حالقىمىزدىڭ ماڭدايىنا بىتكەن  زاڭعار، عۇلاما جازۋشىسى، ەڭبەك ەرى، كورنەكتى مەملەكەت جانە قوعام قايراتكەرى، قازاق ادەبيەتىنىڭ كلاسسيگى ءابىش كەكىلباەۆتىڭ  ۇلتتىق كىتاپحانادا ارنايى وقۋ زالى اشىلىپ وتىر. مەنىڭشە، بۇل ءابىش اعامىزدىڭ 80 جىلدىعى قارساڭىندا  ونىڭ ەسىمىن ۇلىقتاۋ جولىنداعى العاشقى قادامداردىڭ ءبىرى.

ۇلت رۋحانياتىنا ولشەۋسىز ۇلەس قوسقان تۇلعانىڭ ەسىمى، شىن مانىندە، حالقىمىزدىڭ ەڭ جوعارى قۇرمەتىنە لايىق. سوندىقتان وسىنداي يگى باستامالاردىڭ عۇمىرى  ۇزاق بولارى ءسوزسىز. جاڭا جىلدان باستاپ  ءبارىمىز بۇل جۇمىسقا كىرىسۋىمىز كەرەك. ۇكىمەت، ءتيىستى اكىمدىكتەر قاجەتتى جوسپارلاردى دايىنداپ، ءتيىستى ءىس-شارالاردى قولعا الادى دەپ ويلايمىن. بۇل بۇكىل حالىققا كەرەك  بولىپ تۇرعان ماڭىزدى جۇمىس.

ءابىش كەكىلباەۆتىڭ قايتالانباس قولتاڭباسى  قازاق ادەبيەتىنىڭ عانا ەمەس، الەم ادەبيەتىنىڭ قازىناسىنا اينالدى. كوسەمسوز شەبەرىنىڭ شىعارماشىلىعى بويىنشا تەرەڭ زەرتتەۋلەر جۇرگىزۋ - كەلەشەك بۋىن عالىمدارىنىڭ الدىنداعى ماڭىزدى مىندەت بولۋى ءتيىس.

سەبەبى، ءابىش كەكىلباەۆتىڭ ويلارى، فيلوسوفياسى جانە جالپى رۋحاني الەمى مۇحيتتاي  تەرەڭ.

ءابىش كەكىلباەۆتىڭ ادەبي الەمى شەكسىز دۇنيە، كوپقىرلى، ماعىنالى مۇرا.

راسىندا، بۇل كىسىنىڭ ءبىلىمىنىڭ كوكجيەگى شەكسىز، بىرەگەي ادام. ءارى جازۋشى، ءارى ادەبيەتتانۋشى، عالىم، تاريحشى، ويشىل، فيلوسوف قانا ەمەس، مەملەكەتىمىزدىڭ دامۋىنا ەلەۋلى ەڭبەك سىڭىرگەن كورنەكتى مەملەكەت قايراتكەرى. بۇل - ۇلى جازۋشىلاردىڭ اراسىندا وتە سيرەك كەزدەسەتىن قۇبىلىس.

ءابىش كەكىلباەۆ پرەزيدەنتىمىزدىڭ سەنىمدى سەرىگى بولعانى بارشامىزعا ءمالىم.

جازۋشى تۋىندىلارىنىڭ يدەيالارى «رۋحاني جاڭعىرۋ» فيلوسوفياسىنىڭ نەگىزدەرىمەن ۇندەسەدى. پرەزيدەنتتىڭ «ۇلى دالانىڭ جەتى قىرى» يدەولوگياسى، ءتۇپتىڭ تۇبىندە، قازاق زيالى قاۋىمىنىڭ، جالپى حالقىمىزدىڭ  اسىل ارمانىنىڭ كورىنىسى.

بۇگىندە  ءبۇتىن حالقىمىز ۇلتتىق يدەيانى جاڭعىرتۋ جولىنا بەت بۇردى. وسىلايشا، ءابىش اعامىزدىڭ ارمانى ىسكە اسۋدا.

«ءوز باسىڭنان باق اۋسا دا، ەل باسىنان باق اۋماسىن» دەگەن ءسوز ءابىش كەكىلباەۆتىڭ ازاماتتىق ۇستانىمىنىڭ ايقىن ايعاعى.

سوندىقتان  ءمارجانسوز شەبەرى، گۋمانيست-عالىم، ۇلتجان-ساياساتكەر ءابىش كەكىلباەۆتىڭ شىعارماشىلىعىن، ونىڭ جالپى مۇراسىن ءوسىپ كەلە جاتقان ۇرپاقتاردىڭ اراسىندا كەڭىنەن دارىپتەۋ – بۇل ءبىزدىڭ ءبىرىنشى كەزەكتەگى ماقساتىمىز بولۋى ءتيىس.

وسى باعىتتا كەكىلباەۆتانۋ ادەبيەتتانۋ عىلىمىنداعى نەگىزگى پاندەردىڭ ءبىرى بولىپ قالىپتاسۋى كەرەك. ءبىز  قوعام رەتىندە  ءتيىستى ارەكەت جاساپ، بۇل جۇمىستى باقىلاۋىمىزعا الۋىمىز كەرەك.

قاسىم-جومارت توقاەۆ

قر پارلامەنتى سەناتىنىڭ توراعاسى

Abai.kz