دەنساۋلىق ساقتاۋ ءمينيسترى دارىگەرلەردى دايىنداۋ جۇيەسىندەگى رەفورما تۋرالى ايتىپ بەردى، دەپ حابارلايدى اباي-اقپارات turkystan.kz-گە سىلتەمە جاساپ.

اسفەندياروۆ اتىنداعى قازۇمۋ-دىڭ 88 جىلدىعىنا ارنالعان مەرەيتويدا ەلجان ءبىرتانوۆ مەديتسينالىق ءبىلىم بەرۋ سالاسىندا مينيسترلىكتىڭ ءرولى ازاياتىنىن ايتتى.

«جۇمىس ىستەپ جاتقان دارىگەرگە حالىقتىڭ قاجەتتىلىگىن قامتاماسىز ەتۋ ءۇشىن قانداي ءبىلىم كەرەگىن عالىمدار مەن وقىتۋشىلار شەشەدى. بىراق بۇل ۋنيۆەرسيتەتتەر نە ىستەگىسى كەلسە، سونى جاسايدى دەگەن ءسوز ەمەس. جوعارى وقۋ ورىندارى ءبىلىم بەرۋدىڭ جاڭا مودەلدەرىن انىقتاپ، يدەيا الماساتىن قوسىمشا جاڭا ينستيتۋتتار قۇرىلۋى قاجەت. ۋنيۆەرسيتەتتەرگە الەمدىك وقۋ-ادىستەمەلىك كەڭەستەرىنىڭ بازاسى نەگىزىندە ءوزىن-ءوزى باسقاراتىن ۇيىمى قۇرۋدى ۇسىنامىز»، - دەدى ەلجان ءبىرتانوۆ.

بۇگىندە قازاقستاندا 15 مەديتسينالىق جوو بار. ولاردىڭ ىشىنە مەديتسينالىق ۋنيۆەرسيتەتتەر دە، مەديتسينا فاكۋلتەتى بار جوعارى وقۋ ورىندارى دا كىرەدى.

«ءبىز 5+1 باعدارلاماسى بويىنشا وقۋ ۇزاقتىعىن 7 جىلدان 6 جىلعا دەيىن قىسقارتۋدى ۇسىنامىز. سولايشا مەديتسينالىق ءبىلىمنىڭ تاجىريبەلىك جاعىن ارتتىرساق، ينتەرندەر مەن رەزيدەنتتەر كوپ ۋاقىتىن ەلىمىزدىڭ كلينيكالىق بازالارىنداعى عانا ەمەس، ۋنيۆەرسيتەت قابىرعاسىنداعى كلينيكالاردا دا وتكىزەر ەدى. تاجىريبە كورسەتكەندەي، تەوريا پراكتيكادان باسىم بولعاندا، جاس دارىگەرلەر ەڭبەك نارىعىنا بەيىمدەلۋ كەزىندە قينالادى»، - دەدى مينيستر.

ەكىنشى باستى باعىت - كلينيكالىق بازالاردى دامىتۋ. مينيسترلىكتىڭ مالىمەتىنشە، ەلدەگى بارلىق مەديتسينالىق ۋنيۆەرسيتەتتەرىڭ ءوز كلينيكالارى بار.

«بيىل الماتىداعى 5 عىلىمي-زەرتتەۋ ورتالىعىن، كلينيكالىق ورتالىقتاردى ۋنيۆەرسيتەت قۇرىلىمىنا بەردىك. مۇندا عىلىمي قىزمەتكەرلەردى ءبىلىم بەرۋ باعدارلامالارىنا تارتۋعا بولادى. بۇل ءوز كەزەگىندە رەزيدەنتتەردىڭ بىلىكتىلىگى جوعارى ماماننان ءبىلىم الۋىنا مۇمكىندىك بەرەدى. سونىمەن قاتار ۋنيۆەرسيتەتتەردى باسقارۋ جۇيەسى دە وزگەرمەك. كورپوراتيۆتىك باسقارۋ ءپرينتسيپى ەنگىزىلدى. اسفەندياروۆ ۋنيۆەرسيتەتى كوممەرتسيالىق ەمەس اكتسيونەرلىك قوعامعا اينالدى. بۇل وقۋ ورنىنا ەركىن اكادەميالىق مۇمكىندىكتەر بەرەدى جانە ۋنيۆەرسيتەت كىرىستەرى مەن اكتيۆتەرىن ءوزى رەتتەي الادى»، - دەدى ە.ءبىرتانوۆ.

Abai.kz