الەۋمەتتىك جەلى — تاربيە بەرەتىن/الاتىن/تاراتاتىن جەر ەمەس. تاربيەنى اكە-شەشە عانا بەرەدى، مەكتەپ تە، بالا باقشا دا ەمەس. الەۋمەتتىك جەلى — اقپارات تاراتاتىن رەسۋرس.
⠀
ءسىز قانداي اقپارات جازاسىز، ەستيسىز، قابىلدايسىز، ءسىزدىڭ ميىڭىز سونىمەن تولادى. ينتەرنەت پايدالانۋشىدا اقپاراتتىق يممۋنيتەت ءالسىز بولسا، ميى الەۋمەتتىك جەلىدە الدىنان شىققان قوقىستىڭ ءبارىن جۇتا بەرەدى. ءسىزدىڭ ومىرىڭىزگە، جۇمىسىڭىزعا، بولاشاعىڭىزعا، جەكە تۇلعالىق دامۋىڭىزعا قاجەتسىز اقپاراتتىڭ ءبارى — قوقىس. كەز كەلگەن وسىندا وتىرعان سانالى ادام اقپاراتتى فيلترلەي الۋ قابىلەتىنە يە بولعانىن قالار ەدىم.
⠀
اقپاراتتى تاراتۋدىڭ سوكرات ايتىپ كەتكەن قاراپايىم قادامدارى:
1) ول راس پا، شىن بولعان دۇنيە مە؟ اقپاراتتىڭ ناقتى، رەسمي دەرەككوزى بار ما؟ جالعان اقپاراتتى تاراتىپ، ءوزىمدى دە، وزگەنى دە الداپ، زاڭ الدىندا جاۋاپقا تارتىلىپ قالمايمىن با؟
⠀
2) تاراتقان اقپاراتتىڭ قانداي پايداسى بار؟ جۇرتقا ول ۇناي ما؟ اۋديتورياعا قانداي ىزگىلىك/جاقسىلىق/قۇندىلىق سىيلايدى؟
⠀
3) ءسىز بولىسكەن اقپارات كىمگە قاجەت؟ اقپاراتتى كورگەن ادام نەگاتيۆ كۇيگە تۇسپەي مە؟ ونىڭ جۇيكەسىن جۇقارتىپ، ميىنا اۋىر سالماق سالماي ما؟

نۇرلان جانايدىڭ facebook پاراقشاسىنان

Abai.kz