كەشە الماتى قالاسىندا بولعان اۋىر جول اپاتىنان ءۇش جولاۋشى قايتىس بولىپ، بىرەۋى اۋىر قالدە ەمحاناعا تۇسكەن. قايتىس بولعان جولاۋشىلاردىڭ ءبىرى بەلگىلى اكتريسا شولپان ەلگەزەكوۆا. ال جول اپاتى بولعان كەزدە شولپانمەن ءبىر كولىكتە بولعان اكتريسا ايزادا ساتىبالديەۆا جانساقتاۋ بولىمىندە جاتىر.

ءبىز ماسەلەنىڭ ءمان-جايىن ءبىلۋ ءۇشىن قالالىق پوليتسيا دەپارتامەنتىنىڭ ءباسپاسوز قىزمەتىنىڭ جەتەكشىسى سالانات ازىربەككە حابارلاسقان ەدىك. ونىڭ ايتۋىنشا، سەيفۋللين مەن اباي داڭعىلدارىنىڭ قيىلىسىندا Mercedes Gelandewagen اۆتوكولىگى Mitsubishi Galant كولىگىنە سوعىلىپ، سالدارىنان جەڭىل كولىك جولدىڭ قارسى باعىتىنا شىعىپ كەتىپتى. Gelandewagen كولىگىنىڭ جۇرگىزۋشىسى ۇستالىپ، قاماۋعا الىنعان. ەكى باپ بويىنشا قىلمىستىق ءىس قوزعالىپتى.

«اتالعان فاكتى بويىنشا قر قك 345-بابى 3-تارماعىنا (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى سالدارىنان ابايسىزدا ادام ولىمىنە اكەپ سوققان ءىس-ارەكەت) سايكەس قىلمىستىق ءىس قوزعالدى. Mercedes Gelandewagen جۇرگىزۋشىسى ۇستالدى. سونىمەن قاتار، قىلمىستىق ءىس اياسىندا سوت-مەديتسينالىق جانە باسقا دا ساراپتامالىق زەرتتەۋلەر جۇرگىزىلەدى»، – دەيدى سالتانات ازىربەك.

جول اپاتىنا قاي جۇرگىزۋشىنىڭ كىنالى ەكەنى جانە وقيعاعا قاتىستى وزگە دە مالىمەتتەر تەك ساراپتامالىق تەكسەرىستەن كەيىن عانا بەلگىلى بولاتىنىن ايتتى. ال قولعا الىنعان جۇرگىزۋشى جايلى مالىمەتتەر تەك پروكۋروردىڭ رۇقساتىم عانا بەرىلەتىنىن جەتكىزدى. وسىنشا جازىقسىز جاننىڭ جانىن قيعان جول اپاتىنا سەبەپشى بولعان جۇرگىزۋشىنى قانداي جازا كۇتىپ تۇرعانى جايلى سۇراعىمىزعا سالتانات ازىربەك "اسىعىستىق" تانىتىپ تۇرعانىمىزدى ەسكەرتىپ، بارلىعى سوتتا بەلگىلى بولاتىنىن ايتتى.

ءبىزدىڭ بۇلاي "اسىعىستىق" تانىتۋىمىزدىڭ سەبەبى، ەلدەن بۇرىن اقپارات بەرۋ ءۇشىن ەمەس تالاي جاننىڭ تاعدىرىن تەمىر تۇلپاردىڭ تابانىنا تاپتاعان تەنتەك تەكتەۋسىز قالماسىن دەگەن نيەت. ايتپەسە، ءبىزدىڭ ەلدە ءبىر ەمەس بىرنەشە مارتە ادام قاعىپ كەتسە دە اۋىر جازالانبايتىن مىقتىلار بار. كولىكتىڭ رولىنە وتىرسا بولدى ءوزىن "شۋماحەر" سەزىنەتىن دوكەيلەردىڭ كەسىرىنەن قانشاما بەيكۇنا جانداردىڭ قانى توگىلدى. قىمبات ماشينالارعا ءمىنىپ الىپ كوشەدە وزدەرىن وتە "سەنىمدى" ۇستايتىن مىقتىلاردىڭ ادام باسىپ كەتكەن سوڭ سوت زالىندا دا سۇيەنەرىنە سەنىپ جازادان بوساۋىنا جول بەرمەۋ كەرەك.

ءبىز بۇل وقيعادا Mercedes Gelandewagen كولىگىنىڭ جۇرگىزۋشىسى كىنالى دەپ ءدال قازىر ايتا المايمىز. سەبەبى، ءبىزدىڭ "وتە شاپشاڭ" قيمىلدايتىن پوليتسەيلەر ەكى كۇن بويى ەشتەڭە انىقتاي العان جوق. الماتى قالالىق پوليتسيا دەپارتامەنتىنىڭ رەسمي وكىلىنىڭ سوزىمەن ايتقاندا "بىرەر مينۋتتا ءبارىن انىقتاۋ" مۇمكىن بولمادى. تەكسەرىپ سارالاۋدان كەيىن تولىق بەلگىلى بولادى. قالاي بولسا دا Abai.kz اقپاراتتىق پورتالى بۇل وقيعانى باستى نازاردا ۇستاپ، كىلالىنىڭ ءادىل جازالانۋىن تالاپ ەتەتىن بولادى.

فوتو: zakon.kz

Abai.kz