30-قازان كۇنى ەلەكتروندى ۇكىمەت پورتالى مەن egov.kz Telegram-بوتىندا بالالاردى ەمحاناعا تىركەۋ قىزمەتى ىسكە قوسىلدى. قىزمەتتى ازىرلەگەن «ۇلتتىق اقپاراتتىق تەحنولوگيالار» اق حابارلاۋىنشا، ول ءۇشىن پايدالانۋشى egov.kz پورتالىنا تىركەلىپ، ەلەكتروندى تسيفرلىق قولتاڭباسى بولسا جەتكىلىكتى. ءبىر ايتا كەتەرلىگى، ونلاين-قىزمەت 2007 جىلعا دەيىن تۋعان بالالارعا كورسەتىلمەيدى.

قىزمەتتى پايدالانۋ ءۇشىن الدىمەن پورتالداعى «دەنساۋلىق ساقتاۋ» بولىمىنە كىرەسىز. «باستاپقى مەديتسينالىق-سانيتارلىق كومەك كورسەتەتىن مەديتسينا ۇيىمىنا تىركەلۋ» قىزمەتىن تاڭداپ، بالاعا قىزمەت كورسەتۋ وپتسياسىن باساسىز.

سودان سوڭ جۇيە بالانىڭ جسن ءىن ەنگىزۋدى سۇرايدى. جسن نەگىزىندە تۋىستىق بايلانىستاردى انىقتاۋ ءۇشىن احات ءبولىمىنىڭ اقپاراتتىق جۇيەسىنە اۆتوماتتى تۇردە ساۋال جولدايدى. بۇل كوپ ۋاقىت المايدى.

پروتسەسس اياقتالعاننان كەيىن ءسىز ونلاين-وتىنىمگە تۇراتىن ايماعى، مەديتسينا ۇيىمى، تىركەۋ سەبەبى، ۋچاسكەلىك دارىگەر دەگەن سىندى تاعى دا باسقا مالىمەتتەردى تولتىرۋعا مۇمكىندىك الاسىز.

كورسەتىلگەن قىزمەتتىڭ ناتيجەسى ءوتىنىش جولداۋشىنىڭ پورتالداعى جەكە كابينەتىنە جولدانادى. قىزمەت كورسەتۋ مەرزىمى – ءبىر جۇمىس كۇنىنەن اسپاۋى ءتيىس.

اتالعان قىزمەتتى Telegram Bot ارقىلى الۋ ءۇشىن https://t.me/EgovKzBotسىلتەمەسىن پايدالانۋعا بولادى. «باستاپقى مەديتسينالىق-سانيتارلىق كومەك كورسەتەتىن مەديتسينا ۇيىمىنا تىركەۋ» قىزمەتىن باسىپ، چاتتاعى ءتيىستى باتىرمالاردى باسۋ قاجەت. قىزمەتتى بوت ارقىلى الۋ ءۇشىن وعان جازىلۋ شارت (چاتتاعى «Start» باتىرماسىن باسىپ، ۇيالى تەلەفون ءنومىرىن پايدالانۋعا رۇقسات ەتۋ).

ەستەرىڭىزگە سالا كەتسەك، قازىر ەلىمىزدە جىل سايىنعى ەمحاناعا تىركەۋ ناۋقانى ءجۇرىپ جاتىر. ەكى ايلىق ءداستۇرلى كومپانيا 15 قاراشادا اياقتالادى.

سونداي-اق، بيىل ەلىمىزدە مەديتسينالىق ساقتاندىرۋ جۇيەسى ەنگىزىلگەن بولاتىن. وتكەن ايدا، بۇل قورعا  8,7 ملرد تەڭگەدەن استام جارنا تۇسكەن.

جۇيە ىسكە قوسىلعان 2017 جىلدىڭ 1 شىلدەسىنەن 2018 جىلدىڭ 31 قازانىنا دەيىنگى ارالىقتا جەكە كاسىپكەرلەر مەن جۇمىس بەرۋشىلەر تولەگەن جارنانىڭ جالپى سوماسى 113,8 ملرد تەڭگەگە جەتتى.

ونىڭ 105,2 ملرد تەڭگەسى (92,4%) جۇمىس بەرۋشىلەردىڭ اۋدارىمدارى بولسا، قالعان 8,6 ملرد تەڭگە (7,6%) – جەكە كاسىپكەرلەر مەن ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن تۇلعالارعا تيەسىلى.

