ەلباسىنىڭ  “الەۋمەتتىك 5 باستاما” جوباسىنىڭ نەگىزىندە، جۋىردا تۇركىستان وبلىسىندا پوليەتيلەنتەرەفتالاتتى (پەت بوتەلكە) قايتا وڭدەۋ جانە شتاپەلدىك تالشىق شىعارۋ زاۋىتىنىڭ قۇرىلىسى اياقتالعان بولاتىن. زاۋىت تولىقتاي ىسكە قوسىلعان كەزدە 250-دەن استام جۇمىس ورنى اشىلاتىن بولادى.

جوبانى ىسكە اسىرۋدىڭ ينۆەستورلارى — قازاقستاندىق GreenTechnology Industries كومپانياسى مەن Hong Kong General Industry And Commerce Co Ltd (قحر) شەتەلدىك سەرىكتەس كومپانياسى.

قازىرگى تاڭدا زاۋىتتا پەت قالدىقتاردى جۋ، كەپتىرۋ جانە بولشەكتەۋ بويىنشا ءوندىرىستىڭ ءبىرىنشى كەزەڭى ىسكە قوسىلدى — 73 ادام جۇمىس ىستەپ ءجۇر. بۇگىندە كومپانيا كەلەسى كەزەڭ — شتاپەلدىك تالشىق شىعارۋدى ۇيىمداستىرۋدى قولعا الدى.

Hong Kong General Industry And Commerce Co Ltd (گونكونگ) — Tianrun Group حالىقارالىق حولدينگىنىڭ ەنشىلەس كومپانياسى. بۇل سەكتسيالىق جىلىتۋ رادياتورلارىنىڭ ەڭ ءىرى ءوندىرۋشىسى جانە ەكسپورتتاۋشىسى. حولدينگتىڭ اينالىمى جىلىنا $400 ملن قۇرايدى، قىتاي مەن ەۋروپادا وندىرىستىك قۋاتتىلىقتارى بار.

Kazakh Invest تاراپىنان جوبانى گازبەن جابدىقتاۋ جەلىلەرىنە قوسۋ كەزىندە، سونداي-اق شەتەلدىك سەرىكتەس كومپانيانىڭ باسشىلىعى مەن ماماندارىنا جۇمىس ۆيزاسىن الۋ كەزىندە كومەك كورسەتىلدى.

رەسمي ستاتيستيكا بويىنشا، جىل سايىن قازاقستاندا 5–6 ملن توننا قاتتى تۇرمىستىق قالدىقتار (قتق) جينالادى، ونىڭ شامامەن 150–200 مىڭ تونناسىن پەت قالدىقتار قۇرايدى. سونىمەن قاتار، قتق-نىڭ تەك 3–5% قايتا وڭدەلەدى نەمەسە كادەگە جاراتىلادى.

«اتالعان جوبا قازاقستاندا العاش رەت پەت قالدىقتار دايىن ءونىم – شتاپەلدىك تالشىق شىعارۋعا جۇمسالاتىندىعىمەن بىرەگەي. سينتەتيكالىق تالشىقتىڭ بۇل ءتۇرى مىجىلمايدى، كۇيىپ كەتپەيدى جانە كوپ ۋاقىت بويى بەرىكتىگىن ساقتايدى، گيپواللەرگەندى قاسيەتكە يە. ودان جاسالعان زاتتار قولمەن ۇستاعان كەزدە جاعىمدى، وڭاي جۋىلادى. سونداي-اق، ءونىم قۇرىلىس قوسپالارىندا قولدانىلاتىن بولادى، وسىلايشا قۇرىلىس جۇمىستارىنىڭ ساپاسىن جاقسارتۋعا جول اشادى»، — دەدى GreenTechnology Industries اتقارۋشى ديرەكتورى كلارا ءابدىراحمانوۆا.

بۇدان وزگە، پوليەفيرلىك تالشىقتاردان 3D پرينتەردە باسىپ شىعارۋعا پايدالانىلاتىن فيلامەنتكە ارنالعان (1,75 نەمەسە 3 مم پلاستماسسا ءجىپ) ماتەريال جاساۋعا بولادى.

جوبانىڭ جالپى قۇنى — $20 ملن. جىل سايىن زاۋىتتا 50 000 توننا دايىن ءونىم شىعارىلادى دەپ جوسپارلانعان.

Abai.kz