ەلباسى ن.نازارباەۆ اۋىلشارۋاشىلىعى سالاسىن ەكونوميكانىڭ درايۆەرى دەپ اتاعان بولاتىن. سونىمەن قاتار، پرەزيدەنت “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا دا بۇل سالاعا ەرەكشە نازار اۋداردى.

وسىعان وراي، وڭىرلەردە دە اۋىلشارۋاشىلىعىن دامىتۋ جۇمىستارى قارقىندى جۇرگىزىلىپ كەلەدى. ماسەلەن، بۇگىندە تۇركىستان وبلىسى جەتىساي اۋدانىنداعى قوي باسى 167 مىڭنان اسىپتى.

قازىرگى تاڭدا جەتىساي اۋدانىندا 152 مال بورداقىلاۋ الاڭى جۇمىس ىستەيدى ەكەن. سولاردىڭ ءبىرى جەتىساي اۋدانى اباي اۋىل وكرۋگىندەگى «ماحارام» شارۋا قوجالىعى الداعى 4 ايدا 1 مىڭ باس قويدى بورداقىلاپ شىعارماق.

ءاربىر بايلانعان قوشقار ورتا ەسەپپەن 30-35 كەلى ەت بەرەدى. قازىردىڭ وزىندە قورادا 300 باس جايدارى قوشقار جەمگە قويىلعان. قوجالىقتا وندىرىلگەن ەت نەگىزىنەن الماتى قالاسىنىڭ نارىعىنا جونەلتىلەدى.قازىرگى تاڭدا «ماحارام» شارۋا قوجالىعىنىڭ يەلەگىندە جالپى سانى 5 مىڭ باس قوي بار. جەتىساي اۋدانىندا جايىلىم جەر قات بولعاندىقتان، مۇنداعى وتارلار شاردارا اۋدانىنا قاراستى قۇمدا ۇستالادى ەكەن. قوجالىق توراعاسى ماحارام نيفتاليەۆتىڭ ايتۋىنشا، جايدارى قويلار ءشول جانە شولەيت جەر جايىلىمىنا كونبىس، كۇتىم تالعامايدى.

«قويلارىمىزدىڭ جەم-ءشوبىن ءوزىمىز ازىرلەيمىز. بيىل 20 گەكتار جوڭىشقا مەن 30 گەكتار جەرگە جۇگەرى ەكتىك. ودان الىنعان ءونىم جامان ەمەس. ماسەلەن، جوڭىشقانى 5 رەت ورىپ الامىز. جيىن-تەرىم جۇمىستارىنا قاجەتتى تەحنيكالارىمىز دا بار»، - دەيدى ماحارام نيفتاليەۆ.

ايتا كەتەيىك، بۇگىندە جەتىساي اۋدانىندا 167 مىڭ 972 ۇساق مال بار. ونىڭ 22337-ءسى جاڭااۋىل اۋىلدىق وكرۋگىندەگى شارۋالارعا تيەسىلى.

Abai.kz