وسكەمەندەگى زيالى قاۋىم وكىلدەرى وسىنداي ۇسىنىس ايتىپ، شىعىس قازاقستان وبلىسىنىڭ اكىمى دانيال احمەتوۆكە ۇسىنىس-حات جازدى. حاتتىڭ ءماتىنىن نازارلارىڭىزعا ۇسىنا وتىرىپ، قولداۋ بىلدىرۋلەرىڭىزدى سۇرايمىز!

قۇرمەتتى دانيال كەنجەتايۇلى!

ەلباسىمىز نۇرسۇلتان نازارباەۆتىڭ باستاماسىمەن، تىكەلەي مۇرىندىق بولۋىمەن قولعا الىنعان، بۇگىنگى كۇنى رەسپۋبليكامىزدىڭ تۇكپىر-تۇكپىرىندە مۇمكىندىگىنشە جۇزەگە اسىرىلىپ جاتقان «رۋحاني جاڭعىرۋ»، «ۇلى دالانىڭ جەتى قىرى» اتتى جوبالارعا ءسىز باسقارىپ وتىرعان شىعىس قازاقستان وبلىسىنىڭ سۇبەلى ۇلەس قوسىپ جاتقانىنا ۇنەمى مارقايىپ جۇرەمىز. اسىرەسە، الەم تاريحىندا، ونىڭ دامۋ تەگەرشىگىنىڭ ۇنەمى پروگرەستىك باعىتقا بەت بۇرۋىندا، جالپى ادامزات دامۋى ەۆوليۋتسياسىندا ەرەسەن ۇلكەن ءرول اتقارعان التاي، ونى مەكەن ەتكەن تۇركىلەردىڭ وتكەنىنە كارى ەۋروپا مەن مۇحيتتىڭ ارعى بەتىندەگى امەريكانىڭ ءجىتى نازار اۋدارۋى، تىكەلەي ەلباسى مەن ءسىز ىقپال ەتىپ، جاعداي جاساعان عالىم-زەرتتەۋشىلەردىڭ ارقاسى. وڭىرىمىزدەن تابىلعان التىن ادام، تاعى دا باسقا قۇندى جادىگەرلەر – وسى ءسوزىمىزدىڭ ايعاقتى دالەلى.

ارينە، كەز كەلگەن ءىرى تاريحي قۇبىلىستى تۋعىزاتىن دا، ونى جۇزەگە اسىراتىن دا – حالىق. ناقتىلاپ ايتساق، حالىقتىڭ اراسىنان سۋىرىلىپ شىققان اسا تالانتتى جەكە تۇلعا. ال، ادام فاكتورىن قالاي قادىرلەۋ، ونى ماداقتاۋ مەن ماراپاتتاۋ، ەلى مەن جۇرتىنىڭ ابىرويىنا ابىروي، داڭقىنا داڭق قوسقان تۇلعالاردى ماڭگىلىك ەستە قالدىرۋ ماسەلەسىندە، ءسىز ەرەكشە قارىمدىلىق بايقاتىپ ءجۇرسىز. وعان حالىقتىڭ كوزى الدەقاشان جەتكەن. ماسەلەن، ەلباسىمىزدىڭ «رۋحاني جاڭعىرۋ» جوباسىنا وراي، سەڭى ماڭگى بۇزىلماي كەلگەن شىعىس قازاقستان وبلىسىنداعى ابدەن ەسكىرگەن، توزىعى جەتكەن، وتكەن قوعامدىق فورماتسيالاردىڭ قاڭسىق مۇراسى سىندى جەر-سۋ، قالا-اۋىل، كوشە، مەكتەپ، ت.ب. اتاۋلاردىڭ سوڭعى ەكى جىل ىشىندە اسا شاپشاڭ جاڭعىرىپ، وزدەرىنىڭ بۇرىنعى تاريحي اتاۋلارىمەن قايتارا تابىسىپ نەمەسە ەل مەن جۇرتتىڭ كوكەيىندە جۇرگەن ەسىمدەرگە يە بولىپ جاتقانى، وسىلاردىڭ ىشىندەگى شۇيدەلىسى - زىرياننىڭ التاي اتالۋى، ءسىزدىڭ قايراتكەرلىك تۇلعاڭىزدى اسقاقتاتا تۇسكەنى راس. ءاماندا تىلەۋلەسپىز!

