ەلباسى نۇرسۇلتان نازارباەۆ قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىنعا قاتىسىپ، بارشا قازاقستاندىقتى ۇلىق مەرەكەمەن قۇتتىقتادى.

«بارشاڭىزدى باعا جەتپەس باستى مەرەكەمىز - تاۋەلسىزدىك كۇنىمەن شىن جۇرەكتەن قۇتتىقتايمىن! بۇل - قىران قۇستاي ەركىندىككە ۇمتىلعان حالقىمىزدىڭ عاسىرلار بويعى اسىل ارمانى ورىندالعان كۇن. تاۋەلسىزدىك - جۇرەگى ەلىم دەپ سوققان ءاربىر قازاقستاندىق ءۇشىن اسا قادىرلى، ايرىقشا ارداقتى ۇعىم. «ادام باقىتتى ءومىر ءسۇرۋى ءۇشىن، ونىڭ تاۋەلسىز وتانى بولۋى قاجەت» دەگەن دانالىق ءسوز بار. بۇكىل حالقىمىز اقسارباس ايتىپ، ەگەمەندىك بايراعىن كوكتە جەلبىرەتكەنىنە، مىنە، 27 جىل تولىپ وتىر. وسى ۋاقىت ىشىندە قازاقستان تامىرىن تەرەڭگە جايىپ، ءورىسىن كەڭەيتىپ، كەمەلدەنە ءتۇستى»، - دەدى ەلباسى.

قر پرەزيدەنتى سىناعى كوپ سىندارلى كەزەڭنەن سۇرىنبەي ءوتىپ، مارتەبەسى بيىك، تۇعىرى بەرىك، مەرەيلى مەملەكەتكە اينالعانىمىزدى اتاپ ءوتتى. ەۋرازيانىڭ جۇرەگىندە ورنالاسقان جاڭا ەلوردا - جاڭعىرعان قازاقستاننىڭ سيمۆولى سانالاتىندىعىنا باسا نازار اۋداردى.

«بيىل اقوردالى استانامىزدىڭ 20 جىلدىعىن جۇرت بولىپ جۇمىلىپ، جوعارى دەڭگەيدە اتاپ وتتىك. بۇل مەرەيتويعا ەلىمىزدىڭ بارلىق وڭىرلەرى اتسالىسىپ، شاھارىمىزدىڭ كوركەيە تۇسۋىنە زور ۇلەس قوستى. ەلىمىز  بۇگىندە الەمدىك باسەكەگە قابىلەتتى 50 ەلدىڭ قاتارىندا. جاھان جۇرتشىلىعى قازاقستاندى مويىنداپ، سەنىمدى سەرىكتەس رەتىندە تانىدى. وڭىرلىك پروبلەمالاردى شەشۋ ىسىندە ساليقالى ساياسات ۇستانعان ءبىزدىڭ ۇرانىمىز ءاردايىم تاتۋلىق پەن تۇراقتىلىق بولدى. قازىرگى تاڭدا مەملەكەتىمىز حالىقارالىق ۇيىمداردىڭ بىتىمگەرلىك جۇمىستارىنا بەلسەنە اتسالىسۋدا»، - دەدى نۇرسۇلتان نازارباەۆ.

مەملەكەت باسشىسى جيىرما ءبىرىنشى عاسىردىڭ ەكىنشى ونجىلدىعىندا قازاقستان جاڭا بەلەستەردى باعىندىرۋعا كىرىسكەنىن ايتتى.

«بيىلعى قاڭتار ايىندا بىرىككەن ۇلتتار ۇيىمىنىڭ قاۋىپسىزدىك كەڭەسىنە  توراعالىق ەتۋىمىز - سونىڭ ايقىن دالەلى. قازاقستان ەكى جىل بويى وسى كەڭەستىڭ تۇراقتى ەمەس مۇشەسىنىڭ مارتەبەلى ميسسياسىن اتقارىپ كەلەدى. بەيبىتشىلىكتى جاقتايتىن مەملەكەتىمىز وسىلايشا حالىقارالىق قاۋىمداستىققا كەڭىنەن تانىلدى»، - دەدى قر پرەزيدەنتى.

سونداي-اق، تاۋەلسىزدىكتىڭ 27 جىلى ىشىندە مەملەكەتىمىز وزىنىڭ دامۋ جولىندا زور جەتىستىكتەرگە جەتكەنىن اتاپ ءوتتى. ەلباسى ەگەمەن ەلىمىزدىڭ قۇرىلۋ تاريحىندا قازاقستاننىڭ جاس استاناسىنىڭ ماڭىزدى ءرول اتقارعانىنا ايرىقشا توقتالدى.

مەملەكەت باسشىسى قازاقستاندا جۇرگىزىلگەن اۋقىمدى نارىقتىق رەفورمالار ميلليوننان استام ازاماتتارىمىزدىڭ كاسىپكەرلىك قابىلەتتەرىن ەكونوميكاعا جۇمىلدىرۋعا جول اشقانىن ايتتى.

