باسقاسىن ايتپاي-اق قويالىق، ءبىر عانا مەملەكەتتىك ءتىل ساياساتىنىڭ و باستان جۇيەلى تۇردە شەشىلمەۋى ۋاقىت وتكەن سايىن قانشاما پروبلەما تۋدىرىپ كەلەدى. شيرەك عاسىردان بەرى ءتىل ساياساتىن بىرجاقتى شەشۋگە قانشاما مۇمكىندىك بولدى ءالى دە بار.

ساياسي ەرىك-جىگەر، بارىنەن بيىك تۇراتىن مەملەكەت مۇددەسى دەيتىن نارسەلەر وسىندايدا ەسكە تۇسەدى. تاۋەلسىزدىك دەگەنىمىز - ءتىل تاۋەلسىزدىگى. ال ءبىز قاراپايىم قوعامدىق ورىنداردا مەملەكەتتىك تىلدە قىزمەت الا المايمىز. بۇدان وتكەن قورلىق بولا ما؟

"زاڭدا ءبارءى بار، قۇقىڭىزدى قورعاڭىز، تالاپ ەتىڭىز" دەيدى. ول زاڭ بۇلجىماي ورىندالىپ تۇرسا، قۇقىمدى قورعايمىن دەپ قالىڭ قازاق پەتيتسيا جازا ما؟ ال زاڭدى قاداعالاۋشى ورگان قايدا سوندا؟ وتىز جىلدا ءتىل تاۋەلسىزدىگىنە جەتپەۋ..."ولار وزدەرى سويلەگىسى كەلمەيدى، ورىسشا بىلەدى، تۇسىنەدى، قوعامنىڭ وزىنە بايلانىستى" دەپ مەملەكەتتىك ءتىل ساياساتىنا قازاقتى - قوعامدى كىنالاۋدىڭ قاجەتى جوق.

قازاق ءتىلى - شيرەك عاسىردان استام ۋاقىت كۇن تارتىبىنەن تۇسپەي كەلە جاتقان ەڭ وتكىر ساياسي ماسەلە. "قازاق ءتىلىن سۇيتەيىك، بۇيتەيىك، سۇيتسەڭدەرشى، بۇيتسەڭدەرشى" دەۋدىڭ جانە جارناما ءىس-شارالاردىڭ تۇككە كەرەگى جوق. مەملەكەتتىك تىلگە ساياسي تاۋەلسىزدىك كەرەك. لاتىن الىپبيىنە وتكەننەن ءتىل تاۋەلسىز بولىپ شىعا كەلەدى دەگەنگە دە كۇمانىم بار.

ءومىرجان ابدىحالىقتىڭ facebook پاراقشاسىنان

Abai.kz