ەلباسى جىل سايىنعى قازاقستان حالقىنا ارناعان جولداۋىندا حالىقتىڭ ءال-اۋقاتىن كوتەرۋ كەرەك ەكەنى باسا ايتىپ كەلەدى. وسى باعىتتا تۇركىستان وبلىسىندا بيىل مەملەكەتتىك «نۇرلى جول» باعدارلاماسىمەن 165,1 شاقىرىم جول جالپى جوندەۋدەن وتكەن.

وعان رەسپۋبليكالىق بيۋدجەت ەسەبىنەن 3 ميلليارد 400 ميلليون تەڭگە قارجى بولىنگەن. ال كەلەر جىلى وڭىردە «نۇرلى جول» باعدارلاماسى شەڭبەرىندە 300 شاقىرىمنان استام وبلىستىق ماڭىزى بار اۆتوموبيل جولدارىنا جوندەۋ جۇمىستارىن جاساۋ جوسپارلانۋدا.

وعان ەلىمىزدىڭ قازىناسىنان 7 ميلليارد 528 ميلليون تەڭگە قارالىپ وتىر. قازىر باعدارلاما اياسىندا وبلىستىڭ بىرنەشە اۋداندارىندا كۇردەلى جوندەۋ، ورتا جوندەۋ جانە جولدى قايتا قالپىنا كەلتىرۋ جۇمىستارى قارقىن العان.

ماسەلەن، سايرام اۋدانى مەن شىمكەنت قالاسىن بايلانىستىراتىن 9 شاقىرىمدىق اۆتوموبيل جولىنىڭ قۇرىلىسىن مەردىگەر مەكەمە وسى جىلدىڭ ءساۋىر ايىندا باستاعان. الداعى 2020 جىلى تولىق اياقتاپ قولدانىسقا تاپسىراتىن بولادى. «اتالعان جولدىڭ ەنى 5 مەترگە ۇزارعان. بۇرىندارى مۇندا قاراما-قارسى باعىتتا ەكى كولىك وتسە، ەندى 4 كولىك قاتار جۇرە الادى»، – دەيدى ماماندار.

ءابجات اكىموۆ، سەرىكتەستىك باسشىسىنىڭ ورىنباسارى: «2,6 شاقىرىم جولدىڭ ءبىرىنشى قاباتى توسەلگەن. كەلەسى جىلعا دا ىستەلەتىن جۇمىستار بار. تەمىرجول وتكەلى دە تۇر. ونى ءبىز كەلەر جىلعا جوسپارلاپ جاتىرمىز».

روللان يبراگيموۆ، وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى: «نۇرلى جول» مەملەكەتتىك باعدارلاما اياسىندا جولدارعا رەسپۋبليكالىق بيۋدجەتتەن 3,4 ميلليارد تەڭگە ءبولىنىپ، 165 شاقىرىم اۆتوموبيل جولدارىنا قايتا جاڭارتۋ، كۇردەلى جوندەۋ، ورتاشا جوندەۋ جۇمىستارى جۇرگىزىلىپ جاتىر. بۇل بىزدە ءبىرىنشى كەزەكتە وبلىس ورتالىعىن جانە دە تۋريزم نىساندارىنا باراتىن جولداردى جوندەپ جاتىرمىز. سايرام اۋدانىندا 2 جولىمىز قايتا جاڭارتۋ جۇمىستارى ءجۇرىپ جاتىر جانە تۇلكىباس اۋدانىندا تۇلكىباس ستانساسىنان ت.رىسقۇلوۆ اۋىلىنا باراتىن جولدى دا جاڭارتىپ جاتىرمىز».

Abai.kz