«ەكونوميكانى جۇيەلى يندۋستريالاندىرۋ وڭدەۋ ونەركاسىبىنىڭ ۇلەسىن ايتارلىقتاي ارتتىرۋعا سەپتىگىن تيگىزدى. بۇگىندە مۇنداعى ءونىم كولەمى شامامەن 9,5 تريلليون تەڭگەنى قۇراپ وتىر»، - دەدى قازاقستان پرەزيدەنتى.

سونداي-اق، ەلباسى كولىك-لوگيستيكا ينفراقۇرىلىمىنا تارتىلعان ينۆەستيتسيانىڭ ارقاسىندا قازاقستان قۇرلىقتىق ماڭىزى بار ترانزيتتىك حابقا اينالعانىن اتاپ ءوتتى.

سونىمەن قاتار، نۇرسۇلتان نازارباەۆ تاۋەلسىزدىك جىلدارى تابىسى ەڭ تومەنگى كۇنكورىس دەڭگەيىنەن تومەن تۇرعىندار سانى 15 ەسە ازايىپ، ال ناقتى ەڭبەكاقى 4 ەسە ارتقانىن ايتتى.

«ەگەمەن قازاقستاننىڭ باستى جەتىستىكتەرىنىڭ ءبىرى – حالقىمىزدىڭ سانى 18 ميلليوننان اسىپ، تۇرعىنداردىڭ ورتاشا ءومىر ءسۇرۋ ۇزاقتىعى 72,5 جاسقا جەتۋى. وسى ماڭىزدى جەڭىستەرىمىز بەن يگى ناتيجەلەرىمىز ءبىز تاڭداعان باعىتتىڭ دۇرىس ەكەنىن راستاپ وتىر», - دەدى مەملەكەت باسشىسى.

قازاقستان پرەزيدەنتى 2018 جىلى ەلىمىزدىڭ سىرتقى ساياساتتا دا، جاڭعىرۋ باعدارلامالارىن ىسكە اسىرۋ اياسىندا دا قول جەتكىزگەن باستى جەتىستىكتەرىنە توقتالدى.

«ءبىزدىڭ جاۋاپتى ءارى سىندارلى سىرتقى ساياساتىمىز الەمدىك ارەناداعى ءوز ورنىمىزدى ايتارلىقتاي نىقتاي تۇسۋگە مۇمكىندىك بەردى. قازاقستاننىڭ جەمىستى بىتىمگەرلىك قىزمەتى استاناداعى سيرياارالىق كەلىسسوزدەردىڭ ناتيجەلى بولۋىنا سەپتىگىن تيگىزدى»، - دەدى ەلباسى.

سونداي-اق، نۇرسۇلتان نازارباەۆ «استانا» حالىقارالىق قارجى ورتالىعىن، «استانا حاب» ءىت-ستارتاپتاردىڭ حالىقارالىق تەحنوپاركىن جانە «جاسىل» تەحنولوگيالار مەن ينۆەستيتسيالىق جوبالاردىڭ حالىقارالىق ورتالىعىن ىسكە قوسۋ جونىندەگى جۇمىستاردىڭ ناتيجەلەرىنە نازار اۋداردى.

«قوعامداعى بىرلىك پەن كەلىسىم ءبىزدىڭ بارلىق جەتىستىگىمىزدىڭ باستاۋىندا تۇرعانىن ءاردايىم ەستە ۇستاۋىمىز كەرەك. ەتنوسارالىق جانە كونفەسسياارالىق دامۋدىڭ قازاقستاندىق مودەلى بۇگىندە حالىقارالىق برەندكە اينالدى»، – دەدى مەملەكەت باسشىسى.

قازاقستان پرەزيدەنتى ەلىمىزدەگى كەيىنگى باستامالاردىڭ ءبارى تۇرعىندارىمىزدىڭ تۇرمىس ساپاسىن جاقسارتۋعا، قوعامدىق قاۋىپسىزدىكتى جوعارى دەڭگەيدە قامتاماسىز ەتۋگە جانە ءال-اۋقاتىمىزدى ارتتىرۋعا باعىتتالعانىن اتاپ ءوتتى.

«الەۋمەتتىك سالانى كەشەندى جاڭعىرتۋ – ءبىزدىڭ ماڭىزدى باعىتىمىز. تاۋەلسىزدىك جىلدارى ميلليونعا جۋىق ازاماتىمىز باسپانالى بولدى. ءبىز جۋىرداعى 5 جىل ىشىندە 70 ميلليون شارشى مەتردەن استام تۇرعىن ءۇي سالامىز. بۇل شامامەن تاعى ەكى ميلليونعا جۋىق قازاقستاندىق باسپانالى بولادى دەگەن ءسوز»، - دەدى ەلباسى.

سوڭىندا نۇرسۇلتان نازارباەۆ تاۋەلسىز ەل تۇرعىندارىنىڭ قازىرگى بۋىنى ۋاقىت تالابىنا ساي بولىپ، قازاقستانداعى ءاربىر وتباسىنىڭ يگىلىگى مەن بەرەكەسىن نىعايتۋعا ۇلەس قوساتىنىنا سەنىم ءبىلدىردى.

مەملەكەت باسشىسىنىڭ سويلەگەن ءسوزىنىڭ تولىق ءماتىنىن مىنا جەردەن وقي الاسىزدار.

Abai.kz