ايماقتىق تۇرعىدان العاندا، جارنا تولەۋ جاعىنان بۇرىنعىشا الماتى، استانا قالالارى مەن قاراعاندى وبلىسى كوش باستاپ تۇر.

جيناقتالعان قارجى ۇلتتىق بانكتە ساقتالادى. بولاشاقتا ءمامس پاكەتى شەڭبەرىندەگى قىزمەتتەر اقىسىن تولەۋگە جۇمسالادى. ەلىمىزدىڭ باس بانكىمەن قارجىنى سەنىمگەرلىك باسقارۋ تۋرالى كەلىسىم بەكىتىلگەن.

«الەۋمەتتىك مەديتسينالىق ساقتاندىرۋ قورى» كەاق 2018 جىل باسىنان بەرى حالىققا تەگىن قىزمەت كورسەتكەن مەديتسينا ۇيىمدارىنا 599,3 ملرد تەڭگە تولەدى.

«7 قاراشاداعى مالىمەت بويىنشا، قورمەن كەلىسىمشارت بەكىتكەن جەتكىزۋشى كومپانيالارعا 599,3 ملرد تەڭگە تولەندى. بۇل جالپى كەپىلدەندىرىلگەن تەگىن مەديتسينالىق كومەك پاكەتى (تمككك) شەڭبەرىندە بەكىتىلگەن كەلىسىمشارت سوماسىنىڭ 76 پايىزى»، - دەدى مسق باسقارما توراعاسىنىڭ مىندەتىن اتقارۋشى بوتاگوز جاقسەلەكوۆا.

ەستەرىڭىزگە سالا كەتسەك، مسق تمككك جانە مىندەتتى الەۋمەتتىك مەديتسينالىق ساقتاندىرۋ پاكەتتەرىنىڭ قارجىلىق وپەراتورى بولىپ تابىلادى. قور ەمدەۋ مەكەمەلەرىمەن مەملەكەتتىك تاپسىرىس بويىنشا حالىققا تەگىن كومەك كورسەتۋ جونىندە كەلىسىمشارتتار بەكىتكەن بولاتىن. بەكىتىلگەن كەلىسىمشارتتاردىڭ جالپى سوماسى 785,8 ملرد تەڭگە.

«جۇمىس كەستەگە ساي ءجۇرىپ جاتىر. بولىنگەن قاراجات مەديتسينا مەكەمەلەرىنىڭ وپەراتسيالىق شىعىندارىن وتەۋگە جەتكىلىكتى»، - دەدى ب.جاقسەلەكوۆا.

بۇگىنگى تاڭدا قور مەملەكەتتىك تاپسىرىس بويىنشا 1374 مەديتسينا ۇيىمىمەن كەلىسىمشارت بەكىتكەن. ونىڭ 638-ءى – جەكە مەنشىك. بيىل جەكە كلينيكالار سانى 2017 جىلمەن سالىستىرعاندا 177-گە ارتقان. ال، ولارمەن بەكىتىلگەن كەلىسىمشارت سوماسى 2 ەسە ءوسىپ، 125,1 ملرد تەڭگەنى قۇرادى.

سونىمەن قاتار، قازاقستاندا تۇرعىنداردى ەمحاناعا تىركەۋ ناۋقانى اياقتالدى. 15 قىركۇيەك پەن 15 قاراشا ارالىعىندا وتكەن كامپانيا بارىسىندا 300 مىڭعا جۋىق ادام مەديتسينا ۇيىمىن ەركىن تاڭداۋ قۇقىعىن پايدالانعان.

«ناۋقان كەزىندە تۇركىستان وبلىسى مەن شىمكەنت قالاسى، الماتى قالاسى، قاراعاندى جانە الماتى وبلىستارىنىڭ، سونداي-اق استانا قالاسىنىڭ تۇرعىندارى بەلسەندىلىك تانىتقان. كامپانيا ناتيجەسى بۇل باستامانىڭ استانا، الماتى سىندى ءىرى قالالار ءۇشىن عانا ەمەس، ايماقتار ءۇشىن دە ماڭىزدىلىعىن كورسەتىپ بەردى»، - دەدى مەديتسينالىق ساقتاندىرۋ قورىنىڭ باسقارۋشى ديرەكتورى زابيرا ورازاليەۆا.

