جۋىردا تۇركىستان وبلىسىنىڭ ەمدەۋ مەكەمەلەرى ءبىر  ايدىڭ ىشىندە كومپيۋتەرمەن تولىق قامتاماسىز ەتىلەدى. كەشەندى مەديتسينالىق اقپاراتتىق جۇيەلەر دارىگەرلەردىڭ جۇمىسىن ەداۋىر جەڭىلدەتىپ، «ءبىر تەرەزە» پرينتسيپىندە جۇمىس ىستەۋگە مۇمكىندىك بەرمەك.

وبلىستىق دەنساۋلىق ساقتاۋ باسقارماسىنىڭ مالىمەتىنشە، بۇگىندە زاماناۋي قوندىرعىلار تولە بي، ارىس اۋداندارىنداعى ەمدەۋ ورىندارى  مەن تۇركىستان قالالىق ورتالىق بالالار اۋرۋحاناسىنا جەتكىزىلگەن. مەديتسينالىق مەكەمەلەردىڭ  ارقايسىسىنا 190 كومپيۋتەردەن بەرىلدى. وسىلايشا، وڭىردەگى اۋرۋحانالار مەن ەمحانالاردى قوسا ەسەپتەگەندە، بارلىق مەديتسينالىق پۋنكتتەر مەن فەلدشەرلىك-اكۋشەرلىك پۋنكتتەر كومپيۋتەرمەن تولىق جابدىقتالدى. الداعى ءبىر ايدىڭ ىشىندە مۇنداي تەحنيكامەن تۇركىستان وبلىسىنىڭ اۋدان جانە اۋىلدىق جەرلەرىندە ورنالاسقان بارلىق مەديتسينالىق مەكەمەلەرى قامتىلادى. جاڭا تەحنولوگيالار ارقىلى وبلىستاعى ءاربىر تۇرعىننىڭ ەلەكتروندىق دەنساۋلىق پاسپورتى بولادى. ال كەلەر جىلدان باستاپ نارەستەلەردىڭ تۋعاننان بەرگى بارلىق مالىمەتتەرى وسى دەنساۋلىق پاسپورتىنا جازىلىپ تۇرادى.

ايتا كەتەيىك، وڭىردەگى دەنساۋلىق ساقتاۋ سالاسىنىڭ ساندىق جۇيەگە كوشۋ جۇمىسى ءتورت باعىتتا جۇزەگە اسۋدا. ولار - ەمدەۋ جانە الدىن الۋ، اۋرۋدى ەرتە انىقتاۋ، مەديتسينالىق كومەك كورسەتۋ، اۋرۋدى باسقارۋ ءارى وڭالتۋ. بۇگىندە وبلىستاعى مەديتسينالىق مەكەمەلەردە  كومپيۋتەرمەن قامتاماسىز ەتۋ دەڭگەيى 69 پايىزدى قۇراپ وتىر. وڭىردەگى اۋدان ورتالىقتارى مەن قالالار تولىقتاي  ينتەرنەت جۇيەسىنە قوسىلعان. شالعاي اۋماقتاردا ورنالاسقان ەلدىمەكەندەردى عالامتورعا قوسۋ  2021 جىلعا دەيىن جوسپارلانعان. ال 38 ەمدەۋ مەكەمەسى مەديتسينالىق اقپاراتتىق جۇيەگە قوسىلعان.

Abai.kz