ەندىگى ۇسىنىس-تىلەگىمىزدىڭ تىزگىنى دە ءسىزدىڭ قولىڭىزدا. 2009 جىلدىڭ قارا كۇزىندە قازاق ونەرىنىڭ شىڭىنا ورمەلەپ شىعىپ، كۇنى بولۋعا قىزمەت جاساپ جۇرگەن الاشتىڭ اسا دارىندى جاس رەجيسسەرى رۇستەم ەسداۋلەتوۆ كەنەتتەن دۇنيەدەن وزدى. وردا بۇزار وتىز جاسىندا. ول وبلىس ونەرىنىڭ قارا شاڭىراعى - وبلىستىق دراما تەاترىنىڭ، وندا بۇرىن-سوڭدى بولماعان قازاق ترۋپپاسىنىڭ اشىلىپ، وركەندەپ دامۋىنا ەرەن ەڭبەك ەتكەن ازامات ەدى. الدىمەن وبلىستا بۇرىن-سوڭدى بولماعان قازاق ترۋپپاسىن اشىپ، جۇرە-بارا سول تەاتردىڭ ديرەكتورى قىزمەتىندە ءجۇرىپ رەسپۋبليكا ساحنالارىندا شىعىس قازاقستاننىڭ اتىن، ونەرپازدارىن ايشىقتادى. رەسپۋبليكادا ۇلتتىق تۇرعىدان العاندا بۇرىن اتى مەن زاتى بەيماعۇلىم شىعىستىڭ ابىرويى كوتەرىلدى. تانىمالدىلىققا يە بولدى. رۇستەم ورازبايۇلى ونمەن دە شەكتەلگەن جوق، شىعىستىڭ تەاترىن حالىقارالىق دەڭگەيگە شىعاردى: وبلىستىق تەاتر ارتيستەرى ءوز شىعارماشىلىقتارىنىڭ سان قىرلى ەكەندىگىن رەسەي، قىرعىزستان، ەۋروپا ساحنالارىندا مەيلىنشە دالەلدەدى. ول – تاۋەلسىز قازاقستاننىڭ مۇلدەم جاڭا فورماتتى رەجيسسەرلەرىنىڭ كوشباسشىسى بولدى.

رۇستەم ەسداۋلەتوۆ ءارى سان قىرلى رەجيسسەر، ءارى ليريك اقىن، ءارى مىقتى دراماتۋرگ، ءارى ۇلكەن پەداگوگ بولاتىن. ەڭ باستىسى، ول – ادام ەدى. ۇلى ابايدىڭ «ادام بول!» دەگەن باستى قاعيداسىن كەۋدەسىنەن شىبىنداي جانى پىر ەتىپ ۇشىپ كەتكەنشە مۇلتىكسىز ورىندادى. ولە-ولگەنشە حالقىنا، ءوزىنىڭ تۋىپ-وسكەن شىعىسىنا جانكەشتىلىكپەن ەڭبەك ەتتى. سوڭعى دەمى دە تەاتر ساحناسىندا ءۇزىلدى.

قۇرمەتتى دانيال كەنجەتايۇلى!

«جەردىڭ اتىن ەل شىعارادى، ەلدىڭ اتىن ەر شىعارادى» دەيدى كەمەڭگەر حالقىمىز. كەشەگى كۇنى وسى تۋعان شىعىسى ءۇشىن جارعاق قۇلاعى جاستىققا تيمەي، بويىنداعى اللاسى سىيلاعان بارلىق مۇمكىندىكتەرى مەن اردا قاسيەتتەرىن ەلىنە ساداقالاعان رۇستەم ەسدۋلەتوۆتاي رەجيسسەردىڭ دۇنيەدەن وتكەنىنە 2019 جىلى ون جىل تولادى ەكەن. سول اتاۋلى جىلعا جانە كەشەگى كۇنى ەلباسى شەگەلەپ ايتقان جاستار جىلىنا ورايلاستىرىپ وبلىستىق دراما تەاترىنا ءوزى ىستىعىنا كۇيىپ، سۋىعىنا توڭعان، مۇقىم سانالى عۇمىرىن قازاقتىڭ ونەرى مەن تەاترىنا باعىشتاعان رۇستەم ەسداۋلەتوۆتىڭ اتىن بەرسەك دەگەن ءوتىنىشىمىز بار. وبلىس بيلىگى تەاترعا وسى ازاماتتىڭ اتىن بەرۋ ارقىلى «رۋحاني جاڭعىرۋ» جوباسىنىڭ ەكى بابى بويىنشا مۇراتقا جەتەدى: بىرىنشىدەن – حالىقتىڭ تالاپ-تىلەگى ۇدەرىسىنەن شىعادى; ەكىنشىدەن – جاس ۇرپاققا ءوزىنىڭ شىنايى پاتريوتتارىن قۇرمەتتەۋدى ۇيرەتەدى! ەگەر دە ءوزىڭىز تاراپىڭىزدان بۇل ۇسىنىس قولداۋ تاۋىپ جاتسا، ءوڭىر حالقىنىڭ قۋانىشپەن قولدايتىنىنا كەپىلمىز.

ىزگى نيەتپەن:

الىبەك قاڭتارباەۆ – جازۋشى، قر جازۋشىلار وداعى شقو فيليالىنىڭ ديرەكتورى;

ءتۇسىپحان تۇسىپبەكوۆ – قوعام قايراتكەرى، «قازاقستاندىق مادەنيەت، سپورت، تۋريزم جانە اقپارات قىزمەتكەرلەرى سالالىق كاسىپتىك وداعى» قب-ءنىڭ شقو فيليالىنىڭ توراعاسى;

جاڭاباي ءاشىموۆ – ەڭبەك ارداگەرى، شق وبلىستىق اقساقالدار القاسىنىڭ توراعاسى; 

سەرىك قۇسانباەۆ – ايتىسكەر اقىن، «التاي اسۋ» قوعامدىق بىرلەستىگىنىڭ اتقارۋشى ديرەكتورى، قر مادەنيەت قايراتكەرى;

Abai.kz