ناۋقانعا قاتىسقان قازاقستاندىقتاردىڭ باسىم بولىگى ەمحاناعا وزدەرى بارىپ تىركەلسە، 13,5 مىڭعا جۋىعى ونلاين قىزمەتتى تاڭداعان (egov.kz پورتالى ارقىلى).

الداعى ۋاقىتتا ەمحانانىڭ تىركەۋ بولىمدەرى ارقىلى تىركەلۋ توقتاتىلادى. بۇل شەشىم جۇيەلى پروبلەمالاردى جويىپ، قىزمەتىن اسىرا پايدالانۋ جانە فالسيفيكاتسيا فاكتىلەرىنىڭ الدىن الۋ ماقساتىندا قابىلدانىپ وتىر.

«بۇعان ەشقانداي الاڭداۋدىڭ قاجەتى جوق. بىرىنشىدەن، تىركەلۋ ءۇشىن ەمحاناعا اياقتاي بارىپ ۇيرەنگەن ازاماتتار حالىققا قىزمەت كورسەتۋ ورتالىقتارىنىڭ قىزمەتىنە جۇگىنە الادى. اتالعان ورتالىقتاردا Connection Point بولىمشەلەرى بار، ولار egov پورتالىنا قوسىلعان. سول جەردە ارنايى كەڭەسشىلەر وتىرادى. ەكىنشىدەن، Egov.kz جۋىردا Telegram بوتىن ىسكە قوستى. سمارتفوننىڭ كومەگىمەن وسى بوت ارقىلى بىرەر مينۋتتا تىركەلۋگە بولادى. ۇشىنشىدەن، قازىر ءوزىڭىزدى عانا ەمەس، بالالاردى دا ونلاين رەجيمدە تىركەۋگە مۇمكىندىك تۋدى. جۇيە بارلىق مالىمەتتەردى قىسقا مەرزىم ىشىندە، اۆتوماتتى تۇردە شىعارىپ بەرەدى. بۇل پروتسەستى بارىنشا جەڭىلدەتەدى ءارى ارتىق قۇجات تالاپ ەتىلمەيدى»، - دەدى ز. ورازاليەۆا.

مسق الماتى فيليالى ديرەكتورى تىلەۋحان ابىلداەۆتىڭ ايتۋىنشا، تىركەۋگە ءوتىنىش بەرگەن وڭتۇستىك استانالىقتاردىڭ بەستەن ءبىرى egov پورتالى ارقىلى تىركەلگەن. بۇل جۇرتشىلىقتىڭ ەنگىزىلىپ وتىرعان جاڭا باستامالارعا دايىندىق دەڭگەيى جوعارى ەكەنىن كورسەتسە كەرەك.

بيىلعى تىركەۋ ناۋقانىنا 607 مەديتسينا ۇيىمى قاتىستى. ونىڭ 82-ءسى – كامپانياعا تۇڭعىش رەت قاتىسىپ وتىرعاندار. اتالعان ەمحانالار كەلەر جىلى كەپىلدەندىرىلگەن تەگىن مەديتسينالىق كومەك شەڭبەرىندە حالىققا قىزمەت كورسەتپەك.

جالپى، تىركەۋ ناۋقانى – ەمحانا اۋىستىرۋدىڭ جالعىز جولى ەمەس. قازاقستاندىقتاردىڭ جىلىنا ءبىر رەت ەمحانا اۋىستىرۋعا مۇمكىندىگى بار. سونىمەن قاتار، قونىس اۋدارعاندا، ەمحانا جابىلىپ قالسا نەمەسە مسق-مەن كەلىسىمشارتتى بۇزسا، جاقىن ماڭنان جاڭا ەمحانا سالىنسا، ەمحانا قىزمەتىنە قاتىستى شىعىنداردى جاباتىن ەرىكتى مەديتسينالىق ساقتاندىرۋ كەلىسىمشارتىن بەكىتكەن جاعدايدا باسقا ەمحاناعا اۋىسۋعا بولادى. تىركەۋمەن اينالىساتىن ەمحانالاردىڭ تولىق ءتىزىمىن مەديتسينالىق ساقتاندىرۋ قورىنىڭ fms.kz سايتىنان تابۋعا بولادى.

Abai.kz