسىن دامىتۋ بويىنشا ارنايى كەشەندى جوسپار ازىرلەنىپ جاتىر. جوسپار وتە ۇلكەن ءارى اۋقىمدى، وندا 115 ءىس-شارا بار. سونىڭ اراسىندا كاسىپكەرلىكتى دامىتۋ، اۋىل شارۋاشىلىعىن، قۇرىلىس، ءتۋرزيمدى، تكش-نى دامىتۋ بويىنشا باعىتتار بار. جالپى قاراجات 870 ملرد تەڭگە، ونىڭ 400 ملرد تەڭگەسى رەسپۋبليكالىق بيۋدجەتتەن، 29 ملرد تەڭگە جەرگىلىكتى بيۋدجەتتەن، ال قالعانى جەكە ينۆەستيتسيالار ەسەبىنەن بولادى. وسى كەشەندى جوسپار جىلدىڭ سوڭىنا دەيىن قابىلدانباق. جالپى، تۇركىستان قالاسى مەن وبلىستى دامىتۋ ءۇشىن جۇيەلى جوسپارلار بار. سايكەسىنشە، ءتيىستى قارجىلاندىرۋ كوزدەلگەن»، - دەدى ر. دالەنوۆ دەپۋتاتتار ساۋالىنا جاۋاپ بەرە وتىرىپ.

سونىمەن قاتار، جالپى وتىرىستا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ  اكىمشىلىك-اۋماقتىق قۇرىلىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا ءبىرىنشى وقىلىمدا ماقۇلدادى.

Abai.kz