ەلباسىنىڭ "قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ" اتتى قازاقستان حالقىنا ارناعان جولداۋىندا وڭىرلەردىڭ ينۆەستيتسيالىق الەۋەتىن كوتەرۋگە باس نازار اۋدارعانى بەلگىلى.

تۇركىستان وبلىسىندا ءوز ىسىنە بەرىلگەن ىسكەر ايەلدەر جەتەرلىك. سولاردىڭ ءبىرى ارا وسىرۋمەن شۇعىلداناتىن-يرينا دەميدوۆا. ومارتاشىلىقپەن عىلىمي نەگىزدە اينالىسىپ جۇرگەن جاس عالىم قازاقستان اۋىل ايەلدەرىنىڭ فورۋمىنا قاتىسۋعا شاقىرتۋ الدى. اتادان بالاعا مۇرا بولعان كاسىپتى تەرەڭ مەڭگەرگەن يرينا بىزگە ءوزىنىڭ ساتتىلىگى تۋرالى ايتىپ بەردى ...

بۇل ارا وسىرۋمەن اينالىساتىن –دەميدوۆ شارۋا قوجالىعىنىڭ يەلىگى. ارا شارۋاشىلىعى فەرماسىنىڭ نەگىزگى بازاسى سايرام اۋدانىنىڭ ابدۋلاباد كەنتىندە ورنالاسقان. دەميدوۆتار اۋلەتى – بال الۋدى اتادان بالاعا مۇرا ەتىپ كەلەدى. سوندىقتان  بۇل كاسىپتى عىلىمي تۇرعىدان دامىتۋدى كوزدەگەن.بۇگىنگى كۇنى فەرما عىلىمي-زەرتتەۋ ينستيتۋتىمەن، سونداي-اق رەسەيلىك ارىپتەستەرىمەن ىنتىماقتاسقان. ۇرىقتاندىرۋ مۇندا تابيعي جانە اسپاپتىق جولمەن جاسالادى. بۇل جۇمىس ارالاردىڭ تازا تۇقىمداردىڭ اكەلەرىن ءدال ءبىلۋ ءۇشىن جاسالادى. دەگەنمەن بۇل جۇمىستىڭ دا وزىندىك قيىندىقتار جەتكىلىكتى.

يرينا دەميدوۆا – ومارتاشى –سەلەكتسيونەر 

-  ارالاردى كوكتەممەن كۇزدە باپتاپ، كۇتۋ كەرەك. سەبەبى ولار وسى مەزگىلدە اۋىرىپ قالۋى كوپ كەزدەسەدى. ەڭ باستى قيىندىق كەنە. ومارتاشىلار وسى قيىندىقتارمەن كۇرەسەدى. ماقتاشىلار ءبىزدى القاپتارعا كىرگىزبەيدى. نەگىزى تۇسىنگەن ادامعا ارانىڭ پايداسى زور. بىرىنشىدەن ارالار گۇلدەردى توزاڭداندىرادى. ياعني الىناتىن ءونىم دە مول بولار ەدى. بولاشاقتا بۇل سۇراقتى شەشىپ ديقاندارمەن بىرلەسىپ جۇمىس ىستەيمىز دەگەن ويدامىز.

يرينا دەميدوۆا- وتباسىلىق بيزنەستى جالعاستىرۋشى بولاتىنى جايلى مۇلدە ويلاماعان. سوندىقتان  ارتۇرلى قىزمەت سالالارىندا جۇمىس ىستەدى. ناتيجەسىندە  ول ءوز كاسىبى بال اراسىن ءوسىرۋ ەكەنىن ءتۇسىنىپ، وتباسىلىق بيزنەستى جالعاستىرۋدى قولعا الدى. ءسويتىپ  يرينا پاتشايىم ارالارىنىڭ ينسترۋمەنتالدى ۇرىقتاۋىن مەڭگەردى. ول ءۇشىن  پولشادا ماشىقتانۋدان ءوتتى.

يرينا دەميدوۆا – ومارتاشى –سەلەكتسيونەر

- كرەديت الىپ ءوز كاسىبىمدى باستادىم. ارالاردىڭ ومارتاسىن  ۇيشىكتەرىن الدىم. لابوراتوريالىق جابدىقتار الدىم. بارلىعىنا اكەم كومەكتەستى. ءوز قولىمىزدان كەلگەنىن ءوزىمىز جاسادىق. كوكتەمگى ۋاقىتتا 2-3 ماۋسىم مەن ءۇشىن ەڭ قيىن ۋاقىت بولدى. ءتىپتى بۇل ءىستى قويسامبا دەگەن ويلاردا بولدى. ويتكەنى باسىندا وتە قيىن بولدى. ارالار دا ءتىرى جاندىكتەر عوي، اۋا رايى، قورشاعان ورتا بارلىعى قولايلى بولۋى كەرەك. قانشى قيىن بولعانىمەن، ءبارى ارتتا قالدى. قازىر، ءبارى دۇرىس. شارۋشىلىعىمىز دامىپ كەلەدى.

مەملەكەت اسىل تۇقىمدى شارۋاشىلىقتارعا ايتارلىقتاي قولداۋ كورسەتىپ كەلەدى.سۋبسيديالاۋ ارقاسىندا ومارتانىڭ اسىل تۇقىمدى وزەگى جىل سايىن كوبەيىپ  كەلەدى.سوندىقتان ارالاردىڭ تۇقىمى تازارادى. ونىمدىلىگى جاقسارادى. شارۋا قوجالىقتارى 2013 جىلدان باستاپ سۋبسيديا الىپ كەلەدى. بۇل جاعداي شارۋاشىلىقتى عىلىمي تۇرعىدان دامىتۋعا جانە مول ءونىم الۋعا سەرپىن بەرەدى.اۋىلدا ءجۇرىپ عىلىممەن اينالىسۋ –نيەت ەتكەن ادام ءۇشىن ءتىپتى قيىن ەمەس. جاس عالىم-يرينا دەميدوۆا وسىنى دالەلدەپ بەردى.

نۇرسۇلتان ءابدىراشيت

Abai.kz